韓國最新商品&便利店小食分享

Hello，大家好，我哋係由韓國人每日提供最新韓國旅行資訊嘅Creatrip。

相信大家嚟到韓國都會至少去一次便利店，返酒店前仲要掃啲零食返去慢慢Jap，不過咁多款產品，又唔識韓文，怕中伏唔知點算好？所以吃貨小編就準備咗一個便利店特輯，每兩個禮拜就會去一間便利店親身為大家試食，而且所有產品會由大家嚟投票，鍾意食便利店小食嘅朋友就要繼續睇落去啦！

最後更新：2024.11.28

嚟韓國玩想食盡所有好西？

撳我睇有冇你想去嘅餐廳

韓國最新商品&便利店小食分享

54.《黑白大廚》蔣皓埈煙肉明太子薯仔沙律_(2024.11.28)

購買地點：GS25

價錢：₩2,700

推薦指數：4/5

GS25呢兩個禮拜一次過出咗勁多款同《黑白大廚》參賽者一齊研發嘅嘢食，當中呢款煙肉明太子薯仔沙律由打入八強嘅日式廚師蔣皓埈打造，小編比較驚艷嘅係用料非常足，入面唔單止有薯蓉，仲有煙肉、青瓜同薯仔粒，口感層次多，明太子味雖然唔算好出，但係以便利店嘢食嚟講已經算好高質，而且唔會太鹹，大家見到不妨可以買嚟試！

53. 延世栗子Tiramisu忌廉包_(2024.11.04)

購買地點：CU

價錢：₩3,300

推薦指數：3/5

呢排Netflix《黑白大廚》勁多人睇，而唔少便利店都冇錯過呢個做生意嘅機會，趁機同節目當中嘅廚師合作。而CU最近就同冠軍廚師拿坡里美味黑手黨合作推出咗幾款產品，當中更加有延世忌廉包！

呢款包係栗子Tiramisu味，應該打算還原返佢喺節目整嘅甜品。外層話就話係朱古力包，不過其實食唔出朱古力味。而入面就有栗子忌廉同咖啡吉士，栗子味道比較淡，要dap真啲先會食得出；而咖啡吉士味道就相對上比較出，整體食落會比較似咖啡忌廉包XD

🔎《黑白大廚》參賽者餐廳總整理

52. 麥當勞Grimace Shake_(2024.10.28)

購買地點：韓國麥當勞

價錢：₩3,200

推薦指數：3.5/5

呢款奶昔本身係美國麥當勞先有嘅Menu，今次喺韓國麥當勞限定推出！Grimace Shake其實就係野莓味奶昔，飲落去藍莓味比較濃，味道冇想像中咁人工咁甜！

51. 杜拜朱古力牛角包_(2024.10.14)

購買地點：GS25

價錢：₩4,800

推薦指數：3.5/5

韓國嘅杜拜朱古力熱潮仍然未減退XD 各大便利店都不斷推出相關商品，而最近GS25就出咗呢款牛角包！牛角包外面有一層黑朱古力，而入面就係開心果醬+土耳其kadayif麵，口感脆卜卜咁幾特別。最令小編驚訝嘅係佢唔會太甜，不過始終係便利店牛角包，所以麵包部分偏腍，但係都值得一試！

50. 限量版可口可樂味Oreo_(2024.09.26)

購買地點：GS25

價錢：₩2,000

推薦指數：4/5

外國成日都會推出各種特別口味嘅Oreo，最近韓國居然都有得買可樂味嘅Oreo！首先一打開包裝真係會聞到勁大陣可樂味XD 雖然聽落兩樣嘢唔係好夾，但係比小編想像中好食好多，有少少似檸樂味！而且大家可以見到cream入面有一粒粒紅色嘢，睇成分表suppose應該係爆炸糖，不過就冇點feel到爆炸嘅感覺，如果唔係應該會更加似可樂！呢款Oreo係限量版，如果大家見到記住一定要把握機會買嚟試啦~

49. Pringles品客香辣忌廉辣炒年糕味薯片_(2024.09.16)

購買地點：emart

價錢：₩3,380

推薦指數：2.5/5

小編最近成日見到呢款薯片嘅廣告，聽講香辣忌廉辣炒年糕味得韓國先有，咁啱俾小編喺超市見到有就即刻買咗返嚟試！雖然個筒上面寫到好似好辣咁，不過唔食得辣嘅小編都覺得冇咩感覺XD 另外比起辣炒年糕味，小編個人覺得反而忌廉/芝士味更加濃，整體嚟講就係芝士+最後少少辣味，冇咩特別...

