Hello，大家好，我哋係由韓國人每日提供最新韓國旅行資訊嘅Creatrip。
去首爾旅行當然會想體驗更加「韓」嘅行程同活動，除咗去Cafe打卡同購去shopping之外，小編會想推薦大家去最近好多韓國人都爭相預約咗嘅「韓國之家古好齋」傳統宮廷茶點體驗！
「古好齋」位於忠武路站附近，係一個高級韓國傳統宮廷茶點品牌，大家可以喺傳統韓屋入面，慢慢享受時令韓式傳統茶點同茶飲。
小編喺呢個4月尾親身去過一次，實際去到之後會發現，呢度唔只係食甜品咁簡單，而係一個可以連同韓國優美嘅空間、精緻器皿、柔和音樂、庭園景致，同埋悠閒節奏一齊感受嘅地方。今次就跟住小編一齊去「古好齋」探訪同體驗啦！
文章重點✍🏻
・由忠武路站3號出口行大約1分鐘就到嘅韓屋下午茶地點
・1人宮中茶點套餐採完全預約制，前往前需先完成預約
・可以慢慢享受按季節供應嘅韓國傳統茶點與傳統茶
・適合情侶約會、親子旅行、獨遊旅客，亦推薦同朋友一同到訪
韓國之家「古好齋」真實探訪記
「古好齋(고호재)」係咩地方嚟？
「古好齋(고호재)」係由韓國傳統文化體驗設施Korea House 營運嘅高級宮中茶點品牌，主打喺傳統韓屋空間之中，體驗韓國傳統茶點與茶文化。
而「古好齋(고호재)」呢個名本身帶有「喜愛美好古物之人的家」之意。正如其名，呢度旨在將韓國傳統菓子、傳統茶及韓屋空間結合，以更現代化、較容易親近嘅方式呈現，等到訪人士可以更自然地感受韓國傳統美學。
喺呢度可以食到嘅並唔係一般Cafe常見嘅甜品或飲品，而係將韓國傳統宮中茶菓以一人份形式細心搭配好嘅茶菓套餐。而且更加會按照春、夏、秋、冬四季，提供唔同嘅傳統茶點同茶飲，所以喺唔同季節到訪，都可以感受唔一樣嘅魅力。
✨ 小編感想
「古好齋(고호재)」係一個喺首爾市中心都可以體驗到韓國傳統茶菓文化嘅地方。相比起一般主打「打卡」嘅靚cafe，呢度更似係一個可以喺韓屋空間入面慢慢坐低、放鬆感受好有韓國特色嘅美感同氛圍嘅體驗型景點！
咩係韓國傳統傳統宮廷茶點？
所謂嘅宮廷茶點，其實就係源自朝鮮時代皇室文化嘅韓國傳統茶同茶點組合。「古好齋(고호재)」就將呢種傳統茶菓文化用一個更加容易俾現代旅客接受同享受嘅方式重新演繹。
佢哋將傳統年糕、韓菓、水果製成嘅茶點，同季節限定嘅茶飲配搭成一個茶點套餐，等你可以一次過感受到韓國傳統茶點嘅魅力。
小編上次去「古好齋(고호재)」都係第一次食韓國宮廷茶點，實際食落唔算太甜，比較清淡易入口，而且仲會食到食材本身自然嘅味道，連平時唔太鍾意食甜品嘅人應該都會食得開心！
「古好齋(고호재)」適合邊啲人去？
💡推薦對象
・想喺首爾旅行時體驗充滿韓國特色行程
・想喺明洞、忠武路、乙支路一帶搵個可以安靜休息一下嘅地方
・同父母旅行，想去啲比較舒服、安靜嘅景點
・鍾意韓國文化，或者想喺韓屋影靚相
・想自己一個人慢慢享受韓國傳統茶點
