咩原因令韓國人覺得自己老咗呢？
咩原因令韓國人覺得自己老咗呢？已經唔識當紅偶像...你有冇同樣情況？
Hello，大家好，我哋係由韓國人每日提供最新韓國旅行資訊嘅Creatrip。
正所謂：「青春一去不復返」、「時間係用錢都買唔到」，唔知平時有冇邊一啲情況會令你覺得自己開始老咗呢？小編早前喺網上搵到幾篇新聞，係關於韓國人明明仲係20、30代，但就覺得自己老咗嘅一刻，唔知大家睇完會唔會都有同感呢？
咩原因令韓國人覺得自己老咗呢？
相信大家都知以前韓國計算年齡方法同其他國家都唔一樣，只要踏入1月1號，韓國人年紀無條件會加一歲，假設小編嘅生日係1995年7月，以香港嘅計法，2023年12月嘅時候先28歲多少少，喺韓國就係2023-1995+1=29歲，瞬間老咗...（不過呢個制度今年終於被廢除啦！）
相信唔少人曾經都係細個嘅時候希望快啲長大，但人一大就會想去返細個嘅時候，而韓國人亦都一樣，佢哋會希望快啲大之後可以飲酒，但一到22歲以上，大部份人就會突然之間唔想長大....
就算有時外表一啲都睇唔出幾多歲，但年齡每一年都會增加，到底係咩原因令到韓國人會覺得自己老呢？
根據Job Korea同albamon網站有一個關於「韓國人20代、30代覺得自己有返啲年紀嘅時候係？」調查，頭5名分別係：
第1位：覺得自己年齡已經唔再易搵工嘅時候（25.7%）
當年紀越大就越怕搵工，因為韓國有啲公司係有申請年齡限制，如果超過就冇得申請，韓國人見到就會覺得自己開始老。
第2位：冇任何原因就覺得攰（20.8%）
有時就算咩都唔做，唔知大家有冇覺得好攰嘅時候呢？韓國有一句說話，就算外表睇落仲好似小朋友，但人嘅細胞係呃唔到對方，大家而家有冇覺得好攰呢？
第3位：開始唔識啲偶像（20.4%）
Kpop瘋魔世界各地，唔少偶像團體超有影響力，但如果已經唔知道佢哋叫咩名，證明自己開始已經變老...同其他人嘅話題可能都會變得越嚟越少....如果想知自己仲對Kpop仲了唔了解，不如就玩吓一個小測試。
第4位：就連玩緊嘅時候都覺得攰（20.3%）
唔知「Word Hard Play Harder」係唔係大家嘅座右銘呢？好多韓國人其實都擁有呢種態度，喺疫情之前，大家如果有經過Club，成日會見到韓國人喺度排緊隊，有時玩到朝早第二日仲可以精神奕奕返工，睇落一啲都唔攰，但如果當佢哋已經唔可以每日咁玩嘅時候，佢哋就會覺得自己變老咗。
第5位：擔心自己老咗之後會點嘅時候（16.1%）
有冇人曾經都為自己年齡擔心呢？例如會擔心自己年齡冇辦法再做一啲想做嘅嘢，或者有時佢將自己同同年紀嘅人比較等。人會因為唔同情況下而擔心自己嘅年齡，就好似22歲就冇得再參加偶像試鏡…
韓國甚至仲有分大學生同上班族覺得自己有返啲年紀嘅時候係：
排名 | 覺得自己有返啲年紀嘅時候： | |
大學生 | 上班族 | |
1 | 覺得比其他人落後 | 覺得因為年紀難搵工 |
2 | 已經覺得難搵工嘅時候 | 身邊開始唔少朋友已經要結婚 |
3 | 唔再知當紅偶像同歌手係邊個 | 出去玩都覺得攰 |
資料來源： Job Korea
而家不如就玩一個簡單測試，睇吓自己年紀已經去到邊啦！
年齡 | 可以玩到邊個程度？ |
20~22歲 | 一日可以約兩至三場，就算坐唔到尾班車行返屋企都唔會覺得後悔。 |
23~24歲 | 就算去聯誼或者聚會都唔會覺得有負擔，玩到凌晨五點搭首班車返屋企都得。 |
25~27歲 | 體力開始有啲弱，一過咗12點就會眼瞓，最多只可以玩到凌晨1至2點就要搭的士返屋企。 |
28~30歲 | 平日絕對唔會約任何人，12點前一定要返屋企。 |
31歲以上 | 只要一晚通宵，就要瞓返三日！覺得屋企係最舒服！ |
資料來源： Visualdive
唔知測完之後，同大家真實年齡又一唔一樣呢？雖然冇人想自己年紀大，不過呢個係不變嘅事實，大家要學識去享受，每日都要過得開心，未做過嘅事不妨去嘗試吓！唔好俾自己後悔。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