48. Tongtonge杜拜朱古力曲奇_(2024.09.02)

購買地點：CU

價錢：₩3,600

推薦指數：3/5

最近杜拜朱古力喺韓國真係勁紅XD 杜拜朱古力入面係開心果醬+土耳其kadayif麵，而韓國人當然唔執輸，陸續推出開心果&朱古力配搭嘅甜品。而呢款Tongtonge新口味曲奇就係一塊牛油曲奇上面放一篤開心果醬+土耳其kadayif麵，外面淋一層牛奶朱古力。講真個句，食落去朱古力味佔9成，要嗒真啲先會食到開心果陣果仁香味，不過口感脆卜卜咁幾過癮！

47. 蘋果堂蘋果奶茶_(2024.08.19)

購買地點：GS25

價錢：₩2,700

推薦指數：2.5/5

蘋果堂/APPLEDANG（사과당）係韓國一間蘋果甜品專賣店，最出名食蘋果批！最近佢哋喺GS25推出咗呢款蘋果奶茶，一打開樽蓋就會聞到一陣蘋果味，但係飲落去嘅時候可能因為香精味道太濃，小編個人覺得比起蘋果味更加似香蕉奶...？

46. 卡樂B朱古力味薯片_(2024.08.05)

購買地點：各大便利店及超市

價錢：₩2,000

推薦指數：3/5

朱古力味嘅薯片...小編喺超級市場見到即刻買咗返屋企試XD 呢款薯片味道鹹鹹甜甜，不過甜味佔85%、鹹味佔10%，仲有5%係可可粉嘅苦味！聽落好似好怪咁，但係反而呢陣苦味令薯片食落冇咁漏，仲更加特別！如果唔抗拒鹹甜配搭嘅朋友們可以去試試！

45. 辣炒年糕醬雞蛋_(2024.07.22)

購買地點：GS25

價錢：₩3,500

推薦指數：3.5/5

辣炒年糕嘅精華梗係粒蛋啦！覺得食辣炒年糕太邪惡，不如試吓呢款辣炒年糕雞蛋~ 打開包裝入面有超多辣炒年糕醬同2粒全熟蛋，醬汁同大家平時食開嘅辣炒年糕一模一樣（小編個人覺得偏甜唔太辣）。成包嘢係252卡路里，想過吓口癮，不妨可以買嚟食！

44. 延世牛奶味爆谷_(2024.07.08)

購買地點：CU

價錢：₩1,800

推薦指數：3/5

延世牛奶出出吓忌廉包同蛋糕，而家居然出埋爆谷！小編個人覺得呢款爆谷唔算好甜（甜度大約介乎於齋爆谷同焦糖爆谷之間），有淡淡地嘅牛奶味，不過就唔係太特別，睇戲嘅時候食應該會唔錯！

43. 延世希臘乳酪忌廉包_(2024.06.24)

購買地點：CU

價錢：₩2,900

推薦指數：3.5/5

希臘乳酪係最近好多韓國人都會為咗減肥+食得健康啲而選擇嘅乳製品，今次延世都跟上潮流，推出用延世牛奶整成嘅希臘乳酪忌廉包，麵包更加用上健康嘅麥包！因為通常希臘乳酪都係酸味比較重，所以小編一開頭expect呢款忌廉包唔會甜XD 不過實際上食落口感同味道同普通忌廉差唔多，而且真係會食得出乳酪味！小編個人覺得有少少太甜，不過同事們全部都一致好評，大家可以放膽買嚟試！