小編上次去嘅時候，見到有唔少客人都係自己一個嚟。因為呢度有提供1人份茶點套餐，亦都有1人座位，所以就算係一個人旅行，都唔會覺得尷尬，可以跟住自己節奏慢慢坐、慢慢享受，呢點真係幾吸引！
點解「古好齋(고호재)」咁受歡迎，成日都爆滿？
「古好齋(고호재)」嘅一人傳統茶點套餐都要提前預約，每個預約時段最多接受38人體驗。如果撞正熱門時段都真係好快會爆滿，所以小編建議大家最好早少少book位！
而佢受歡迎嘅原因，又唔止因為茶點好味。成個韓屋空間、庭園景色、着住生活韓服嘅店員、傳統音樂、精緻器皿，仲有每季都唔同嘅茶點，令成個體驗唔只係食甜品咁簡單，而係變成一段只屬於韓國旅行嘅特別回憶。
特別係對遊客嚟講，雖然呢度由明洞、東大門出發都好方便，但一去到又會有種「原來市中心入面仲隱藏咗咁樣嘅一個韓屋空間？」嘅感覺，呢種反差真係幾有魅力。
「古好齋(고호재)」喺邊度？搭咩車先去到？
「古好齋(고호재)」所在嘅「韓國之家」位於地鐵忠武路站3號出口附近，小編實測行1分鐘就去到！
由地鐵站出嚟之後行冇幾步，就會突然見到一座好有氣勢嘅韓屋建築。明明外面仲係好典型嘅首爾街景，但一踏入去入面，成個感覺會即刻唔同晒，呢種由鬧市一下轉去寧靜韓屋空間嘅反差，真係幾令人難忘。
📍 店舖資訊
店名：韓國之家古好齋(한국의집 고호재)
地址：서울 중구 퇴계로36길 10
交通：忠武路站3號出口步行約1-2分鐘
營業時間：10:00-21:00
休息日：逢星期日、星期一
注意事項：因婚禮或包場安排，可能會有額外休息日，建議出發前先查看預約日曆確認
※ 營業時間、餐單同預約規定有可能會變動，建議到訪前先於Creatrip預約頁面、韓國之家官方頁面及預約日曆確認最新資訊。
小編對「古好齋(고호재)」第一印象係？
好似頭先所講，喺忠武路站行幾步突然見到咁大棟韓屋出現，都真係幾震撼下。明明身處喺首爾市中心，但一踏入園區就會覺得連空氣都好似有少少唔同。而且現場職員都着住韓服，而店內亦一直播住傳統音樂做BGM。
呢度唔係嗰種特登整到好似觀光景點咁嘅韓風cafe，而係連空間本身都帶住一種厚實感同份量。由韓屋、庭園、器皿、音樂，到服務氛圍，整體感覺都非常統一，所以由一開始就已經令人對之後嘅體驗充滿期待。
韓屋空間嘅氣氛有咩咁特別？
「古好齋(고호재)」吸引人嘅地方，唔止係茶點好食，連成個空間都好有魅力。店內保留咗韓屋原本嘅氣氛，同時又有比較方便坐嘅枱櫈位，同埋好有韓國feel嘅座地式座位。加上大窗會照入自然光，坐喺度一邊望住庭園，一邊慢慢歎茶，感覺真係幾舒服。
實際坐低之後，你會覺得呢度唔只係影相靚，而係成個空間會令人自然靜落嚟。唔會想急住食完走，反而會想慢慢飲茶、慢慢食件茶點，再望下出面景色，成個人都會放鬆好多。
📝 小編小貼士
如果想影相影得靚啲，建議盡量揀窗邊位。因為可以連埋庭園景色一齊影，影出嚟會更加有韓國傳統氛圍！不過窗邊位唔多，未必一定可以安排到...!
