Hello，大家好，我哋係由韓國人每日提供最新韓國旅行資訊嘅Creatrip。

近呢幾年韓國Personal Colour有幾紅相信唔需要多講，不過其實除咗顏色，買衫襯衫嘅時候知道自己屬於邊種身型都非常重要！就算顏色啱，如果版型唔啱，著上身都會好怪... 而人嘅體型主要分成5類，今日就等小編幫大家整理各種身型有咩特徵同穿搭嘅時候有咩要注意啦！

想等專家幫你深入分析？

五大體型代表韓星及推薦穿搭

倒三角型

#特徵

• 上半身比下半身寬
• 腰比較粗
• 通常腳會比較細長

#代表韓星 - TWICE 子瑜

#穿搭小貼士 - 上窄下寬！

1. 上身適宜著設計比較簡單嘅衫

如果設計太華麗/誇張（好似上面兩張相咁嘅公主袖、有好多蕾絲等等），或者著蓬鬆嘅毛毛衫同冷衫，會令人視線集中喺上半身，反而會凸顯自己身材缺點！

2. 下身寬鬆版型/露腳

著比較寬鬆嘅褲或者裙可以拉匀返上下身比例，而且因為倒三角體型嘅朋友們通常雙腳會比較細長，所以亦都好啱露腳，轉移對方視線、展露自己優點！

矩型

#特徵

• 上半身=下半身
• 亦被稱為H型身材、睇落冇腰身

#代表韓星 - 少女時代 秀英

#穿搭小貼士 - 凸顯腰線最重要！

1. 適合著短版/收腰款上身衫 + 寬腳褲

矩型身材最大缺點係身體睇落冇曲線，所以屬於呢個體型嘅朋友應該著多啲收腰嘅衫，或者著短版外套，配埋寬鬆褲款都可以凸顯到腰線，令上下半身睇落唔係好似一個直筒咁！

2. 利用皮帶等配件營造腰線

最簡單直接嘅方法就係用皮帶分隔開上半身，或者著有腰帶嘅連身裙都可以掩蓋到缺點！

蘋果型

#特徵

• 胸部、腹部、臀部較豐滿
• 亦被稱為O型身材、全身睇落比較多肉圓潤

#代表韓星 - 朴娜萊

#穿搭小貼士 - 揀挺身嘅衫！

1. 上身推薦著西裝褸同恤衫

通常西裝外套質地都比較挺身，有修飾身體線條嘅效果！另外V領恤衫可以露出頸部同鎖骨，睇落會比較顯瘦！

2. 避免著面料太薄/太厚重嘅衫

記住唔可以揀面料太薄同太貼身嘅衫，如果唔係就會直接將圓潤嘅身材展露無遺；太厚重嘅衫亦都會令呢款體型嘅朋友睇落更加大隻臃腫。

韓國掃貨必備優惠券

正三角型

#特徵

• 下半身比上半身寬（膊頭窄、盆骨寬）
• 腰比較幼
• 腿部相對上較短

#代表韓星 - MAMAMOO華莎

#穿搭小貼士 - 強調上半身&腰部！

1. 上身衫著亮色系、下身衫著深色系

大家都知道通常著深色都會睇落瘦啲，所以屬於正三角型體型嘅朋友們下半身應該要著深色嘅褲/裙，而上半身就可以著比較sharp同淺色嘅衫，有少少pattern嘅話可以更加有效轉移視線！上面張相係個反面教材，當時好多人都鬧華莎服裝師唔識襯衫...

2. 避免著貼身褲、短裙、直筒短褲

上述呢三款下身衫都會令patpat睇落更加大，建議著傘狀裙或者A字型裙/褲子，比較寬鬆嘅版型會令臀圍睇落冇咁大，亦都唔會令對方視線停留喺下半身太耐！

沙漏型

#特徵

• 上半身=下半身
• 腰比較幼、胸部臀部較豐滿（同H型身材唔同!）
• 身材比較有曲線，睇落更加女性化

#代表韓星 - Jessi

#穿搭小貼士 - 好好善用身材優點！

1. 避免著直筒oversize衫

上面都有提到，沙漏型身材嘅優點係身材比較有曲線，著oversize衫反而會遮住咗腰線，而且容易顯肥！所以就算想著hoodie，都建議著比較短嘅版型！

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面 

 韓國代購

Mail：help@creatrip.com