42. Corn Chip雪糕_(2024.06.10)

購買地點：GS25

價錢：₩2,000

推薦指數：3/5

首先呢款雪糕係好似唧唧冰咁嘅形態，不過入面係比較綿密嘅粟米味雪糕！Corn Chip本身係鹹甜鹹甜嘅味，雪糕版就冇還原到呢個感覺，但係仍然係好食嘅粟米味雪糕~（不過鍾意食粟米同鍾意食粟米味雪糕係兩回事，小編個人覺得唔錯，但係有幾個同事就覺得怪怪哋XD）

41. MEGA COFFEE 雪碧美式咖啡_(2024.06.05)

購買地點：MEGA COFFEE

價錢：₩2,700

推薦指數：1.5/5

韓國之前曾經有段時間好興飲蜜桃冰茶+咖啡，今次居然係雪碧加咖啡！小編都係第一次知原來雪碧加咖啡會好似上面張相咁分開兩層，飲落去第一啖係咖啡嘅苦味，之後就會飲到雪碧嘅酸味，仲要係有氣嘅，小編同同事都一致認為唔太好飲，但係好多韓國人都話覺得OK...？鍾意挑戰特別飲品嘅話有機會可以試，不過小編就覺得可一不可再啦XD

40. BAKEHOUSE405 曲奇牛角包_(2024.05.27)

購買地點：CU

價錢：₩3,500

推薦指數：2.5/5

曲奇牛角包最近喺韓國勁紅，如果係新鮮出爐嘅話就可以同時食到軟熟曲奇同脆口牛角包！不過便利店版就...當然還原唔到呢種感覺啦。同普通便利店麵包一樣，牛角包部分係腍嘅，不過令人驚訝嘅位係牛角包入面仲有曲奇餡，所以整體感覺似係口感係牛角包但係味道係朱古力曲奇味咁！

39. 零糖美式咖啡伯爵茶_(2024.05.13)

購買地點：GS25

價錢：₩2,500

推薦指數：3.5/5

美式咖啡同伯爵茶呢兩款飲品小編都會飲，但真係冇諗過要溝埋一齊飲XD 一打開樽蓋首先會聞到伯爵茶味，飲落去係美式咖啡味，最後仲會有淡淡地嘅伯爵茶佛手柑香味，成件事超神奇，但係一啲都唔怪！而且因為無糖，所以完全唔甜，卡路里都只係得10kcal！如果鍾意飲咖啡嘅話不妨可以趁而家買一送一嘅時候試！

38. 三角抹茶吉士包_(2024.04.29)

購買地點：CU

價錢：₩3,200

推薦指數：4/5

有包裝紙嘅時候睇落只係一個普通三角形嘅包，但係原來佢真係好似一個三角飯糰咁有塊紫菜仔（同NUDAKE有幾分似XD）！小編一開始以為應該得個睇字，但係比想像中好食好多！外面層包係都幾香牛油味嘅牛角包，入面啲Cream好夠，食到最後一啖都有！雖然抹茶味唔算好濃，不過小編反而覺得會有更多人鍾意食！

37. Baskin Robbins 31 芥末味雪糕_(2024.04.15)

購買地點：Baskin Robbins

價錢：₩3,900

推薦指數：2.5/5

呢款Wasabi味雪糕本身只可以喺指定分店食到，不過最近擴張到全韓國所有BR雪糕分店都買得到！最搞笑係小編去買嘅時候職員語重心長咁同小編講咗句：小心會好攻鼻，唔好食咁大啖XD 比起似係雪糕加Wasabi，佢似係雪凍嘅Wasabi加少少甜味，連小編日本同事都覺得太濃，如果你真係好鍾意食Wasabi都可以去試試~

我都想食韓國BR雪糕🍧

36. 貢茶辣炒年糕_(2024.04.01)

購買地點：貢茶

價錢：₩7,300

推薦指數：4/5

今年愚人節貢茶推出咗呢款辣炒年糕XD 一開始小編見到係用珍珠整嘅辣炒年糕都打咗個突，不過比想像中好食好多，小編同同事們都一致覺得醬汁同口感仲好食過普通辣炒年糕！不過缺點就係價錢比較貴，而且一定要連飲品一齊買...呢款辣炒年糕仲有麻辣味，如果大家呢排會喺韓國，真係好推薦大家去試！

35. 延世士多啤梨香蕉忌廉包_(2024.03.18)

購買地點：CU

價錢：₩2,900

推薦指數：2.5/5

小編其實成日都覺得水果味嘅甜品都好容易伏（因為好容易會有藥水味），而今次呢款忌廉包就正正出現咗呢個問題！忌廉係正常嘅香蕉奶味，不過下面嗰層士多啤梨果醬味道就有少少假，而且整體嚟講都幾甜吓，有少少失望..

