韓國正式立法禁止食狗肉
韓國終於立法禁食狗肉！路邊嘅補身湯鋪頭終絕跡...
Hello，大家好，我哋係由韓國人每日提供最新韓國旅行資訊嘅Creatrip。
香港早喺70年前已經明文規定禁止食狗肉（雖然仲係有好多人非法賣狗肉...），而韓國政府喺今年（2024年）1月亦都終於宣佈要正式立法禁食狗肉啦！
韓國正式立法禁止食狗肉
미주 중앙일보
韓國農林畜產食品部喺2024年1月9號表示，韓國國會已表決通過《以狗為食用目的的飼養、屠宰及流通特別法（개 식용 목적의 사육·도살 및 유통 등 종식에 관한 특별법）》。據了解，國會210個議員入面有208人投贊成票、2人棄權，呢條法例喺冇反對票嘅情況下通過！
喺2月正式訂立《狗肉禁食法》之後，韓國將會立即禁止新建以食用為目的嘅狗隻農場，亦會嚴禁屠宰同銷售等行為。呢條法例嘅寬限期為3年，所以由2027年起，飼養、流通、銷售同宰殺食用犬隻嘅人將會被處以3年以下有期徒刑或3,000萬韓幣（約30000000）以下罰款。
연합뉴스
另外，目前正在飼養同販售食用犬隻嘅農戶、屠宰業者、流通商人同餐廳業者也都需要喺法例公佈後三個月內，向地方自治團體申報營業狀況，亦需要喺六個月內提交終結（停業）計劃書。
서울신문
韓國執政黨同在野黨喺立法禁食狗肉呢方面幾有共識，而且因為韓國人亦都開始關注動物權益，所以韓國社會大部份人都好支持立法，但係以大韓肉犬協會為首嘅業界對呢條法例抱強烈反對態度，認為如果正式立法嘅話會剝削從業人員嘅職業與財產權，影響生計。
뉴스1
有見及此，韓國農林水產食品部表示將會最大限度為業者提供支援、進行補償同幫助佢哋喺其他產業就職。不過大韓肉犬協會要求政府每一隻狗都需要支付200萬韓幣作為賠償... 據估計，韓國2023年大約有1,100個犬隻農場，總共飼養緊52萬隻食用狗隻，恐怕韓國政府需要俾超過1兆韓幣先可以滿足到佢哋嘅需求。
相信正式立法之後，韓國街頭就唔會再見到所謂嘅「補身湯」唔知大家對呢條法例有咩諗法呢？喺下面留言話俾小編知啦！
如果有更多想知嘅內容，都可以隨時dm話俾我哋知：）
Instagram：creatrip.hk
Mail：help@creatrip.com
