韓國「Botox/肉毒桿菌」介紹&價錢
韓國打Botox點解咁平？同其他國家生產嘅肉毒桿菌又有咩唔同？
Hello，大家好，我哋係由韓國人每日提供最新韓國旅行資訊嘅Creatrip。
大家知唔知喺韓國最平最多人做嘅醫美療程係咩呢？冇錯，就係韓仔韓妹經常都會去打一次嘅botox啦！打肉毒桿菌素可以改善臉部皺紋同細紋，效果長達半年之餘價錢夠平，所以好多人都會定期去補打。今日就等小編詳細介紹吓韓國嘅肉毒桿菌素療程啦！
韓國醫美療程一定平過香港🤪
韓國「Botox/肉毒桿菌素」介紹
打肉毒桿菌素有咩效果？
「Botox/肉毒桿菌素」會透過阻斷神經傳導令肌肉放鬆，同時可以撫平皺紋，令皮膚顯得更加平滑。
而通常大家打botox都係打臉部動態紋或者肌肉過度發達或者操勞嘅部位，例如抬頭紋、魚尾紋、鼻翼、咀嚼肌（國字臉），甚至連肩頸斜方肌同小腿肌都可以打，令緊綳肌肉放鬆，從而達至視覺上肌肉線條更加平滑嘅效果。
另外打肉毒桿菌素仲可以有止汗作用，唔洗切汗腺都可以解決臭狐問題。
打肉毒桿菌前需要注意啲咩？
打Botox/肉毒桿菌素過程相當快，大約5-15分鐘就搞掂。不過始終係需要注射肉毒桿菌素落皮膚同肌肉，事前諮詢與醫生嘅手勢真係好重要！
諮詢嘅時候專業諮詢師會先觀察你嘅臉部，再確定到底打botox可唔可以解決你嘅困擾，如果可以嘅話又需要打幾多unit等等。打少咗效果會冇咁明顯，不過都算還好；如果一唔小心打太多，或者醫生手勢唔夠純熟打歪咗，可能就會令臉部肌肉做唔到細微動作，睇落勁假勁塑膠...
另外要注意，打完肉毒桿菌素1個禮拜內建議儘量避免過度運動或者食煙飲酒，同時亦都要維持正常作息。有啲人打完之後可能會出現瘀青或者紅腫，不過過幾日就會退，大家唔需要太擔心。
肉毒桿菌素同其他醫美療程有咩分別？
頭先都有提到，因為打botox係需要直接將肉毒桿菌素打入肌膚，所以效果會比HIFU/音波拉提同普通護膚保養更加明顯！打完當日至3日內就會見到注射部位附近有改善；去到2個禮拜至1個月之後，效果會最明顯，而效果亦都大約可以維持3-6個月，之後肉毒桿菌素會慢慢代謝，回復返去療程前嘅狀態。
而效果方面，如果話做HIFU拉提係為咗改善肌膚下垂問題、令肌肉更加緊緻，打botox主要效果係改善皺紋同放鬆肌肉。而另外一款大家都經常會考慮嘅療程 —— 玻尿酸就比較注重令療程部位睇落更加飽滿，而且可以重新雕塑形狀，三款醫美療程嘅效果好唔同！
BOTOX原來係一個牌子名？
通常比起話去打肉毒桿菌素，香港人都會順口講話去打BOTOX，但其實BOTOX只係其中一款肉毒桿菌素嘅牌子名！呢款肉毒桿菌由美國藥廠Allergan製造，獲得多個國際機構認可，而且歷史亦都最悠久，所以成為咗肉毒桿菌素嘅統稱。
另外一個大家經常都會聽到嘅brand係XEOMIN，XEOMIN由德國藥廠製造，獲得美國FDA認可之餘，更加係一款不含複合性蛋白嘅純淨肉毒桿菌素，比起普通肉毒桿菌素抗藥性低，唔會有越打越冇效嘅情況出現。
韓國肉毒桿菌素同其他國家嘅有咩分別？
Letybo
大家又知唔知點解喺韓國打肉毒桿菌素可以咁平呢？答案就係因為韓國有唔少牌子都有推出自家嘅肉毒桿菌素！而且因為係韓國本地製造，所以更加適合亞洲人，經過幾十年嘅改良之後效果亦都更加自然，好少會再見到成個面具咁假咁僵硬嘅問題。
Letybo（레티보）
Letybo係韓國市場佔有率最高嘅肉毒桿菌素，更加喺2024年2月正式獲得美國FDA許可（50U、100U），預計將會擴大規模，進入全球市場。
Nabota（나보타）
如果有關注開醫美呢方面，應該都會聽過「彩虹肉毒」呢個term，佢係韓國第一間獲得美國FDA認證嘅韓國製造肉毒桿菌素，同樣有歐盟CE認證。
Neuronox（뉴로녹스）
Neuronox由韓國醫美大廠Medytox推出，係韓國第一個國產肉毒桿菌素牌子，歷史最悠久，當然品質就自然更加有保障啦！而Medytox推出嘅另一個牌子Coretox（코어톡스）都係喺韓國人氣比較高嘅肉毒桿菌素之一。
肉毒桿菌有抗藥性？效果可以維持幾耐？
根據劑量同個人體質，打完肉毒桿菌素之後嘅效果都會有少少唔同，不過正常嚟講都可以維持到3-6個月，可以每半年打一次做保養。
而抗藥性方面，其實真正會出現抗藥性嘅比例只有大概0.5%，通常都係過度施打（例如唔夠2個月又走去打一次），或者係打嘅肉毒桿菌素成分唔夠純淨。頭先都有介紹到嘅德國製XEOMIN係抗藥性最低嘅肉毒桿菌素之一，不過價錢係韓國製嘅5-10倍。
韓國「Botox/肉毒桿菌」推薦中心
因為喺韓國打botox真係好common，所以幾乎每間美容中心都會有相關療程。以下係小編幫大家精選嘅幾間中心，大家可以格吓價同睇吓其他客人嘅評價，然後揀最符合你訴求同預算嘅療程。
LE SHINE CLINIC
| 地點 | 江南 |
| 療程 | 身體肉毒桿菌 100 unit（膊頭、小腿、手臂） |
| 價錢 | ₩275,000 (275000) |
麗延長
| 地點 | 明洞/弘大/江南 |
| 療程 | 韓國製除皺肉毒桿菌素 |
| 價錢 | ₩5,900起 (5900起) |
The Clim Clinic
| 地點 | 明洞 |
| 療程 | 肉毒桿菌素 - 額頭、眉間、嘴角、前顎、眼周（擇一） |
| 價錢 | ₩33,000 (33000) |
清潭 ÉCLAT DE
| 地點 | 狎鷗亭羅德奧 |
| 療程 | 除皺肉毒桿菌素（1個部位） |
| 價錢 | ₩90,000 (90000) |
S Reborn
| 地點 | 弘大 |
| 療程 | 瘦臉針 |
| 價錢 | [韓國製] ₩22,000 / [德國製] ₩99,000 ([韓國製] 22000 / [德國製] 99000) |
Xenia Clinic
| 地點 | 江南 |
| 療程 | 韓國製下巴肉毒桿菌素 |
| 價錢 | ₩19,000 (19000) |
江南ID醫院
| 地點 | 江南 |
| 施術 | 德國製XEOMIN下巴肉毒桿菌(50 units) |
| 費用 | ₩88,000 (88000) |
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