34. ISAAC TOAST 牛油麵包脆片_(2024.03.04)

購買地點：GS25

價錢：₩2,000

推薦指數：4/5

講起韓國街頭小食一定唔少得ISAAC TOAST！呢款多士脆片牛油味勁重，而且超脆口，小編食第一嚿嘅時候幾驚艷！另外平時呢種麵包片調味都會偏甜，但係呢款唔會太甜，好快就食完一包！

33. 1983元祖蜂窩煤麵包_(2024.02.19)

購買地點：CU

價錢：₩3,600

推薦指數：2/5

如果叫小編用一句句子概括今日嘅食評，將會係「得。個。睇。字。」呢款麵包唯一優點係入面嘅雲呢拿吉士醬都算多，而且唔甜，不過衰在麵包太乾（同太貴），呢個價錢小編寧願去麵包鋪買個普通麵包食XD

32. 農心明太魚乾青陽辣椒沙律醬杯麵_(2024.02.05)

購買地點：GS25

價錢：₩2,000

推薦指數：4/5

農心明太魚乾味脆條早前喺韓國掀起一股熱潮，小編到而家都未見過呢款零食嘅真身... 佢哋最近就推出咗同款味嘅杯麵，雖然白雪雪咁睇落味道唔濃，但係其實比想像中辣！味道係青辣椒+沙律醬+零食(?)味，小編同事話同本身款零食真係一樣味，而小編本身個人都覺得味道唔差！如果大家有機會喺便利店見到佢，不妨都可以買嚟試，可能會有驚喜XD

31. 三立青瓜包_(2024.01.22)

購買地點：CU

價錢：₩2,200

推薦指數：2.5/5

今次係史無前例第一次同分，所以會有多一款零食嘅食評！青瓜通常都係凍/室溫咁食，真係唔知係邊個將佢同蒸包結合埋一齊。不過坦白講，其實味道比想像中易接受，而且比起青瓜，小編食嘅時候覺得比較似西瓜味（但係去到小編而家寫文嘅時候個口都仲有陣青瓜味...）。鍾意試新嘢嘅話可以買嚟試一次，不過真係一次就好XD

30. 延世忌廉包曲奇忌廉味_(2024.01.22)

購買地點：CU

價錢：₩3,300

推薦指數：4/5

鍾意食Oreo雪糕嘅你一定唔可以錯過！呢款延世忌廉包一打開個包裝就聞到勁香Oreo味，雖然外面層曲奇皮係腍嘅，不過包入面嘅Cream量同味道可以搭救返！但係因為都幾甜吓，所以有啲朋友可能會覺得有少少漏，但係整體嚟講係值得推薦嘅，大家有機會見到可以買嚟試！

29. 幸運藥果蜜糖雪條_(2024.01.08)

購買地點：GS25

價錢：₩2,000

推薦指數：3/5

小編本身以為藥果只會紅一排就完，冇諗過去到而家都仲有咁多新產品！呢款幸運藥果蜜糖雪條藥果味唔算重，不過就可以咬到有一粒粒嘅藥果！但係出面層朱古力脆皮味道比較出，亦都比較甜，所以唔太推薦俾唔鍾意食甜嘢嘅朋友們！

 韓國爆紅藥果

28. 延世牛奶綠茶朱古力杯裝蛋糕_(2023.12.18)

