logo

香港入境韓國最新政策(2023.07更新)

港澳入境韓國政策又有嘢改!嚟緊入境韓國更輕鬆?

유키
9 months ago

Hello,大家好,我哋係由韓國人每日提供最新韓國旅行資訊嘅Creatrip


根據韓國政府喺1月3號發表嘅最新指引,由2023.01.07起香港同澳門入境韓國政策再次收緊,到底入境前有咩需要注意?


- 最新消息-(2023.07.13)

韓國政府今日宣佈,由2023.07.15開始,入境韓國人士唔再需要整Q-CODE,亦無需填寫健康狀態問卷。


- 最新消息-(2023.03.29)

根據韓國政府最新消息,由2023.04.01開始,所有入境韓國嘅港澳人士都唔再需要整K-ETA。


- 最新消息-(2023.03.08)

根據韓國中央防疫對策本部最新指示,由2023.03.11開始,所有入境限制將會正式解除,由港澳入境韓國人士唔需要提交任何COVID-19檢測報告,Q-CODE亦恢復為自願填寫。


- 最新消息-(2023.02.22)

根據韓國中央防疫對策本部最新指示,強制提交出發日48小時前核酸陰性報告同辦理Q-CODE嘅政策將會延長至2023.03.10,其後將會根據狀況決定會否完全解除上述限制。


- 最新消息-(2023.01.11)

由2023.01.10起至2023.02.28,所有由香港及澳門前往韓國人士均需要由仁川國際機場入境,並禁止直接喺仁川國際機場轉機前往其他城市。



由港澳入境韓國注意事項(2023.01.07起)

1. 入境前需要提交出發日48小時前核酸陰性報告

연합뉴스


自從韓國放寬入境政策之後,港澳人入境韓國都唔需要再額外提交陰性報告。但係由於內地最近開關,韓國政府上個禮拜亦宣佈會收緊中國旅客入境政策,所以變相有好多中國人會喺香港轉機前往首爾。加上香港最近確診人數同死亡人數亦不斷增加,最後決定香港同澳門入境人士都需要提交出發日48小時(2日)前PCR陰性報告或者24小時(1日)前由專家進行嘅快速抗原測試陰性報告。

(例:如果飛機起飛時間為1月10號14:00,你需要提交1月8號00:00之後做嘅PCR陰性報告 OR 1月9號00:00之後由專家進行嘅快速抗原測試陰性報告)



2. 必須辦理Q-CODE

해외문화홍보원


之前入境韓國,Q-CODE都只係一個可以令過關速度變快嘅途徑。但由1月7號開始,喺香港或者澳門入境韓國都必須要喺登機前事先去官網(撳我)輸入所需資料,整好Q-CODE先可以出發!



3. 其他注意事項?

연합뉴스


好彩港澳人士入境之後仍然唔需要進行強制檢測,不過同之前一樣,而家免簽證入境韓國都需要事先申請K-ETA,打算嚟韓國玩嘅朋友們記住要留意啦!


  K-ETA代辦服務


港澳入境韓國FAQ

*最新入境政策(2023.01.10)相關FAQ*

Q. 可唔可以喺仁川機場搭KTX去其他地方?

A:可以。所有喺港澳前往韓國嘅旅客喺仁川機場完成入境程序之後,可以搭KTX或者其他交通工具去其他地方。


Q. 可唔可以喺仁川機場入境之後,搭去金浦機場轉內陸機去釜山/濟州等其他城市?

A:目前為止原則上可以!根據韓國政府指引,所有喺港澳前往韓國嘅旅客必須先喺仁川機場完成入境程序,其後可以搭KTX或者其他交通工具前往金浦機場搭內陸機去其他城市。要注意嘅係唔可以直接喺仁川機場轉機


Q. 我嚟緊打算去釜山/濟州等地方,咁到底仲去唔去到?

A:相信而家所有香港、澳門直飛釜山同濟州嘅班機都已經全部取消曬,不過正如上面所講,大家可以搭KTX或者去金浦機場搭內陸機去其他城市,只要大家注意唔好買喺仁川機場轉機嘅機票就得,唔需要太擔心。


