韓國最受歡迎香水牌子TOP10
所謂香氣定義一個人，到底最近韓仔韓妹最鍾意用邊款香水？
Hello，大家好，我哋係由韓國人每日提供最新韓國旅行資訊嘅Creatrip。
韓國年輕人特別重視自我管理，無論係以飲食同運動保持健康同維持身材，定係透過化妝同穿搭去扮靚，佢哋都會花好多心機。而想喺其他人心中留低一個良好印象，身上嘅香味都非常重要！ 今日小編幫大家搜集咗最近韓國年輕人最鍾意嘅10個香水牌子，當中有好多連韓星都有用，希望大家可以喺度搵到屬於自己嘅「命定香水」啦！
韓國最受歡迎香水牌子TOP10（排名不分先後）
1. Diptyque（딥티크）
「Diptyque」可以話係最近韓國最受歡迎嘅香水牌子，無論係花調定木調香水都非常特別，而且大部分都係中性香水，所以無論係韓仔定韓妹都好鍾意用。
Do Son Eau de Parfum ₩253,000/75ml
Philosykos Eau de Parfum ₩253,000/75ml
而呢個牌子喺韓國最受歡迎嘅香味相信一定係「Do Son」，佢嘅前調係非洲橙花、玫瑰、 鳶尾花，中調係晚香玉同粉紅胡椒，後調就係麝香，連NCT廷祐都用緊！另外BTS Jin用嘅「Philosykos」都非常搶手，無花果加椰子香味勁特別，好多韓國人都覺得呢支係最正宗最好聞嘅無花果香水！
2. Tamburins（탬버린즈）
「Tamburins」呢個牌子係由Gentle Monster旗下子公司創辦嘅美妝Line，佢地最先推出嘅係Hand Cream系列（金鏈護手霜、貝殼護手霜），上年更加推出第一個香水系列，由BLACKPINK Jennie代言，可想而知真係非常受歡迎！
000 Chain Hand ₩23,000/65ml
000 The Shell Perfume Hand ₩32,000/40ml
000 Hand Sanitizer ₩8,500/30ml
比起香水，韓國年輕人比較鍾意用呢個牌子嘅Hand Cream，而最有代表性嘅就係上面呢款「000」，佛手柑、檀香木同廣藿香嘅香味非常適合鍾意木調香嘅朋友們！佢仲有出埋酒精搓手液，可以消毒之餘隻手仲可以香噴噴~
3. NONFICTION（논픽션）
「NONFICTION」係一個韓國本地香水品牌，所有產品不含17種有害成分，除咗香水，亦都有推出Hand Cream、沐浴露、Body Lotion、香薰蠟燭等等，就算唔鍾意噴香水都可以買其他product！
Gentle Night Perfume ₩128,000/100ml
Gentle Night Hand Cream ₩21,000/50ml
Gentle Night Body Lotion ₩36,000/300ml
呢個牌子最出名嘅香味係「Gentle Night」，混合麂絨、白茶、無花果、青苔、雪松、麝香，味道比較中性，無論係自用定買嚟送俾人都好啱。
4. Le Labo（르라보）
鍾意香水嘅朋友們應該都有聽過「Le Labo」呢個牌子，佢係一個喺美國創立嘅小眾精品香水品牌。最特別嘅係去鋪頭買仲可以寫上自己個名或者鍾意嘅句子，令支香水變得獨一無二！
ANOTHER 13 Eau de Parfum ₩280,000/50ml
最近最受韓國年輕人歡迎嘅香味相信係呢隻「Another 13」，連THE BOYZ柱延都用緊呢款香水！龍涎香、麝香、茉莉花、青苔、琥珀調、木質調同佛手柑嘅組合營造出一種自然嘅體香，完全唔會攻鼻，而且仲會俾到人一種你本身就咁香嘅感覺~
5. Byredo（바이레도）
「Byredo」係一個喺2006年創立嘅瑞典牌子，近呢幾年受到越嚟越多韓國年輕人歡迎。佢哋除咗香水，亦都有出Hand Cream、Body Cream同頭髮噴霧。
BLANCHE Eau de Parfum ₩315,000/100ml
