聽落似粗口嘅韓文單字
聽落似粗口嘅韓文單字，喺韓國人面前講要小心啲！
Hello，大家好，我哋係由韓國人每日提供最新韓國旅行資訊嘅Creatrip。
唔知大家有冇試過明明唔係講緊粗口，但因為音似，而俾人誤會呢？其實喺韓國成日都會有呢啲情況發生，今日小編整理咗好幾個韓文單字，下次喺韓國人面前發音嘅時候就要小心啲啦！
聽落似粗口嘅韓文單字
柴犬（시바）
柴犬日文係「しば（Shi Ba）」翻譯成韓文就係「시바（Si Ba）」，同韓文粗口入面會成日講到嘅「C八」發音超似，如果喺街見到柴犬，諗住讚佢可愛，點知唔小心講咗粗口，咁就尷尬啦！為咗避免呢啲事發生，「犬」後面通常會再加多個韓文單字「견（Gyeon）」。
始發（시발）
另一個講出嚟都係會引人誤會嘅單字，就係「始發（시발 / Si Bal）」啦。呢個字意思其實係指「喺總站出車」或者「事情一開始」。如果講嘅時候Timing唔啱，真係以為講緊粗口㗎！
十八（십팔）
雖然寫法同真正嘅粗口好大出入，不過發音如果講唔準，真係超似粗口！有時節目為咗做效果，都會寫18，唔知大家有冇留意到呢？
丙申年（병신년）
「병신년（Byeon Sin Neyon）」發音的確係粗口，意思指神經病、癲女人意思，但呢個同時係2016年「丙申年」韓文單字。當年新聞字幕一直都彈呢個字，唔少網民都會cap圖再改。
梅雨過後再落嘅新雨（개부심）
「개부심（Gae Bu Sim）」係一個純韓文字，意思指喺結束梅雨之後再落雨，對韓國人嚟通呢個單字都有啲陌生，不過因為韓文「개」＝狗，如果擺喺其他字前面，就會令嗰個字降級，令人誤以為係鬧緊佢咁。
廚房（붴）
「붴（Bwik）」呢個單字好少見，突然講出口，可能會令人覺得好似係一個輕蔑助語詞，或者好似電視消音時「嗶」聲咁，但其實只係廚房（부엌）嘅簡寫。
變身（변신）
除咗啱啱提到嘅丙申之外，韓文變身（변신 / Byeon Sin）發音都好似粗口嘅「병신（Byeong SIn）」，只差尾音係「ㄴ（N）」定「ㅇ（NG）」，講出嚟幾乎聽唔出分別。
有夫之婦（핫어미）
只睇「핫어미（Hat-eo Mi）」呢個單字，可能會聯想到「性感（Hot）媽媽」，但其實呢個字係「有夫之婦（유부녀）」純韓文，另外有婦之夫係「핫아비（Hat-a Bi）」。
毛毛雨（먼지잼）
韓國流行語之一係喺單字後面加個「잼（趣味 / Jaem）」以表示鍾意，但「먼지잼（Meon Ji Jaem）」唔通就係灰塵（먼지）趣（잼）？其實同樣都係一個純韓文單字，意思指落緊好細雨，比毛毛雨更細。
喺韓國人面前，以上呢幾個字都要比較小心，如果唔係人哋聽落就會覺得似係粗口㗎啦！
如果有更多想知嘅內容，都可以隨時留言或者dm話俾我哋知：）
Mail：help@creatrip.com