「古好齋(고호재)」一人傳統茶點套餐包括咩甜品？
「古好齋(고호재)」嘅招牌Menu就係可以一個人慢慢享受當季傳統茶點同茶嘅一人傳統茶點套餐。
以2026年春季menu 為準，一人傳統茶點套餐連茶大概係₩30,000(30000)左右。不過menu內容會因應季節同食材供應情況而有所調整，所以唔同時間去，食到嘅甜品都有機會唔一樣。
成套茶菓擺盤都做得好細緻，每一款都整理得好靚，拎上枱嗰一刻已經好吸睛。不過又唔會覺得太花巧，反而有種好韓式、好沉穩嘅美感。
當中尤其令我印象深刻嘅，就係啲器皿。當中部分玻璃器皿係由手作職人製作，就連碟都好講究，每一件都好似一件小型藝術品咁。
實際食過之後覺得味道如何？
整體嚟講「古好齋(고호재)」嘅茶點都係行自然甜味同清雅路線。就算你本身唔鍾意太甜嘅甜品，應該都會覺得幾易接受。而且每款茶點嘅口感同香氣都各有少少唔同，所以唔會食到中途覺得單調，反而會令人想慢慢逐款試。
體驗時間大約西90分鐘，大家可以慢慢享受，整體食完都幾有滿足感。食完之後會有種想再留耐啲嘅感覺，因為個空間真係令人好放鬆！
小編覺得好食嘅茶點係邊款？
以下就同大家分享小編今次食完「古好齋(고호재)」茶點之後嘅實際感想。不過要注意餐點可能會因季節而有所不同，下面內容僅作參考！
迎賓茶（金菊茶）
一坐低之後，最先送上嚟嘅就係作為迎賓茶嘅 金菊茶(금국차)，呢杯茶係每位去到「古好齋(고호재)」嘅客人都會飲到嘅Welcome tea。由第一杯茶開始，就已經感受到呢度好重視待客之道。
金菊茶 本身香氣幾溫和，味道又清清哋、幾舒服，感覺好似先幫你收拾好心情，然後再慢慢進入之後嘅茶點體驗。喺咁安靜嘅韓屋空間入面，第一杯飲到呢款茶，真係覺得好夾。
招牌茶
由今年開始「古好齋(고호재)」同人氣茶品牌 House of Oon合作，令茶飲menu變得更加豐富。以韓國傳統茶做基礎，再加入現代感去重新演繹，整體飲茶體驗都更加精緻。
聽講唔同種類嘅茶，所配搭嘅器皿都會有少少唔一樣，呢啲細節位都令人感受到佢哋真係幾有心思。其中招牌茶係用竹葉、柚子同桂花調配而成。味道清爽，幾容易入口，一啖茶點、一啖茶非常夾！
如果係冷泡茶，會喺常溫下慢慢浸泡大約12個鐘；如果係熱茶，就會用熱水浸大約3分鐘再飲。整體苦澀感唔算重，飲完之後個尾韻都幾清爽。
季節限定茶（濟州抹茶）
今次小編去嘅時候提供嘅季節限定茶，係用濟州產茶葉沖製嘅抹茶。聽講「古好齋(고호재)」會因應每季唔同嘅茶點內容，去配搭返相應嘅茶款，所以每次去都有機會飲到唔同味道。
濟州島本身就係韓國好有名嘅產茶地，茶香溫和，入口清爽。同傳統茶點本身嗰種自然甜味一齊配搭，會令人覺得整體更加平衡同舒服。小編已經期待緊下次去嘅時候會飲到咩季節限定茶！
구움 증편｜香煎韓式酒釀年糕
呢款四四方方嘅年糕，輕輕烤過之後再配上果仁，係「古好齋(고호재)」其中一款招牌茶點。外層帶少少脆口感，中間就好煙韌軟糯。一咬開會有淡淡嘅肉桂香慢慢散出嚟，而果仁嘅口感亦都幾加分。
雖然整體味道都係偏向傳統茶點嗰種比較沉穩、斯文嘅路線，但因為帶有少少烘烤後嘅香氣，所以食落會覺得幾順口，幾易入口。
금귤정과와 사과정과｜糖漬柑橘&蘋果
蘋果食落有少少似乾果嗰種口感，酸酸甜甜幾開胃。
而柑橘上面仲鋪咗金箔，賣相真係幾靚。細細粒入面濃縮咗甜味，同時又食到少少juicy感。雖然好細嚿，但放喺成套茶點套餐入面，就啱啱好可以令味道層次有啲變化，令整體食落冇咁單一。
깨전병｜芝麻煎餅
望落去會覺得佢係嗰種薄薄脆脆嘅口感，不過實際食落又比想像中柔軟少少。芝麻嘅香氣同味道都幾明顯，明明好簡單，但反而係會令人有種「想再食多件」嘅味道。小編覺得呢款都算係一款幾容易令人接受、香港人普遍都會鍾意嘅茶點。
