韓國科研團隊研發出牛肉米
最新環保替代食物！到底係用米培育出嘅牛肉，定用牛肉培育出嘅米？
Hello，大家好，我哋係由韓國人每日提供最新韓國旅行資訊嘅Creatrip。
隨住全球都開始越嚟越注重健康同環保，而家市面上陸續出現各種植物肉同肉類代替品。最近韓國延世大學表示佢哋成功研發出混合牛肉幹細胞同大米嘅「牛肉米」，到底係點整出嚟，味道又係點，一齊睇落去啦！
韓國科研團隊最新研發——牛肉米
네이트 뉴스
延世大學化學及生物工程學系教授研究團隊早喺前國際學術期刊Matter刊登咗一份研究報告，表示佢哋研發出比一般白米蛋白質含量高8%、脂肪含量高7%嘅牛肉米。
한겨레
研究團隊表示，因為白米本身就係比較容易搵到，而且營養豐富嘅食材，構造亦非常適合幹細胞生長。要整出牛肉米，首先要喺普通米上面搽一層魚膠，令牛肉肌肉同脂肪嘅幹細胞可以附著得更穩固，然後再放入培養皿培養9-11日。
而且以呢個方法培養牛肉細胞嘅話碳排放量會大大減少！研究結果顯示，製造含有100g蛋白質嘅牛肉米會排放出6.27kg嘅二氧化碳，比起用傳統方式飼養牛隻嘅時候排放出嘅49.89㎏少好多，可以話係新一代嘅環保食材。
唔單止係咁，而家喺韓國1kg嘅牛肉都差唔多要成₩20,000（約HKD 116.93）先買到，如果牛肉米可以成功商品化，1kg都只係要價₩3,000（約HKD 17.54）左右，有望解決飢饉等問題，更加可以用喺軍事，甚至係太空食品度！
JTBC
咁味道同口感方面又係點呢？淨係睇相大家可能會以為好似紅米飯咁，但係佢比起普通白米飯更加硬同脆身，根據肌肉同脂肪幹細胞嘅比例味道都會唔同！肌肉細胞比例比較高嘅話會帶少少牛肉同杏仁味，而脂肪細胞比例比較高嘅話就會有牛油同忌廉味！
雖然距離牛肉米可以商品化嘅日子都仲有一段長時間，但係因為呢款環保食材安全性高，生產過程都相對簡單，相信經過更深入嘅研究之後，總有一日會面世！
如果未來真係推出咗牛肉米，大家又會唔會想買嚟試呢？
如果牛肉米可以好似韓牛咁好食就好啦...🤤
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