購買地點：CU

價錢：₩4,200

推薦指數：4/5

呢款蛋糕係小編食過咁多款延世甜品之中覺得最好食嘅一款！平時坊間好多綠茶/抹茶甜品都係得個色，味道通常都唔會好濃，不過呢款蛋糕嘅忌廉真係超濃抹茶味，甚至會回甘（不過如果唔鍾意食抹茶味甜品嘅話可能會覺得太苦）！蛋糕係朱古力味，最入面更加有一層朱古力味忌廉，不過完全唔會甜！如果大家好彩見到嘅話記住一定要買嚟試啦！

27. Greek Day 希臘乳酪雪糕三文治_(2023.12.04)

購買地點：GS25

價錢：₩2,500

推薦指數：3.5/5

平時希臘乳酪嘅酸味都會比一般乳酪少，可能係因為咁，所以呢款雪糕第一啖乳酪味都算重，不過之後食落去嘅時候比起乳酪酸味，會比較似牛奶味！而且佢只係155卡路里，仲係低糖唔太甜，啱曬注重健康/減緊肥，但又突然想食雪糕嘅朋友！

26. 薯仔麻糬串_(2023.11.20)

購買地點：CU

價錢：₩3,500

推薦指數：3/5

小編自己都分別鍾意食薯仔同麻糬呢兩樣嘢，但係就真係冇諗過韓國人會將佢哋mix埋一齊整甜品XD 呢款麻糬串望落真係好似薯仔，出面嘅年糕係甜嘅，而入面就係鹹鹹地帶少少胡椒味嘅薯蓉。比起薯仔味，係個口感比較似薯仔，反而胡椒味仲出啲，整體嚟講甜多過鹹。小編個人覺得佢唔係必食，不過如果好奇嘅話買咗都唔會覺得好失望。

25. 春植蕃薯雪糕三文治_(2023.11.06)

購買地點：GS25

價錢：₩2,500

推薦指數：2.5/5

春植嘅魅力真係沒法擋XD 今次呢款春植雪糕係蕃薯味，雪糕同威化餅中間有一層蕃薯蓉，因為雪硬咗所以口感會變煙韌！但係小編同同事都一致認為蕃薯味有啲太假，有少少失望（不過入面有1張超cute春植貼紙，都算慰藉到小編嘅心靈XD）

24. Ankokoanko紅豆牛油糯米糍_(2023.10.23)

購買地點：CU

價錢：₩3,300

推薦指數：4/5

呢款甜品真係出乎意料之外地好食！通常呢種冷藏嘅糯米糍都會好硬，不過佢就勁煙韌！而且因為係用無鹽牛油，有牛油香得嚟可以中和返紅豆蓉嘅甜，如果鍾意食年糕類甜品嘅話推薦大家一定要買嚟試！

23. 橋村BLACK秘製拌麵_(2023.10.11)

購買地點：GS25

價錢：₩2,300

推薦指數：2/5

呢款睇落以為係炸醬即食麵味，點知原來係五香味！佢好有中式料理嘅感覺，就好似花椒八角味勁重嘅鹵水味咁，亦都比較鹹，建議唔食得麻嘅朋友們唔好試（小編自己都唔會想回購XD）！配埋甜甜地嘅蜂蜜炸雞可能可以中和到，不過小編個人認為炸雞都係就咁食啦~

22. 三立LENINI大葱忌廉芝士包_(2023.09.25)

購買地點：CU

價錢：₩2,000

推薦指數：3/5

呢款蒸包嘅包裝真係好cute，小編一行入便利店見到佢即刻雙眼發曬光XD 平時韓國呢啲蒸包都會係紅豆、蕃薯餡，呢款居然係大葱忌廉芝士！一搣開個包就聞到超大陣葱味，食落去忌廉芝士嘅甜味重過大葱嘅鹹味，質地有少少似奶黃包。（不過要小心食完會成嘴葱味XD）入面仲有一個貼紙仔，係勁cute嘅LENINI~

21. SKINNY PIG 朱古力奶昔_(2023.09.11)

購買地點：GS25

價錢：₩3,000

推薦指數：4/5

身為為食小編，有時候真係要好好控制吓飲食XD 不過有時候口痕都想食零食同雪糕，今次小編就搵到呢款朱古力奶昔/雪糕，食完一個都先係85卡路里！雖然佢卡路里低，但係朱古力味好濃，仲唔太甜，可以零罪惡感咁食雪糕真係好正！

