韓國人嘅「稱呼」文化
喺唔同場合，對韓國人嘅稱呼都會有唔同，到底點用先係至啱呢？
Hello，大家好，我哋係由韓國人每日提供最新韓國旅行資訊嘅Creatrip。
唔知大家仲記唔記之前Netflix熱播嘅《魷魚遊戲》，孔劉有問到成奇勳（李政宰飾）：「老師，你要唔要同我玩一場遊戲。」，當時成奇勳一睇就知身上唔多錢，但點解仲會叫佢做老師呢？今日想同大家講解一吓韓國嘅稱呼文化，咩時候應該點叫對方先係啱呢？
唔同情況下會用到嘅稱呼
比自己年紀一睇就知大好多嘅時候：
아줌마（大嬸）、아저씨（大叔）、어르신（老人家）
喺韓國，40幾至50幾歲中年女性通常被稱為阿姨/大嬸（아줌마），男性被稱為大叔（아저씨），而且呢個稱呼經常喺電影或者電視劇都聽到，大家都習以為常，但令人驚訝嘅係，呢種表達方式喺某情況下聽落好粗魯，唔係任何情況都用到。
例如：아줌마, 김치찌개 하나 주세요.（大嬸，請俾一碗泡菜我。）
但比起大嬸/大叔，通常年紀睇落再大啲會叫老人家（어르신），甚至可能會叫奶奶（할머니）或爺爺（할아버지），不過通常都係關係比較好，或者係家庭先會叫。
例如：어르신, 잠시 길 좀 여쭙겠습니다.（老人家，我想問吓路。）
比自己年紀大啲嘅時候：
姐姐（언니、 누나）、哥哥（오빠、형）
呢個稱呼多數都係年紀差唔多嘅時候用，女仔年紀細會叫年紀大啲嘅女仔做언니，男仔叫오빠，而男仔年紀細啲叫年紀大嘅女仔做누나，男叫做형。 不過如果年紀已經相差10歲，用呢個稱呼可能會有啲尷尬，或者對方可能會覺得冇禮貌，最好都係年紀差唔多先好用。
同年、比自己年紀細嘅時候：
跟（야）、 너（你）、 名啊（이름+아）等
如果係同年紀，可以叫對方喂（야）、你（너)等，如果年紀比自己細，雖然可以直接叫佢做細佬/細妹（동생），不過好少咁用，多數都係用以上兩個叫法，或者直接叫名。
例如：재은아! / 야, 너 지금 뭐 해?（在恩啊！喂，你而家做緊咩啊？）
叫朋友屋企人嘅時候：
媽媽（어머님）、爸爸（ 아버님）、 아줌마（大嬸）、아저씨（大叔）等
如果有韓國朋友邀請你去佢屋企，見到佢屋企人嘅時候應該要點稱呼呢？其實可以叫佢做爸爸（아버님）媽媽（어머님），但通常呢啲都係結咗婚先會咁叫，如果想改一改，可以講朋友名+爸爸/媽媽，咁樣就會比較自然啲，但如果同朋友係識咗好耐，而且亦都成日會見到佢父母，可以改為叫朋友名＋아줌마（大嬸）/아저씨（大叔）。
例如：재은이 어머님（在恩媽媽）, 재은이 아버님（在恩爸爸）
叫另一半嘅時候：
實貝（자기야）、老公/老婆（여보）、BB（애기야）等
叫另一半最簡單嘅方法，除咗可以叫名、叫Oppa（오빠）、姐姐（누나）、你（너）、喂（야）之外，有事sweet啲可以叫寶貝（자기야）、老公/老婆（여보）、BB（애기야）、公主（공주）等。
上大學嘅時候：
教授（교수님）、前輩（선배님）等
仲讀緊中學嘅時候可以只係叫老師（선생님），但一上到大學就一定要叫教授（교수님），如果用錯咗可能就會有啲尷尬。
讀大學，如果年紀比自己大或者級數大啲都會叫佢哋做前輩（선배님），而前輩會叫年紀細啲做後輩（후배），一開始大家都一定要講敬語，但如果熟絡啲，之後可以叫佢哋做姐姐（언니）或哥哥（오빠），甚至用平語講嘢都得。
不過如果係新生一入到大學可以點叫呢？一開始無論年紀係點都一定要講敬語，通常會稱呼新生做名+님（例如：在恩님）、同學號係同期（동기님）。
返工嘅時候：
職級＋님 (직급)님、名＋님 (이름)님 등
