Hello，大家好，我哋係由韓國人每日提供最新韓國旅行資訊嘅Creatrip。
由崔宇植、金多美主演嘅SBS《那年，我們的夏天》，講述全校第1名同全校最後1名，經過十年前後人生同心境變化，男女主角感情線上相當細膩，令人回想起青春時光，以及戀愛中無可奈何嘅一切。唔知大家又有冇追呢一套呢？今次小編整理好當中嘅拍攝景點，下次經過不妨都去打下卡啦！
備註：本篇截圖來源為SBS
《那年，我們的夏天》拍攝地
1. 首爾中央高等學校（서울 중앙고등학교）
- 地址：서울 종로구 계동 1
國延秀同崔雄就讀嘅學校就係位於首爾昌德宮隔離嘅「首爾中央高等學校」，唔單止《那年，我們的夏天》去過，就連《鬼怪》、《喜歡的話請響鈴》都有喺度取景。
2. 崔雄屋企（최웅집）
- 地址：경기 수원시 팔달구 장안동 109-1
原本拍攝地係一間cafe，後嚟廢棄先變成崔雄屋企，呢度係水原華城行宮城牆前，不過因為內部冇開放，唔肯定實景係唔係另外喺棚內拍攝。
3. 國延秀屋企（국연수집）
- 地址：경기 수원시 팔달구 창룡문로 75-5
崔雄屋企同國延秀屋企距離好近，同樣位於水原市。延秀屋企係「池洞壁畫村」一帶，呢度好多好靚同可愛壁畫。不過要提提大家，呢一帶好多居民仲住緊，要去打卡嘅話要靜啲。
4. 支石墓公園（고인돌공원）
- 地址：경기 오산시 수목원로 449
呢個可以話係《那年，我們的夏天》經典場景，高中時期延秀同崔雄決定拍拖，不過佢哋拍攝嘅景點唔係啱啱講到嘅學校，而係喺烏山市支石墓公園。
5. 紫霞超市（자하슈퍼）
- 地址：서울 종로구 자하문로42길 57
喺劇入面，佢哋好多拍攝景點圍繞水原市，當中延秀搭巴士返工站牌所在地，實際係一間好有復古感嘅超市。除咗《那年，我們的夏天》之外，《惡之花》超市都喺度取景過。
6. 梅堂（매당）
- 地址：전북 전주시 완산구 은행로 20-4
- 營業時間：11:30 - 22:00
崔雄爸媽開嘅「與小雄同在」餐廳，係喺全州韓屋村嘅小巷拍。下次有機會去全州嘅話，都可以去「梅堂」品嚐美味韓式料理！
7. 溫光自然休養林（온빛자연휴양림）
- 地址：충남 논산시 벌곡면 황룡재로 480-113
《那年，我們的夏天》令人印象深刻嘅其中一個點係，崔雄同國延秀逃跑之後，俾PD捉走，綁架到深山別墅拍攝。呢度係忠清南道論山市嘅「溫光自然修養林」，壯闊林木景觀，配上山間別墅風景，係唔係都好吸引，想去一次呢？
8. 濟扶島（제부도）
- 地址：경기 화성시 서신면 제부리
《那年，我們的夏天》回憶畫面，係國延秀突然話要去旅行，之後拖住崔雄急急腳咁出門口，咁靚嘅海邊其實係京畿道「濟扶島」，根據潮漲同退潮，海面會展成道路，係韓國少見嘅摩西分海風光之一。
9. 烏耳島博物館（시흥 오이도 박물관）
- 地址：경기 시흥시 오이도로 332
- 營業時間：10:00 - 18:00、逢星期二休息
當崔雄同國延秀複合，兩人返留去當初戀愛純真感，崔雄甚至仲偷偷地跟住延秀返工，可愛情節令人印象深刻。當時佢哋喺始興市嘅烏耳島博物館，隔住一個海灣同仁川相望，亦係記載朝鮮半島古代歷史重點區域。
10. 池洞市場（지동시장）
- 地址：경기 수원시 팔달구 지동 402-8
呢度正正係延秀屋企附近嘅「池洞市場」，係韓國當地人經常去嘅傳統市場之一。
11. 川北新興教會（천북신흥교회）
- 地址：충남 보령시 천북면 천광로 73-11
《那年，我們的夏天》另一經典畫面就係崔雄喺雨中錫延秀。呢度係忠清南道保寧市「川北新興教會」，喺呢套劇播出之後，吸引唔少人去咗打卡添！
12. MOCHUISLE（모쿠슈라）
- 地址：경기 파주시 탄현면 법흥리 1652-245
NJ要崔雄陪自己，兩人去到嘅cafe係好多韓劇都有去取景，例如：《現正分手中》、《我的室友是九尾狐》等，推薦大家之後去坡州，都可以順便去埋。
唔知呢套青春韓劇《那年，我們的夏天》，有冇勾起大家一啲高中回憶呢？劇中好多景點都係喺水原取景，如果之後去開，不妨推薦大家去打卡！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