20. 不倒翁嫩豆腐辣海鮮湯麵_(2023.08.28)

購買地點：CU

價錢：₩2,500

推薦指數：3.5/5

呢款辣海鮮湯麵係不倒翁公仔麵嘅經典口味之一，今次全新推出加埋嫩豆腐嘅版本！一煮好真係超香（吸引到小編唔少同事出嚟話想食返啖XD），湯底比起平時嘅辣海鮮湯麵冇咁辣，不過比起聞落嘅味，食落去就比較平平無奇。而因為豆腐味都幾出，所以平時鍾意食豆腐嘅朋友應該會幾愛呢款即食麵~ 建議大家如果有微波爐，可以加熱水之後放入去叮，咁煮嘅話麵會腍中帶少少煙韌，口感會更加好！

19. 三養麻辣紅薯寬粉_(2023.08.14)

購買地點：GS25

價錢：₩3,500

推薦指數：4/5

近呢幾年紅薯寬粉同麻辣味嘢食喺韓國真係好受歡迎，今次三養出嘅呢款麻辣紅薯寬粉就正中韓國人下懷！麻辣味夠濃，而且唔係齋辣味，花椒味都真係好重，而且紅薯寬粉都夠煙韌，對食得辣嘅朋友嚟講真係好唔錯，不過建議大家可以叮耐啲！

18. 延世濟州凸頂柑忌廉包_(2023.07.31)

購買地點：CU

價錢：₩3,400

推薦指數：4/5

延世忌廉包又出新味，今次係凸頂柑味！呢款忌廉包本身只係濟州限定，不過因為反應太熱烈，所以而家全韓國都買到啦！因為有好多韓國網友都大讚，所以小編都好期待！可能因為入面有一層柑橘味吉士，所以整體味道比其他口味清新同唔甜~ 出面有一層曲奇，令個包望落更似一個柑，不過無可避免地啲曲奇已經腍咗。但係除咗呢個問題，小編都覺得好好食，值得買嚟試！

17. GS25豬肉湯飯即食麵_(2023.07.17)

購買地點：GS25

價錢：₩2,000

推薦指數：3/5

豬肉湯飯係釜山代表美食之一，呢次GS25自家品牌推出咗即食麵版，搞到小編好期待！其實佢唔難食，而且仲有韭菜同辣味調味粉，還原返喺釜山食豬肉湯飯嘅感覺！不過比起係豬肉湯飯味，應該話係平時都會食到嘅嗰種豬骨湯底即食麵嘅味道，喺呢方面就令人有少少失望啦。

16. LALASWEET低卡紅豆雪糕三文治_(2023.07.03)

購買地點：CU

價錢：₩3,300

推薦指數：4.5/5

相信有好多人都鍾意食雪糕但怕肥，但係呢款雪糕三明治食完成嚿都先170卡路里，任食都唔會有罪惡感！而且比起其他雪糕，呢款冇咁甜，而且牛奶味都好出，唔話你知係低卡食品應該都食唔出！不過紅豆相對比較少，所以鍾意食紅豆嘅朋友們可能會有少少失望，但係整體嚟講非常高質！

15. 春植彩虹味粒粒雪糕_(2023.06.19)

購買地點：GS25

價錢：₩2,000

推薦指數：3/5

小編細細個去冒險樂園都會食粒粒雪糕，但係大個之後就好少見到香港有得賣。今次春植聯同dippin' dots推出嘅呢款粒粒雪糕真係令人勾起到童年回憶！所謂嘅彩虹味其實係橙味、菠蘿味、蜜瓜味同香印青提味，酸酸甜甜咁，不過講真食落去唔會feel得出咁多種水果味XD 最下面仲有一層菠蘿味嘅冰沙，夏天食真係夠曬透心涼~ 不過因為係粒粒雪糕，所以食嘅時候會有少少麻煩，仲有機會食到周圍都係，所以就減咗少少分啦！

14. 三湖魚糕湯_(2023.06.05)

