10樣唔洗₩10,000就可以做到嘅嘢
唔洗60蚊就可以體驗到最真實嘅韓國！吃喝玩樂通通都得！
Hello，大家好，我哋係由韓國人每日提供最新韓國旅行資訊嘅Creatrip。
韓國（特別係首爾）物價其實同香港差唔多，所以去旅行嘅時候可能好多人都覺得洗費多，但係其實韓國有好多體驗都可以唔洗₩10,000（~10000）就做到！無論係吃、喝、玩、樂都有，想慳返少少旅費嘅話記住save低篇blog啦！
更多慳錢攻略💡
唔洗₩10,000嘅韓國特色體驗
影人生四格
價錢：₩4,000~6,000/2張
去韓國玩點可以唔影人生四格！韓國四周圍都有好多呢種自助影相鋪，而家多咗好多唔同嘅攝影角度，仲有超多唔同concept嘅攝影場地（連洗衣機都有LOL），而且周不時仲會同明星/卡通人物合作推出各種相框，大家記住一定要影返幾張留念啦！
想去俾專業攝影師影形象照？
去投幣式K房唱K
價錢：₩500/首
香港唱K都要book成間房，仲係計時數，講真如果係自己一個真係好唔抵...韓國有一種K房係投幣式，可以一首一首歌咁買嚟唱，而且仲有自己一間獨立房，同朋友一齊去都唔洗用太多錢，但係一定會玩得開心！
去行山
價錢：免費
雖然大家去韓國旅行通常都係留喺市區，但韓國其實有好多好山好水，最近亦都有好多游客會抽一日半日去行山！如果大家都想離開石屎森林、呼吸新鮮空氣，推薦大家去北漢山、南山、雪嶽山國家公園！
去遊戲機鋪玩
價錢：₩500~2,000/鋪
韓國街頭有唔少好似冒險樂園嘅遊戲機鋪，夾公仔機、跳舞機、籃球機，甚至係飛鏢等等都有，小編個人覺得優點係唔洗專登換代幣，直接用韓幣現金都得！不過大家要小心唔好太沉迷，如果唔係真係好易喺度洗勁多錢XD
韓國仲有咩特別體驗？
去Pop-Up Store
價錢：免費
首爾真係隨時隨地都搞緊Pop-up，特別係弘大同聖水呢兩個地方經常都會有人氣時裝、美妝、飲食品牌，甚至係韓團搞限定活動！大家去到唔單止可以參加各種活動，有時候仲可以攞到贈品，玩得開心又有得攞~
參觀景福宮
價錢：₩3,000/人
景福宮係首爾五大宮殿之一，嚟得首爾玩記住一定要去參觀，瞭解韓國歷史、欣賞韓國傳統建築！如果大家係著韓服去，唔需要俾入場費之餘影相打卡都會靚啲有feel啲！
去漢江食公仔麵
價錢：~₩1,500
成日睇韓國綜藝同韓劇都會見到韓國去漢江食公仔麵！漢江便利店都會有煮公仔麵嘅機器，只要掃個barcode，部機就會自動出水同調較煮麵時間！
參觀韓屋村
價錢：免費
韓國有幾條韓屋村都好值得去，例如大家都知道嘅北村韓屋村，四周圍都被韓屋包圍，就好似穿越返古代咁。小編會想推薦大家去比較少人知道嘅恩平韓屋村，呢度會更加靜，而且後面就有北漢山，影相會更加靚！
去漢江踩單車
價錢：~₩1,500
天氣好嘅時候最啱去漢江玩，無論係散步、野餐定踩單車都好舒服！小編推薦大家去租單車，沿住漢江邊踩，欣賞沿途超靚江景+自然景色，享受悠閒時光！
食街頭小食
價錢：₩2,000~
喺繁華區經常都會見到路邊有唔少小食攤檔賣辣炒年糕、魚糕、糖餅、雞肉串等等各種韓國傳統街頭小食，價錢都唔算貴！如果大家想體驗最道地韓國飲食文化，推薦可以搵日去掃街~
如果有更多想知嘅內容，都可以隨時留言或者dm話俾我哋知：）
Mail：help@creatrip.com