一般喺韓國公司返工，如果要叫對方，多數都係叫名又或者係姓+職位，但如果比自己高級，就一定要名+님，如果比自己低級都可以叫名+님/씨。
例如： 劉部長，我已經整理好所有資料！（유 부장님, 자료 정료 모두 완료했습니다!）/趙在恩intern，尋日拜托你嘅事做好未呢？（조재은 인턴, 어제 부탁한 일은 다 끝났나요?）/在恩씨，請入一入嚟office。
多數同事之間都係會叫職級/名+님，之後如果熟絡，放工之後可能都會叫得Casual啲，但喺公司一定要尊重返對方叫得正式啲。
不過最近好多公司，慢慢都有改變，比起對方職級，同日都係叫名+님/씨多。
搭交通工具嘅時候：
司機（기사님）
無論係搭巴士定係的士，喺某啲情況可能都會問司機幾句，喺韓國會叫司機做기사님。
例如：司機，呢間巴士去唔去東大門？（기사님, 이 버스가 동대문에 가나요?）/司機，麻煩你車我去景福宮。（기사님, 경복궁으로 가주세요.）
喺餐廳叫侍應嘅時候：
大嬸（아줌마）、阿姨（이모）、老闆（사장님）等
通常去到餐廳，叫年紀大少少嘅女性職員做大嬸（아줌마）、阿姨（이모），男性叫大叔（아저씨），雖然呢啲稱呼都係有禮貌，但有時俾人感覺可能會好粗魯。
所以小編會比較推薦大家統一叫老闆（사장님），對方聽落都會開心啲！或者有時真係唔知點叫，不如就直接撳鐘，職員就會行過嚟，落單都方便得多。
例如：老闆，麻煩再俾多兩支燒酒我！ （사장님, 여기 소주 두 병 더 갖다주세요!）
秘密武器（基本上任何時都可以用）：
請問/有禮貌嘅喂（저기요）、你好 請問....（안녕하세요 혹시.. ）
啱啱介紹個咁多個例子，如果仲係有啲亂嘅話，而家小編介紹嘅呢兩個字，只要記住就一定唔會有錯。
通常喺街、公眾場合等地方，都會聽到好多人叫저기요，或者喺餐廳舉高手想叫職員落單，都可以叫저기요（有禮貌嘅喂/請問）。或者係喺Olive Young買嘢，想叫職員拎個新商品，都可以用到。
안녕하세요,혹시…（你好，請問…）雖然唔係一個稱呼，但都係一種好自然嘅對話方式，特別係有時唔知條路點行，就可以問街上路人안녕하세요, 혹시 덕수궁이 어디에 있나요? （你好，想請問德壽宮喺邊度？）。
比較特別同令人困惑嘅稱呼
1. 언니（姐姐）
通常去買衫嘅地方，女老闆好少會叫客人做客人，反而會叫姐姐（언니），感覺會nice啲。
2. 오빠（Oppa）
雖然叫得Oppa通常都係年紀比自己大，不過而家好多idol都係10代後至20初，又點叫Oppa呢？ 韓國有一句說話，只要係靚仔無條件就係Oppa（잘생기면 무조건 다 오빠야!），令人覺得就算年紀細，都忍唔住想叫番佢一聲。
3. 선생님（老師）
선생（先生）係第一個嚟到呢個世界嘅人，係韓國人經常稱呼年長人為以示尊重。所以喺《魷魚遊戲》，孔劉先會咁有禮貌問成奇勳（李政宰飾）。
4. 학생（學生）
如果年紀大嘅人多數叫20代做學生，當然未必所有人都係學生，但就算咁樣叫都冇問題，因為都係當青年人一樣。
5. 사장님（老闆）
啱啱講到叫老闆，唔單止一定係年紀大先係，有時叫啲Part Time都一樣會叫老闆，或者如果係後生女性，有時仲會叫아가씨(小姐），呢個字以前係解貴族家庭嘅女，但經過時代嘅轉變，而家呢個詞語有啲唔好嘅意思，最好都係叫返사장님好啲。
之後喺唔同場合需要用到嘅稱呼，大家有學識未呢？如果有任何疑問，歡迎留言話俾我哋知，我哋會為大家解答㗎！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