購買地點：CU

價錢：₩3,900

推薦指數：4.5/5

大家果然介紹得冇錯啊！呢款魚糕湯入面有6嚿魚糕+1嚿蒟蒻，湯飲落同街邊賣嘅差唔多，而且鹹淡適中！不過同香港嘅魚蛋唔同，呢款魚糕比較腍身，可能有朋友會覺得口感唔太好。呢個價錢可以喺便利店買到咁高質嘅魚糕都真係幾抵~ 小編覺得非常值得encore！

13. 春植士多啤梨刨冰_(2023.05.22)

購買地點：GS25

價錢：₩3,500

推薦指數：1.5/5

呢款刨冰最上面係一層士多啤梨糖漿同急凍士多啤梨粒，下面一層士多啤梨奶刨冰，最下面仲有一層鮮奶刨冰。用呢個價錢可以食到刨冰係抵嘅，而且上面都有幾多士多啤梨粒！不過最可惜嘅係佢層士多啤梨糖漿有藥水味，所以令整體都變得唔好食，有少少失望...

12. 蠟筆小新麻糬烏冬_(2023.05.08)

購買地點：CU

價錢：₩5,500

推薦指數：3/5

呢款烏冬係醬油柴魚湯底，食落味道唔錯！烏冬雖然唔夠彈牙，但係嚿麻糬真係好煙韌～不過美中不足嘅地方係麵同麻糬有種分開嘅感覺，唔可以話好夾。

11. 焗烤芝士粟米_(2023.04.24)

購買地點：CU

價錢：₩5,300

推薦指數：4.5/5

粟米芝士呢個組合應該冇人會唔鍾意！小編當時只睇包裝已經好好奇，佢一盒粟米會連埋一包芝士，大家打開盒之後再放芝士叮2分鐘撈勻就食得，味道調味得啱啱好，仲會有少少拉絲，加罐啤酒一齊食就一流！不過可惜份量唔算多，相對嚟講價錢會覺得有少少貴。

10. 蠟筆小新小白牛奶布甸_(2023.04.10)

購買地點：GS25

價錢：₩3,500

推薦指數：4.5/5

最近唔少便利店都蠟筆小新聯名嘅零食/主食，今次小編終於試到佢哋嘅牛奶布甸，牛奶味好重，質地好滑，不過小編個人覺得偏甜咗少少，可能會食到最後會有少少漏...但以￦3,500呢個價錢嚟講，絕對值得買一杯嚟試吓！

9. 白種元雙拼炒辣雞便當_(2023.03.27)

購買地點：CU

價錢：₩4,900

推薦指數：2/5

因為呢款便當係韓國美食專家白種元出嘅餐品，所以令小編食之前都好期待！呢個飯盒入面有一款辣、一款唔辣嘅雞扒、白飯、泡菜、芽菜，仲有一嚿雞蛋卷同午餐肉。不過因為個盤比較淺，所以分量其實唔多，男仔食應該就唔夠飽啦。

味道方面，兩款炒雞都偏甜，小編個人覺得辣個款炒雞比較好食，而唔辣個款有少少似香港兩餸飯嘅味。其他配菜都中規中矩，但係唔可以話好好食，所以呢個便當好似唔係好值得₩4,900。

8. BELOW忌廉可麗露_(2023.03.13)

購買地點：GS25

價錢：₩3,500

推薦指數：4/5

呢款甜品有驚喜！首先平時要去專門嘅飽舖餅店或者Cafe先會買到嘅可麗露居然喺便利店都可以買到，卡路里仲要唔高，兩個都先係₩3,500（港幣$21），超加分！

味道方面，可麗露外皮特有嘅脆脆地嘅口感同焦香味都足，咬落去外脆內煙韌，就算加埋中間啲cream都唔會話太甜~ 打破咗小編對呢啲好似淨係賣gimmick嘅產品嘅偏見！大家最近會嚟韓國嘅話不妨買返個嚟食啦！

7.Giant炒年糕即食麵/筋麵_(2023.02.27)

