韓國人嘅「眼色」文化
喺韓國「睇眼色」已經成為一種技能，點解要咁執著？唔識睇又會點？
Hello，大家好，我哋係由韓國人每日提供最新韓國旅行資訊嘅Creatrip。
如果想喺韓國生活得好，必須要學識嘅就係識睇人眉頭眼額（眼色），只要學識就唔會有問題，而家就我哋一齊睇吓有邊啲啦！
「眼色」係咩意思？
根據韓文標準辭典中，眼色（눈치）定義為「根據唔同情況吓，即時了解他人心情。」聽落可能有啲抽象，但其實好易明，根據唔同情況或他人反應，擁有隨機應變能力就稱為「眼色」。
甚至仲有啲人話：「眼色係韓國人必有嘅超能力， 就好似一睇就會自己對方心諗緊啲咩！」
當然喺其他地方都需要學識睇「眼色」，只係喺韓國好似呢一種係必定要識嘅技能，而且非常之重要！就好似有一本書叫做「THE POWER OF NUNCHI」，已經翻譯咗好多唔同版本，嚟解釋喺韓國點解要學精啲！
點解要學識睇眼色？
但點解喺韓國眼色變得咁重要呢？其實都同佢哋嘅性格有關，韓國人成日都好急，咩都鍾意快，所以做事起嚟要非常之有sense，但如果做嘢慢吞吞，佢哋就會覺得好冇意思，而且會覺得好鬱悶。
另外韓國人好在意其他人嘅反應，佢哋已經好熟悉團體生活，對於他人嘅諗法或者反應都相當之敏感，唔希望人哋會因為自己覺得煩或鬱悶，所以佢哋做嘅行為都一樣，唔希望對方都有同樣嘅感覺。
同眼色有關嘅單字
相信大家睇韓劇、電影或者綜藝都會聽過「眼色」呢一個字，而家就等我哋睇吓，「眼色」分咗幾多級啦！
1. 眼色快（눈치가 빠르다） > 有眼色（눈치가 있다）
> 眼色慢（눈치가 느리다） > 冇眼色（눈치가 없다）
如果你好有sense，韓國人會讚你「眼色快」、「有眼色」，相反做嘢慢吞吞，咩都唔知嘅話，就會俾佢哋覺得你係「眼色慢」同「冇眼色」。
2. 睇眼色（눈치를 보다 / 눈치를 살피다）
為咗可以快啲行動而且做得啱，必須要學嘅就係睇眼色，舉個例子，如果而家周圍嘅情況唔太好，或者因為自己嘅失誤而導致氣氛差，呢個時候就要好識睇其他人嘅反應同態度，之後就要諗應該點樣做係最好。
再舉多個例子，之前韓劇《我的室友是九尾狐》播出嘅時候，惠利同張基龍所做嘅行為，就好似真正拍拖咁，兩人有超好嘅默契，唔少網友都好擔心惠利真正男朋友柳俊烈會點諗。
喺韓國社會，要學識睇眼色係最基本嘅元素之一，不過如果有時太注意其他人嘅目光，當然會覺得好煩，而且仲會有壓力，遇到咁嘅情況，韓國人都會稱佢為「過度睇眼色嘅人」（눈치를 너무 많이 보는 사람）。
3. 注重眼色（눈치를 챙기다/눈치를 채다）
其實同睇眼色意思差唔多，不過呢一個係指了解對方點樣諗，已經知道可以點樣去行動。
4. 好有sense咁去行動（눈치껏 행동하다.）
意思係指你已經掌握氣氛，知道要點樣去採取行動，作出明智嘅做法，同啱啱講到嘅눈치를 챙기다/눈치를 채다差唔多，但呢個實踐力度更強。
5. 俾眼色（눈치 주다） /帶眼色（ 눈치 챙겨!） / 冇眼色？（눈치가 없니?）
大多數韓國人如果見到啲唔識搞氣氛，或者冇sense咁去做嘢嘅人，都會覺得好唔舒服，甚至希望對方要注意，呢種情況吓，佢哋會成日講눈치 챙겨!（做人要帶眼色），如果friend啲可能仲會講눈치가 없니?（你唔識睇眼色嘅咩？）
同眼色有關嘅日常生活例子
而家就等我哋一齊了解韓國日常生活例子，邊啲情況下，需要睇眼色啦！
1. 搭巴士嘅時候
