對韓國人嚟講11個幸運象徵
對韓國人嚟講11個幸運象徵，點解考試前要食麥芽糖？夢見豬就要買樂透？
Hello，大家好，我哋係由韓國人每日提供最新韓國旅行資訊嘅Creatrip。
今日想同大家分享一下11個關於韓國幸運嘅意思，唔知大家本身又知幾多個呢？
對韓國人嚟講11個幸運象徵
1. 2隻手指交叉
喺韓國如果將食指同中指交叉，即係代表祝你好運咁解，好多人都話呢個符號係基於基督教，因為睇落有啲似係十字架，另外都有人話佢似係幸運花嘅花瓣。
2. 符
呢個其實都類似香港護身符，通常呢啲符都有兩個作用，一係求好運，二係辟邪，多數貼喺牆或門到。
3. 蓮花
蓮花係韓國佛教嘅吉祥象徵，雖然蓮花生活喺沼澤入面，但佢嘅花瓣好乾淨，被人認為係純潔、財富、長壽同好運嘅代表。
4. 麥芽糖
麥芽糖主要原料係用咗糯米、大麥、生薑、南瓜等去整，味道好甜，而且好粘，令人一試難忘，韓國人相信食咗佢會帶嚟好運，所以唔少學生喺考試之前，都會食啲甜嘢。
5. 豬
唔少韓國人覺得豬係幸運象徵之一，豬代表幸運、財富同繁榮，如果發夢見到代表會有好事發生，通常第二日韓國人都會去買樂透（六合彩）。
6. 數字3、8、9
韓國同香港一樣，認為數字「4」唔吉利，相反佢哋覺得3、8、9係一個好數字，如果之後買禮物俾韓國朋友，大家都要識揀啦！
7. 大便圖案
雖然聽落好似有啲奇怪，但韓國人認為大便係幸運符號之一，特別係如果發夢夢到，即係嚟緊會有好事發生，因為自古以嚟，農夫經常用糞便種植農作物，幫助佢哋成長同更豐盛，之前仁寺洞就有一間專賣大便餅，唔知大家又有冇試過呢？
8. 洗衣粉
通常韓國人搬屋都會送洗衣粉，因為佢哋覺得泡泡係代表好運同幸福。
9. 鵲
呢啲鵲喺韓國街頭經常都會見到，韓國人認為清晨見到喜鵲就係吉祥象徵，之後大家嚟如果見到，即係代表有喜訊。
10. 耳仔大
喺韓國，耳仔大被認為係一件好事，因為耳仔越大，越容易聽到幸運嘅召喚，通常都會發達同一直有好運。
11. 韓國傳統面具
去到仁寺洞紀念品街，會發現好多獨特造型面具，呢12個都係河回村韓國文化遺產，當中包括：양반 (yangban)、선비 (seonbi)、중 (jung)、백정 (baegjeong)、초랭이 (cholaeng-i)、할미 (halmi)、이매 (imae)、 부네 (bune), 각시 (gagsi), 총각 (chong-gag), 떡다리 (tteogdali), 별채탈 (byeolchaetal)。
唔知大家又覺得同香港有幾成似呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