喺韓國最出名嘅係呢款NCT道英嘅代表香水「BLANCHE」！佢嘅前調係番梘香調、粉紅胡椒同白玫瑰，中調係橙花、牡丹同紫羅蘭，而後調就係木質香、麝香同檀香木，味道比較大眾化，鍾意番梘香味同花香味嘅朋友們最近想換香水嘅話，不妨可以考慮吓呢款！
6. Maison Margiela（메종 마르지엘라）
「Maison Margiela」由一位比利時設計師喺1988年創立，呢度嘅香水都叫做「Replica」，顧名思義即係將我地生活中嘅特別香氣複製成為一支香水，希望無論係用嘅人定聞到嘅人都可以回憶起生命中某一個時光。
Lazy Sunday Morning Eau de Toilette ₩98,000/30ml
而韓仔韓妹最鍾意用嘅款係「Lazy Sunday Morning」，連黃旼炫都係用佢！ 佢嘅前調係鈴蘭，中調係鳶尾花，而後調就係白麝香同黃葵籽，有種番梘同柔順劑味，俾人一種乾淨溫柔嘅感覺，真係同旼炫個形象好襯~
7. Clean（클린）
「Clean」係一個2003年創辦嘅美國牌子，呢個牌子嘅香水全部都俾人一種好似啱啱冲完涼咁乾淨清新嘅感覺，而且大部分香味都算中性，男仔女仔都啱，鍾意棉花、番梘、柔順劑味嘅朋友們可以試吓。
WARM COTTON Eau de Parfum ₩57,000/30ml
喺韓國最受歡迎嘅一定係呢款「Warm Cotton」，EXO伯賢同TXT然竣都有用過！呢款香水嘅前調係柑橘同馬鞭草，中調係橙花同海洋香調，而後調就係薰苔調同麝香，有一種洗完晾乾嘅毛巾味，溫暖窩心，男仔用嘅話更加會俾人一種暖男嘅感覺添~
8. Lanvin（랑방）
「Lanvin」呢個牌子相信好多朋友應該都有聽過，佢有超過130年嘅歷史，專賣時裝、珠寶同香水。
Eclat D'arpege Eau de Parfum ₩62,000/30ml
雖然呢個牌子有好多款香水都好出名，不過最多韓妹用嘅就一定係呢款「Eclat D'arpege」，前調係西西里島檸檬葉同綠色紫丁香，中調係紫藤、綠茶同桃葉，而後調就係黎巴嫩白西洋杉同白麝香， 適合大學生同社會新鮮人用！呢款香水香港好多地方都有得賣，大家如果有興趣可以去門市聞吓。
9. A'ddict（에이딕트）
有關注開在韓香港YouTuber嘅朋友們應該對「A'ddict」呢個牌子唔陌生， 好多人都有介紹過佢哋嘅產品。呢個牌子嘅香水特別之處在於佢分成水同油兩層，用嘅時候要搖勻用，而且配方不含酒精，所以就算噴落頭髮都無問題。而招牌銀色包裝嘅固體香水都一樣咁香，帶出街都非常方便！
Naked Muguet 313 固體香水 ₩34,000
唔知道大家有冇睇《換乘戀愛》呢？第二季其中一個參加者Hae Eun早排曾經分享過，話自己最近最鍾意用A'ddict嘅「Naked Muguet 313」香水膏！呢款香水膏以初夏同天鵝為靈感調製而成，混合鈴蘭同檀香木香味，俾人一種清新乾淨嘅感覺。大家除咗可以上「A'ddict」香港官網買，咁啱嚟韓國玩嘅朋友仲可以去Olive Young試味~
10. YUGE（유즈）
「YUGE」呢個牌子嘅香水喺韓國超受女仔歡迎，甚至被稱為空姐香水！除咗普通噴嘅香水，仲有出名唔會黐立立嘅固體香水，不含酒精同有害成分，方便攜帶之餘敏感肌膚都用得，唔怪得受到咁多韓國空姐喜愛~
Solid Perfume 002（Stay Forever） ₩34,000/30ml
Eau de Parfum 002（Stay Forever） ₩39,000/30ml
而最受歡迎嘅香味就係呢款「Stay Forever」，前調係香橙同佛手柑，中調係鳶尾花同茉莉花，而後調就係雪松同麝香，女性化得嚟非常清新。呢款香水喺Olive Young都可以買到，非常方便！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
