外國人最羨慕嘅5個韓國文化
外國人最羨慕嘅5個韓國文化！送貨速度超快！擺貴重嘢喺枱行開都唔怕俾人偷？
Hello，大家好，我哋係由韓國人每日提供最新韓國旅行資訊嘅Creatrip。
唔知大家係因為咩而鍾意韓國呢？美食？Shopping？定係Kpop呢？韓國有好多獨特文化，令到好多外國人嚟到都會感受到佢哋嘅魅力，今日想同大家介紹外國人最羨慕嘅5個韓國文化！
外國人最羨慕嘅5個韓國文化
1. 喺公共地方唔怕俾人偷嘢
相信大家嚟到韓國旅行，如果去Cafe或者餐廳，應該都會見唔少韓國人將手機、銀包，或者手袋直接放喺枱，之後就唔見人影，可能大家都會擔心唔怕俾人偷咩？事實上因為韓國喺公共場所都有裝CCTV，所以如果唔見都可以即刻查邊個偷，加上大家都咁樣做，自自然然就成為一個習慣，好多時擺低野霸咗個位先去落單。
2. 送貨速度超快
韓國叫外賣真係相當之方便，由正餐到小食再到甜品，甚至外賣apps而家連日常用品都有得送，真係唔出街都得！如果大家有試過喺韓國叫中國料理外賣，基本上15～20分鐘就可以送到屋企，如果之後想體驗韓國叫外賣有幾快，都可以搵我哋代訂㗎！
3. 交通方便
韓國嘅大眾交通非常之方便，甚至如果一開始搭地鐵，之後轉搭巴士，仲可以享有轉乘優惠，加上naver map/kakao bus都會顯示下一班車幾點到，而且都幾準確，預啱時間出門口，就唔使怕喺條街等好耐。
4. 上網速度快
而家喺韓國幾乎喺餐廳、cafe，巴士站、地鐵等，都有免費Wi-Fi可以用，對於外國人嚟講真係相當之方便，基本上唔使買上網卡都得！ 而且最誇張嘅係韓國上網速度真係超快，之前喺新聞成日會講演唱會門票唔使1分鐘就會賣晒，到底佢哋係點搶？下次可以去網吧試吓！
5. 好多鋪頭24小時營業
嚟旅行又點會捨得咁早瞓？當然可以玩到幾晏就幾晏！韓國好多餐廳、cafe同便利店都係24小時營業，所以如果突然肚餓，都可以落街解決，鍾意夜生活嘅你，韓國絕對係你想住嘅地方之一！
以上係外國人最鍾意嘅5個韓國文化，唔知大家有冇同感呢？又或者仲有冇啲咩文化大家鍾意，小編又冇講到，歡迎留言話俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