개성주악 | 開城藥果
小編個人幾推薦嘅其中一款茶點就係開城藥果（개성주악），聽講呢款係「古好齋(고호재)」入面幾受歡迎嘅茶點之一。外層食落去脆脆地，入面就非常煙韌軟糯，一咬開甜味就會慢慢滲出嚟。
佢感覺有少少似炸冬甩，但口感會更加煙韌，而糖漿嘅甜味亦唔會太重，食完之後真係會明白點解佢會咁受歡迎！
💖 小編PICK！
開城藥果係今次食過嘅茶點之中，令我印象最深刻嘅一款。外脆內煙韌，再加上糖漿甜味唔會過火，整體平衡感幾好，所以就算本身未食過韓國傳統茶點，都會幾容易接受。
꽃말이 화전｜韓國花煎餅
呢款一睇就知道賣相好靚，影落真係幾上鏡。加咗花作點綴之後，視覺上更加華麗，所以放喺成套茶點套餐入面都特別搶眼。
外層食落去有少少似韓式煎餅嗰種煙韌年糕口感。入面就包住士多啤梨同紅豆餡，呢個組合真係無得輸！士多啤梨帶少少酸甜感，紅豆餡就係自然又溫和嘅甜味，再加埋煙韌口感，成個味道重疊埋一齊，真係會令人覺得好幸福。
호박 식혜 빙과｜南瓜甜米露雪酪
呢款南瓜甜米露雪酪（호박 식혜 빙과）係限量加購餐點，小編個人覺得好值得加！南瓜濃郁又自然嘅甜味，配埋甜米露本身嗰種獨特風味非常夾，食完成個滿足感即刻再升一級。
佢係將熟成南瓜打成蓉，再做成有少少似雪葩 / 冰沙雪糕口感嘅一款甜品。上面仲會加上熬煮過嘅甜米露醬汁，再配埋柚子果肉同烤過嘅甜米露米粒做配料。
明明好有傳統元素，但食法同感覺又幾新鮮！而且雖然係甜品，但又唔會甜到太膩、太重。
📝 小編小貼士
南瓜甜米露雪酪因為係限量供應，所以當日未必一定可以加購到，最好喺事前book嘅時候一次過加購！
呢個傳統茶點套餐到底值唔值個價？
「古好齋(고호재)」嘅一人傳統茶點套餐，以春季menu為準大概係₩30,000(30000)左右。同韓國一般cafe相比，呢個價錢的確唔算平。
不過實際體驗過之後，我會覺得佢賣嘅唔單止係「食茶點、飲茶」本身，而係連埋韓屋空間、器皿、服務、庭園景觀，同埋韓國傳統文化體驗一齊計埋入去嘅價值。
一般Cafe同古好齋(고호재)有咩分別？
| 項目 | 一般Cafe | 古好齋(고호재) |
|---|---|---|
| 目的 | 休息、飲嘢 | 體驗韓國傳統茶菓子 |
| 空間 | Cafe空間 | 韓屋、庭園景 |
| Menu | 蛋糕、咖啡為主 | 季節傳統甜點、傳統茶 |
| 推薦程度 | 適合隨便休息下 | 適合紀念日、旅行體驗 |
所以如果你只係想平平哋飲杯茶，呢度未必會係最適合你嘅選擇。但如果你想喺首爾旅行入面，留低一段會令人記得嘅特別時光，咁古好齋(고호재)就真係幾值得去！
古好齋(고호재)可以點預約？
預約/使用指南
預約方法：透過Creatrip進行預約（每人最多可預約4人體驗）
確認方法：到現場出示預約人姓名入場
使用時間：90分鐘（不設年齡限制）
體驗時段（每節限38人）
- 第1節 - 11:00 ~ 12:30 / 第2節 - 13:00 ~ 14:30
- 第3節 - 15:00 ~ 16:30 / 第4節 - 17:00 ~ 18:30
根據Catchtable嘅預約資訊，「古好齋(고호재)」嘅一人傳統茶點套餐標明必須進行預約，尤其係熱門日期同時段，有機會喺開放預約之後好快就滿，所以如果你已經有心水日子，最好儘早預約定。
不過如果你只會去飲茶，就有機會可以即場walk-in。但如果當時現場已經滿座，就未必可以安排到，所以如果想去得更安心，建議都係提前睇清楚座位情況或者事先預約。
而窗邊位方面就有1張可坐3至4人嘅枱；如果人數再多，就可能要分開坐。如果你對座位有特別要求，記得預先確認會穩陣啲。
⚠️預約前建議先確認
・一人茶點套裝必須預先預約
・每星期日、一休息
