韓國防止疲勞駕駛各種方法
揸車瞌眼瞓點算？韓國竟然出咁多絕招去防止疲勞駕駛？
Hello，大家好，我哋係由韓國人每日提供最新韓國旅行資訊嘅Creatrip。
唔知大家嚟韓國旅行，會唔會選擇自駕遊呢？如果會今日小編想同大家講一吓喺韓國揸車要注意嘅事！
韓國雖然交通都算發達，但有時想去遠啲嘅地方，自駕遊相對會方便得多，但路程多數需時較長，揸揸吓車好容易會攰，韓國為咗避免疲勞駕駛，佢哋有唔少法寶，今日就等小編逐一為大家介紹啦！
韓國疲勞駕駛事故發生率
有時疲勞駕駛唔單止會傷害到人，甚至可能會殺害無辜，根據韓國高速公路公司統計，過去三年全國高速公路總共發生582次致命事故。 其中疲勞駕駛死亡人數係403人，佔總數69%。
韓國疲勞駕駛罰款
根據韓國道道公社所講，疲勞駕駛同血液中酒精含量為 0.17% 醉酒駕駛一樣危險。《道路交通法》規定，如果因過度勞累、疾病、藥物或其他原因，係唔可以駕駛。
如果違反將處以30萬韓元以下罰款或拘留（喺監獄或警察局留1日以上30日以下）。 如果因為疲勞駕駛造成車禍，可能會被判處5年以下有期徒刑或2000萬韓元以下罰款。
韓國防止疲勞駕駛各種方法
1. 隧道警告喇叭
有時隧道特別黑同窄，睇嘢都未必會好清楚，所以喺隧道發生車禍死亡率係一般道路事故嘅2.3倍。為咗防止疲勞駕駛，喺隧道入面設置各種裝置。
當你揸車經過隧道嘅時候，會突然聽到類似救護車聲音嘅警笛聲，呢個時候就算幾攰，都會打醒十二分精神，通常喺凌晨2點到4點之間會響，因為呢個時候係最常發生交通意外。
2. 隧道LED照明
不過啱啱睇到嘅隧道警告喇叭，其實都受到唔少批評，因為如果真係有救護車或消防車經過，根本就會分唔清，甚至可能會阻路，為咗防止有呢個問題，喺隧道仲會安裝各種顏色嘅LED燈，用視覺代替聽覺。
한국도로공사
韓國最長仁濟襄陽隧道全長約11公里，喺漆黑隧道入面，甚至可以見到超靚彩虹！
강원도민일보
除咗彩虹，有時仲會有可愛插圖，例如啲魚會喺天花板游嚟游去，浮雲會飄嚟飄去，喺揸車嘅時候望到心情都會開心啲。特別係江原道因為多山，所以特別多隧道，如果有揸車去過束草或襄陽，應該會見過唔少呢啲LED燈。
3. 隧道收音機聲
揸緊車入隧道嘅時候，如果係聽緊收音機，DJ嘅聲可能會突然中斷，變咗一位女仔嘅聲音講「喺隧道要小心揸車」，唔少人第一次聽可能都會嚇親。
4. 去休息站
有時揸車揸太耐，韓國喺唔少地方都設有休息站，嗰度有好多小食，醫吓肚再出發都未遲！
最多人去食嘅就係年糕腸仔串、番薯條同薯仔波，之後經過不妨都買嚟試吓啦！
5. 想瞓休息區
雖然休息站都係俾大家唞吓，不過有時泊車位唔多，所以由2011年開始，喺去緊嘅路上/未用嘅巴士站設置「想瞓休息區」，可以短暫瞓過教，有咗呢個地方，交通事故死亡人數亦都減少38%！
政府為咗鼓勵更多人用，最近仲會免費提供Wi-Fi、增設廁所、擴建停車場同有食物車。
6. 防困貼紙
한국 도로공사
韓國高速公路公司開發一個「可以令人睜開雙眼」嘅貼紙，呢對眼超大，甚至可以反射最遠200米外光線，呢種方法好簡單就可以叫醒司機。
7. 防困香口膠
불스원
好多司機都會喺車入面放一盒防困香口膠，味道比平時食開嘅強，會刺激大家嘅鼻，有短暫突然會醒嘅效果（唔單止司機好多學生都會買嚟食）。不過始終效果唔係一直持久落去，如果真係揸車揸到攰，最好都係去「想瞓休息區」休息吓。
8. 刺激性標示
有時為咗防止疲勞駕駛，喺韓國路上會見到一啲簡單易明嘅單字/字句，就好似졸면 죽음（想瞌眼瞓就會死），令人見到即刻都醒晒！
另外或者會寫到졸다가 추돌하면 80% 사망（因為瞌眼瞓而撞到80%會死亡）。相信大家見到80%咁大嘅數字，都會無條件即刻恢復理智。
以上就係韓國為咗避免喺揸車時瞌眼瞓會用到嘅方法，希望大家之後自駕遊，都會安全駕駛！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