當要搭巴士或者地鐵嘅時候，韓國人一定會提前準備佢哋嘅交通卡，如果去到先準備，佢哋就會喺你身後用一種唔太好嘅眼神望住。
另外有一件事就係等巴士靠近，如果唔係自己想搭嘅嗰一班，韓國人會選擇唔望，或者只係一直睇手機，巴士司機見到呢個情況，好自然就會唔停，之後直接開走。
有時搭巴士，韓國人如果坐喺窗邊位，準備要落車佢哋都會整理吓手袋，或者開始會郁嚟郁去，證明佢會想喺下一個站落車，呢個時候坐喺出面嘅人就要識做，讓返啲位俾人落車。
2. 公共場所
而家因為疫情影響，去到邊都要掃QR Code，韓國人都會提前準備好，咁就唔怕會塞住後面。
只係一個普通開關掣，大家已經可以睇得出兩個嘅分別，閂門嘅制俾人撳過好多次，原因都係同韓國人性格急有關，如果搭lift企喺電掣位，大家要喺適當嘅時候咁閂門，如果咩都唔做，韓國人會覺得好鬱悶。
3. 形式上拒絕
好似搭巴士咁，見到冇哂位，最好先讓老人家坐，如果自己坐緊，問對方要唔要坐，通常佢哋都會有禮貌咁拒絕，但如果你真係聽到佢哋話唔使，而繼續坐嘅話，氣氛會變得好尷尬。因為老人家拒絕並唔係真真正正嘅拒絕，佢哋只係想表示多謝，大家應該直接企起身俾佢哋坐，一開始好多人會覺得好困擾，但其實呢一種係韓國文化之一，習慣就好。
即使而家係疫情，政府宣布叫大家減少家庭聚會，甚至啲長輩仲過：「唔緊要啦！今年唔使嚟啦！」但其實有邊一位老人家唔希望自己仔女或者孫仔孫女返去探自己呢？所以好多家庭，為咗唔想睇「眼色」，都係會乖乖地返鄉下過節。
4. 眼色遊戲
相信大家有睇綜藝應該都會見過，好多時只要有懲罰或者獎勵，韓國人都鍾意玩眼色遊戲，慢慢已經成為佢哋日常之一。
5. 大學生生活
韓國大學生經常都會喺學校叫外賣，如果係負責落單嘅人，就要好有sense咁叫。假設有6個人，如果叫咗3隻原味炸雞，可能會俾人鬧。大家可能心諗一人一隻雞髀，有咩好鬧？原因係韓國人好鍾意食嘢嘅時候同人分享，如果同一款味會太單調，最好可能係叫一款原味、一款調味同一款醬油等。
喺香港如果上堂，有問題多數會舉手問老師，但係韓國好少會發生呢個情況，因為如果舉手可能就會打亂上堂嘅流程，所以好多學生都會專注聽完，落堂之後先再問老師。
6. 社會生活
因為返工係同好多人一齊做事，呢個時候就要好有sense咁去行動。
韓國餐廳好多時餐具都要自己拎，如果同同事出去，千祈唔好只係坐喺度，要幫手排好，因為你整緊嘅同時，對方都可能已經斟緊水，大家互相幫忙。
喺韓國返工，好多時放工成日都會去聚餐，呢個都係韓國文化之一，如果年紀比較細或者職場階級比較低嘅人，喺前輩叫之前，已經自動自覺拎好夾負責燒肉。
有時為咗睇眼色，身邊同事或者老闆未走，自己做完嘢都唔敢走，咁樣做其實一啲都唔好。所以有啲公司為咗唔想有呢一種事發生，會實行自由上班時間，完全唔需要睇眼色！
過度睇眼色文化
之前就有一個媽媽叫咗辣炸雞外賣，佢打算同仔仔一齊食，點知佢影咗相po上網，話希望下次老闆可以「有眼色」唔好整到咁啦，唔少網民都覺得自己都冇寫要求，竟然要老闆有「眼色」，相當唔負責任。
識睇眼色、適當情況做出反應雖然係個人Sense，但並唔係上網地要求人哋100%理解自己，或將「睇眼色」當成一種讀心術，自認為可以完全理解他人，咁樣做反而會造成彼此心理負擔同壓力。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
