韓國燒肉推薦
韓國人最愛「燒肉」，到底邊一種燒肉最好食？五花肉？豬頸肉？烤腸呢個部位必點！
Hello，大家好 ，我哋係由韓國人每日提供最新韓國旅行資訊嘅Creatrip。
所有韓國料理入面，最令人難忘嘅就係韓國烤肉。不過大家又知唔知，韓國烤肉唔係淨係得五花肉咁單調，餐廳入面通常都會有好多唔同種類嘅肉可以揀。
今日同小編一齊睇下大家食過邊一種，又最愛邊個部位嘅烤肉啦！
韓國烤肉推薦
1. 五花肉（삼겹살）
韓國烤肉入面最常見嘅五花肉，以肥美油脂加上結實嘅瘦肉受到大眾歡迎。喺韓國，雖然有好多烤肉店，其中佔最多嘅就一定係烤五花肉嘅舖頭，所以就成為咗好多人嚟韓國一定會食嘅美食之一。
價錢亦都根據產地而會唔同，當中最貴、最好味嘅，當然就係韓國國產嘅五花肉！
2. 豬肩肉/梅頭肉（목살）
韓國烤肉除咗五花肉之外，梅花肉（豬肩肉）都好有人氣。不過，烤嘅時候都要注意，如果得烤太耐就會好快老、好難咬。而豬肩肉嘅口感同五花肉唔同，食落更加結實。
3. 豬頸肉（항정살）
有冇豬頸肉愛好者呢？呢個部位同豬肩肉比更加嫩一啲，加上每隻豬嘅産量唔多，所以價格都偏貴。係梅花肉嘅高級版本，口感就偏向似松坂豬。另外，烤嘅時候同樣都要注意火侯，烤耐咗就會老。
4. 豬皮（돼지껍데기）
韓國人食烤肉嘅最愛！肥美豬皮喺鐵盤上燒到滋滋聲，烤到一個程度之後仲會突然彈起。而且喺韓國食烤豬皮嘅時候，一定要配黃豆粉，呢個組合係最夾。唔知道有冇人都鐘意呢種充滿彈性，膠原蛋白豐富嘅豬皮呢？
5. 肥牛（차돌박이）
喺韓國烤肉店比較唔會成日見到呢種肥牛（牛五花），大多數人應該都係打邊爐先會食？但對韓國人嚟講，烤肥牛係更加經濟實惠嘅食法，唔單止滿足到食牛肉嘅慾望，口感軟嫩，比厚切嘅肉更加容易烤熟，鮮美油脂也令人食指大動，都有好高人氣㗎。
6. 排骨（갈비）
韓國烤肉店入面嘅排骨有分做牛同豬，通常係指冇骨頭、已經醃好，有甜味嘅排骨料理。亦因為唔係冷凍，烤嘅時間都比較快，係好多人最愛嘅韓國烤肉之一。不過，每間烤肉店嘅排骨都會有唔同嘅醃製口味，小編個人就鐘意食落偏甜嘅烤排骨，大家又比較鐘意邊一種呢？
7. 里肌（등심）
通常大家食牛肉，除咗油脂豐富嘅牛五花之外，最受到韓國人歡迎嘅就係呢啲帶住油花嘅里肌肉，喺鐵盤上面烤得香氣四溢，真係諗起都流口水。大家下次嚟韓國食烤肉嘅時候不妨睇下有冇里肌肉可以叫啦！
8. 烤鴨胸（오리구이）
同樣喺韓國烤肉入面比較偏冷門，但人氣都好高嘅鴨胸肉，帶有相當濃厚嘅鴨肉香，有點似啱啱介紹過嘅豬肩肉咁。
9. 大腸（대창）
韓國人超愛呢類烤腸料理。其中受到大家歡迎嘅大腸，就真係好似上面嗰張圖咁，充滿住肥厚嘅脂肪，尤其係剪斷後喺鐵盤上烤嘅時候，就會爆開露出曬啲脂肪，係最有罪惡感但又最好味嘅料理之一。
10. 小腸（곱창）
小腸都係同樣有分豬同牛嘅小腸，呢個部位油脂就冇咁多（但都係會好油）。食起來嘅口感比較有嚼勁，但腥味亦都會比較重啲，所以大家通常都會配芝麻葉、辣醬一齊吃，去掩蓋住烤過之後更加濃郁嘅腥臭味。
11. 皺胃（막창）
呢個部位就係俗稱嘅大腸頭，係器官連接嘅地方，所以脂肪就冇大腸咁多。口感比小腸更加有彈性，價錢上都偏貴少少。如果要食的話，推薦大家可以食牛皺胃，因為牛呢個部位嘅脂肪比豬少了3/4，口感上都會更加清淡、更加好食。
12. 韓牛（한우）
日本有和牛，韓國烤肉唔可以錯過嘅就係韓牛，不過韓牛都係需要經過認證，並唔係喺韓國飼養嘅牛就係韓牛嚟㗎。小編一開始對韓牛也係抱住「還好」嘅想法，一食就驚為天人，價格同美味程度都同一般嘅牛肉、豬肉有好大嘅差異，嚟韓國食烤肉一定要試下！
13. 腰內肉（안심）
腰內肉就係同時帶有筋、肉、油花嘅部位，口感都比較豐富，喺韓國食烤肉嘅時候，如果有呢個部位，店員通常會幫手將有筋嘅部位剪咗先會上枱。
14. 板腱肉（살치살）
板腱牛亦都係俗稱嘅嫩肩里肌肉，呢個部位喺牛嘅身上並唔多，所以更加珍貴。如果食韓國烤肉嘅話，都會係剪成一片片、份量都比較少，但烤起嚟就真係相當好食，口感食落都軟綿綿，令人難以相信呢個竟然係牛肉。
15. 豬頰肉（가브리살）
傳說中嘅松坂豬就係呢個部，腮幫肉可以話係豬全身上下最貴嘅地方，食起嚟口感比啱啱介紹過嘅豬頸肉更加嫩一啲，烤嘅時候都唔可以燒得太耐、烤到帶有微焦嘅色澤就可以即刻食得。
以上就係韓國烤肉店入面，一定會有嘅部位，大家最鐘意邊個部位呢？歡迎大家同小編分享一下！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
