韓國係全世界最“抑鬱”嘅國家？
韓國自殺率奇高，點解韓國發展得咁好都有咁多人有抑鬱症？
Hello，大家好，我哋係由韓國人每日提供最新韓國旅行資訊嘅Creatrip。
最近小編喺YouTube睇咗一條片，入面講到雖然韓國呢幾十年發展速度非常快，不過韓國係OECD國家當中自殺率最高嘅國家，而且呢個現象一直都冇改善過。到底點解會咁，當中又牽及到邊啲韓國文化？
韓國係全世界最“抑鬱”嘅國家？
美國著名心理學家Mark Manson早前喺YouTube up咗一條叫「I Traveled to the Most Depressed Country in the World（我去咗全世界最抑鬱嘅國家旅行）」嘅片，而佢去嘅地方就正正係韓國！
呢個心理學家話如果想理解韓國精神健康點解會咁差，就要由STARCRAFT開始。韓國曾經有一段時間禁止曬所有日本文化，包括動漫、遊戲等等，加上去PC房（網吧）真係好平，好多韓國人就開始玩STARCRAFT。而因為呢款遊戲嘅性質本身就係要互相競爭，所以就興起咗一股電競風。
KBS
電競選手們會租一間屋，一齊住一齊訓練，透過互相分享秘訣同內部競爭提升能力，最後亦都成功喺全球電競比賽之中佔有一席之地。
Mnet
有見及此，呢個“成功嘅法則”亦都被套用喺其他產業，例如大家最經常接觸到嘅K-POP，想成為歌手嘅人由細細個開始就要離開屋企人，同其他練習生一齊接受密集式訓練；又好似SAMSUNG咁嘅韓國大公司，佢哋甚至會為員工提供住宿、三餐同各種醫療福利，但其實變相係想令你一直不斷工作。
韓國人亦都比較偏完美主義，由細個開始就被灌輸一種只要攞唔到100分就係失敗嘅概念。呢個思考模式會出現嘅原因要追溯到韓戰結束後，南北韓分裂，加上損失慘重，韓國需要喺短時間之內恢復同發展。正所謂適者生存，只有最強、最有能力嘅人先可以賺到錢維持生計。
세계일보
雖然韓國呢幾十年會發展得咁快，上面提到嘅兩種思考同工作模式都一定有佢哋嘅貢獻，但係企喺心理健康嘅方面去睇，其實壓力一定會爆棚。同香港人一樣，韓國人都會覺得需要贏在起跑線，施加喺小朋友身上嘅壓力就更加大。
韓國可以話係最受儒教思想影響國家，比起個人，團體同家庭最重要。為你隸屬嘅團體/家庭犧牲得越多，你就會被視為係一個更加好嘅人，如果唔係就會被社會批判。
헬스조선
另外Mark Manson亦都有提及到，會導致抑鬱嘅主要三大因素有生理健康、壓力同社交孤立問題。而比較有趣嘅係喺韓國，缺少自我實現同羞恥心亦都係導致韓國人心理健康出問題嘅原因。喺傳統韓國公司，下屬需要無條件服從上市，加上社會同家庭對個人嘅期待，令壓力越滾越大。
코메디닷컴
但係其實韓國被判定為抑鬱嘅人數唔多，原因係因為大家都覺得如果俾人知道自己情緒或者心理方面有問題會好冇面，所以比起直視問題，反而會選擇逃避。有研究顯示韓國抑鬱患者當中得7%曾經有尋求過心理輔導，由此可見韓國自殺率會咁高+問題一直都未有改善其實係有原因嘅...
總括而言，Mark Manson認為韓國嘅文化同生活模式放大咗儒教同資本主義嘅缺點，喺承受各種來自社會同家庭嘅壓力嘅同時需要追求物質主義。另外好可惜地佢哋都漠視咗呢兩個思想嘅優點，包括係得到家人朋友嘅支持同享受表達自我嘅自由。
其實香港同韓國嘅情況都大同小異，希望大家可以更加注重自己嘅心理健康，有需要記住要去尋求協助！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
Mail：help@creatrip.com