購買地點：CU

價錢：₩3,300/個

推薦指數：2.5/5

呢款辣炒年糕本身就係因為辣而出名，所以小編試之前都有少少擔心。今次佢哋仲同時推出拉麵版同筋麵版，睇落都好吸引~

首先筋麵版嘅麵口感非常煙韌，配埋年糕真係好夾！而拉麵版方面，小編因為怕會好辣，所以淨係落咗半包醬，但係連韓國人都覺得好辣（不過聽講辣雞麵會更加辣..）！小編同朋友都一致認同筋麵版更加特別同好食，自問食得辣嘅朋友可以買嚟挑戰吓~

6. BEURRE奶油啤酒 AAA+_(2023.02.13)

購買地點：GS25

價錢：₩6,500

推薦指數：1/5

呢款啤酒聞落去真係有牛油同雲呢拿味，不過飲嘅時候唔係好出。個人認為呢陣味應該唔係個個都會接受到，小編就寧願用呢個價錢買普通啤酒+下酒菜啦~

5. 辣雞玫瑰醬炒年糕_(2023.01.30)

購買地點：CU

價錢：₩3,500

推薦指數：3/5

辣雞麵聽就聽得多，但年糕你又試過未？CU出咗玫瑰醬呢個經典口味！

呢款年糕叮完之後要加一包芝士粉，撈完真係勁香！平時辣雞麵俾人感覺好辣，不過因為有芝士粉中和返，所以都還可以接受！年糕都算煙韌 ，不過唔太入味，整體嚟講因為唔係太特別，所以唔可以話好推薦，不過平時驚辣雞麵太辣嘅朋友可以由呢款開始試！

4. 辣味烤豬大腸_(2023.01.16)

購買地點：GS25

價錢：₩6,800

推薦指數：4/5

平時食豬大腸可能好多時都要2人份起，但如果自己一個嚟，叫2人份覺得太多，小編推薦大家去便利店買呢盒辣味烤豬大腸！一盒₩6,800，超適合當下酒菜！

3. 兔子停明太子忌廉意粉_(2023.01.02)

購買地點：CU

價錢：₩5,500

推薦指數：4/5

兔子停喺韓國係一間好出名嘅連鎖店，雖然只聽名大家未必會知邊一間，但只要講到忌廉咖哩烏冬，大家可能都會有啲印象，想當年真係好hit，直到而家都仲有唔少人會慕名而去。

今次小編見到便利店出兔子停明太子忌廉意粉都覺得好好奇。麵雖然唔係意粉口感，但係好煙韌，而且忌廉醬同明太子好夾，雖然比唔上餐廳嘅味道，但以便利店嘢食嘅質素嚟講算係好高！

2. Breadique牛奶忌廉包_(2022.12.19)

購買地點：GS25

價錢：₩2,500

推薦指數：3/5

唔知大家知唔知最近韓國便利店好hit延世大學忌廉包呢？不過小編一直都搵唔到，最後喺GS25搵到呢個牛奶忌廉包，諗住試吓有冇分別！

個包入面有好多Cream，好有罪惡感，食落有啲甜，不過奶味唔重。問到值唔值得買，小編覺得還好，但鍾意食Cream嘅朋友可以買嚟過吓口癮！

1. 士多啤梨酥皮三文治_(2022.12.05)

購買地點：CU

價錢：₩3,400

推薦指數：3/5

韓國只要一到冬天就係士多啤梨季節，今次CU就同Young Forest聯名推出咗士多啤梨三文治，淨係睇包裝都已經覺得好吸睛，加上佢仲送可愛貼紙，真係好吸引！

呢個酥皮三文治入面好多Cream同新鮮士多啤梨，不過有啲可惜係口感唔似酥皮，反而似香港嘅排包，但鍾意食甜嘢或者Cream嘅朋友都可以試吓！但怕漏嘅朋友就唔太推薦啦！

每2星期小編就會去一間便利店等大家投票，如果大家都想知其他最真實食評，咁就要follow我哋IG啦！所有食評都會擺喺Highlight度，大家可以再參考返，同時呢篇Blog亦會定期更新！如果有啲想小編試嘅食物/飲品，歡迎留言話俾我哋知！

冇韓國電話點book枱好？

韓國餐廳代客預約服務

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購