Q. 去釜山/濟州等地方洗唔洗做PCR?

A:根據韓國政府指引,無論最終目的地係邊度,所有喺香港同澳門入境韓國嘅旅客都需要提交陰性報告。


Q. 如果我由釜山/濟州等地方搭飛機返去首爾得唔得?/ 如果我而家已經喺首爾,嚟緊打算去其他地區玩得唔得?

A:因為今次收緊嘅政策淨係適用於新入境韓國人士,所以如果你已經完成咗入境手續,其實已經不受此限,可以照常搭飛機或者其他交通工具。


Q. 我係由其他國家飛韓國,係唔係都一定只可以喺仁川機場落機?

A:政策只針對喺香港同澳門入境韓國嘅旅客,所以要視乎韓國有冇對你出發嘅地區發出任何入境指引,詳情請查詢當地領事館。




Q. 可唔可以做快測?

A:根據韓國政府指引,喺香港同澳門入境嘅旅客都需要提交陰性報告(出發日48小時內PCR核酸檢測 OR 24小時內喺診所或者醫院進行嘅快速抗原測試)。所以原則上可以做快測,但要注意自己私下做嘅快測結果並冇任何效用。


Q. 係唔係一定要做俾錢嘅PCR?/ 用SMS收到嘅陰性結果得唔得?

A:只要你做嘅PCR會有一份完整報告(電子版/紙本),上面有註明你嘅姓名、出生日期、護照號碼、檢測方法、檢測日期、檢測結果、檢測機構名同出報告日期就得,到時候大家申請Q-CODE嘅時候亦都需要將呢份報告上傳到系統度,所以比起SMS結果,強烈建議大家一定要攞到完整報告!


Q. 有冇話只接受邊間機構嘅PCR結果?

A:韓國政府冇特別指定要去邊間機構做,所以大家去社區檢測中心自費做都冇問題(記住一定要攞到報告啊)!


Q. 幾歲先要做PCR?

A:根據指引,未滿6歲人士唔需要提交PCR陰性報告。


Q. 我係香港人,但係喺另一個地方出發去韓國,咁洗唔洗做PCR?

A:今次收緊嘅政策只適用於喺香港同澳門入境嘅旅客(與國籍無關)。


Q. 入境之後洗唔洗再做PCR?

A:暫時喺香港同澳門入境嘅旅客到韓國之後唔需要再做PCR。


Q. 如果喺韓國轉機洗唔洗做PCR?

A:根據韓國政府指引,喺香港同澳門乘搭前往韓國嘅班機嘅乘客(無論係入境定轉機)都需要提交陰性報告。[持有檢測豁免確認書人士、當值機艙服務員及未滿6歲小童豁免]


Q. 離開韓國嘅時候洗唔洗做PCR?

A:入境香港需要跟返香港政策,所以詳情請參考返香港政府指引。


Q. 香港去韓國免簽證,咁係唔係K-ETA同Q-CODE兩個都一定要整?

A:首先K-ETA係韓國政府針對免簽證入境人士實行嘅電子旅行許可制,所有免簽證人士(例如香港人)入境韓國之前都需要辦理好K-ETA先可以入境。而Q-CODE就係一個俾入境人士事先輸入所有個人資料同申報身體狀況嘅系統,填好之後會出一個QR CODE,入境嘅時候出示就可以快啲過到關。本身入境人士可以自由決定整唔整Q-CODE,不過今次收緊政策之後,喺香港同澳門出發嘅旅客必須要辦理好Q-CODE先可以入境,大家要留意啦!


Q. K-ETA同Q-CODE幾時要申請?

A:K-ETA通常申請後約3日之內就會批,不過視乎情況可能需要更長時間,建議大家可以出發前3-5日前申請。而Q-CODE就只要喺登機前整好就可以啦!


Q. K-ETA同Q-CODE有效期去到幾時?

A:K-ETA有效期為2年,而Q-CODE只可以用一次,所以每次入境韓國都需要重新整一個新嘅Q-CODE。


隨著各國疫情放緩,越嚟越多地方開始開關,出入境政策真係話變就變!有任何最新消息,小編會第一時間整理好再通知大家!有任何問題亦都可以留言或者Instagram DM我哋,希望大家都可以順順利利嚟到韓國玩啦!




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代購

熱門文章

LoadingIcon
熱門文章