・因婚禮或包場安排，可能會有額外休息日
・唔可以帶寵物
・茶點可能含果仁類，有食物敏感人士要留意
・如果係比較嚴格嘅飲食限制，例如純素要求比較細緻嘅情況，店方未必一定能夠完全配合，建議事前先查詢確認。
透過Creatrip就可以直接用繁體中文同港幣預約，就算唔識韓文都冇問題！
[스팟] 韓國之家「古好齋」傳統宮廷茶點體驗（忠武路）
除咗食茶點仲有咩好做？
享受完茶點之後，都建議大家喺韓國之家嘅園區入面慢慢行一陣散步。你可以行出去外面睇下，而沿住樓梯行上去之後見到嘅韓屋建築都好靚！
另外園區入面仲有一個因為BTS拍攝而出名嘅景點，叫做綠陰亭（녹음정）。沿住樓梯行上去，再一直向前，到盡頭左手邊就會見到。
不過要留意，大部分時間入面會有一般客人用餐，所以如果粉絲想去影相，都記得要顧及周圍環境，同埋保持禮貌，咁先可以更舒服咁享受成個行程。
另外，食完飯或者睇完外面景色之後，都可以去紀念品店行下，搵下帶有韓國傳統元素嘅小物同手信。入面有唔少設計沉穩又好有質感嘅小物，好受外國遊客歡迎。
韓國之家原來係辦婚禮/特別聚餐勝地？
韓國之家唔單止係一個可以享受傳統茶點嘅地方，亦係一個會用嚟舉行正式聚餐同特別場合嘅空間。聽講呢度都幾常用作婚前雙方家長見面呢類場合，另外亦有提供晚餐套餐。
如果話「古好齋(고호재)」係可以去享受tea time嘅地方，韓國之家整體就係一個可以去打卡之餘，仲好適合特別日子、家庭聚會嘅時候去嘅空間。
總結：「古好齋(고호재)」咁受歡迎唔係冇原因！
韓國之家「古好齋(고호재)」唔只係一間飲茶食甜品嘅地方。由韓屋、庭園、韓服職員、傳統音樂、器皿，到每一季嘅茶點內容，所有細節加埋一齊，令呢度唔單止係「靚」，而係一個可以真正靜落嚟、感受韓國文化氣氛嘅地方。
而茶點本身亦做得好有水準，賣相精緻，甜味自然，就算係外國遊客都會幾容易接受。
雖然話首爾打卡Cafe選擇真係好多，但如果你想留低一段更加有韓國特色、亦更加令人記得嘅tea time，「古好齋(고호재)」會係一個幾值得安排入行程嘅地方。
「古好齋(고호재)」常見問題 FAQ
Q1. 「古好齋(고호재)」唔預約都可以去到？
A：一人傳統茶點套餐必須預先預約。如果淨係去飲茶，有時即場去都可能入到，但滿座時就未必可以，所以建議事前預約定。
Q2. 「古好齋(고호재)」價位大概幾錢？
A：以2026年春季Menu為例，一人傳統茶點套餐+茶大概係₩30,000(30000)左右。而最受歡迎嘅加購餐點南瓜甜米露雪酪就係₩12,000(12000)，不過Menu同價錢有機會因季節而變動。
Q3. 「古好齋(고호재)」一個人去都得？
A：可以！現場都有一人座位，氣氛都幾適合自己一個去。而且因為本身就係一人茶點套裝，所以自己一個去旅行都可以按自己節奏慢慢享受。
Q4. 推薦邊啲人去「古好齋(고호재)」？
A：想體驗韓國特色嘅旅客、同父母一齊旅行、拍拖、獨遊，或者想帶外國朋友去感受韓國嘅人都好適合。
想喺明洞附近搵個安靜啲嘅地方坐低休息嘅人都啱。
Q5. 「古好齋(고호재)」營業時間同休息日係？
A：主要係日間至下午時段營業，夜晚唔開。另外每星期日、一休息，亦都可能會因為婚禮或包場安排增加休息日，去之前記得事先確認官網預約日曆。
Q6. 可唔可以帶寵物去「古好齋(고호재)」？
A：唔可以。
Q7. 如果有食物敏感，需要注意嗎？
A：需要。茶點有可能含果仁類，有食物敏感或者有飲食限制嘅朋友，建議預約前一定要先確認清楚。
即刻預約古好齋傳統宮廷茶點體驗啦！
[스팟] 韓國之家「古好齋」傳統宮廷茶點體驗（忠武路）
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
