韓國標準工時上限上調至每星期69小時？
韓國勞工法例最新改動！一個禮拜居然要返69個鐘？！
Hello，大家好，我哋係由韓國人每日提供最新韓國旅行資訊嘅Creatrip。
先前有研究顯示，香港係全球最過度勞累城市第一名，而首爾就排第三，平均工時都不相伯仲，打工仔真係做到心很累... 而韓國政府3月嘅時候宣佈要修訂勞工法例，調整標準工時，但係居然引來噓聲一片？!
韓國原本標準工時係幾長？
동아일보
韓國對上一次修訂標準工時係2018年嘅事，由文在寅政府提出，將最長工時由每星期68小時減至52小時（法定基本工時 40小時 + 最多超時工作 12小時）。當時打工仔見到工時減咗咁多，相信都好心動，不過大家就忽視咗一個問題...
如果返工時間超過上述時數，就算只係超過1個鐘，公司都算犯法。表面上可以保障到打工仔權益，但實際上唔係間間公司都咁有“良心”。有好多公司為咗避免受刑罰都會行法律罅，叫職員就算做超過52個鐘都唔可以如實上報，變相係做緊免費勞工。韓國勞工處檢討法例嘅時候發現咗呢個問題，所以就打算修訂原有標準計算工時方法，希望改善呢個唔合理嘅情況。
而家一個禮拜要做69個鐘？
MBC
韓國勞工處喺今年（2023年）3月6號宣佈將會修訂勞工法例，最長工時可能會變成每星期69小時，即刻引起社會勁大迴響，真係嚇到韓國打工仔個心都離一離...
不過其實仔細睇內容，政府係諗住維持本身「每星期法定基本工時 40小時 + 最多超時工作 12小時」呢個框架，然後將計算加班工時嘅單位由“每星期”改成“每月”、“每季”、“每半年”或者“每年”。而計算單位越長，最長加班時數亦都會縮短。
머니투데이
換個講法，以每個禮拜最多加班12鐘頭為準，如果用“每月”做單位，最長加班時數就會係52小時（12小時 x 4.345星期）。考慮到健康問題，用“每季”、“每半年”同“每年”計嘅話最長加班時數會遞減，最後計出嚟分別會係每季140小時（原本時數嘅90%）、每半年250小時（原本時數嘅80%）同每年440小時（原本時數嘅70%）。同時需要確保連續返工嘅時候，工作日同工作日之間需要有最少11個鐘頭嘅休息時間。
如果最終會修訂成咁，打工仔每個禮拜嘅工作時數都可以唔同，多嘢做嘅時候可以做多幾個鐘，比較少嘢做嘅時候就可以返少幾個鐘。韓國政府表示無論係喺打工仔嘅時間管理方面，定係喺公司實行政策方面都會變得比較有彈性。
韓國勞工處一宣佈完呢個方案之後，就有人計過如果星期六都返工，理論上一個禮拜返工時間最長會係69個鐘！仲有網民整咗個時間表出嚟，如果想避開星期六唔返工，每日就要返13~14個鐘，真係睇完都覺得好可怕。就係因為咁，有好多人開始反對同抗議呢個做法。呢個計劃公開一個星期之後，韓國總統尹錫悅公開發表聲明，表示認為一個星期平均工時長達60小時唔make sense，需要重新檢討呢個政策。
연합뉴스 TV
而最新消息顯示，韓國政府喺4月17號宣佈會以6,000名韓國人為對象進行問卷調查，然後再喺9月嘅國會定期會議公佈最新修訂案。到底最後會演變成點呢？
唔知大家對呢個方案有咩意見呢？歡迎留言話俾小編知，一齊討論吓啦！
如果有更多想知嘅內容，都可以隨時dm話俾我哋知：）
Instagram：creatrip.hk
