Hello，大家好，我哋係由韓國人每日提供最新韓國旅行資訊嘅Creatrip。
韓國無論係男仔定女仔都好識打扮自己，而且髮型屋服務出名高質，好多人都會專門嚟韓國整頭髮。不過網上有關韓國男士髮型屋推薦、預約方法同價錢嘅資料唔多，好難知到底邊間髮型屋唔伏。
小編居韓超過10年，而且身邊有唔少韓國男仔朋友，對韓國男士流行髮型同美妝都有一定瞭解。如果今次飛韓國準備去（或者係帶朋友/另一半去）韓國髮型屋，記住參考今次小編幫大家整理嘅2026最新韓國男士髮型指南，睇下今年最流行咩髮型，韓國男仔們平時又會整咩髮型啦！文章入面仲有幾個居韓小編俾大家嘅韓國髮型屋小貼士，記住睇到最後！
必睇韓國男士髮型指南
2026韓國流行男生髮型
Semi Leaf Cut(세미리프컷)
近呢5年好多韓國男仔都會剪Leaf Cut（i.e.李棟旭喺《鬼怪》入面個髮型），不過今年會流行剪比較短嘅Semi Leaf Cut。呢款髮型耳仔兩邊頭髮會剪短，而頭頂同後面頭髮就會稍微留長，配合埋電髮嘅話朝早起身求其執一執就已經好有層次感，好啱想留長頭髮，但又唔知應該點打理嘅朋友們剪！
打理難度 | 中等 |
適合臉型 | 臉部較長、瓜子臉、輪廓較立體 |
Down Perm | 建議做 |
Natural Shaggy Cut自然羽毛剪(내추럴 샤기컷)
2026年韓國流行男士髮型共同點係比較偏長髮，而且比起非常幹練整齊嘅髮型，好似呢款咁偏自然嘅髮型會更加貼近潮流！Natural Shaggy Cut會將講求嘅係空氣感同隨性感，比起齋留長頭髮層次更多、髮尾更輕，唔會睇落太厚重，更加有一種復古嘅感覺。
打理難度 | 中上 |
適合臉型 | 大部分臉型皆可 (靠層次進行修飾) |
Down Perm | 非必要 (如果兩側頭髮容易翹起就建議做) |
Vintage Perm(빈티지펌)
![韓國流行 韓國男士髮型 韓國男仔髮型 韓國美髮 韓國男士髮型屋 韓國男士salon 2026韓國流行男生髮型]()
Vintage Perm追求嘅係一種唔刻意嘅層次感，呢款電髮更加注重蓬鬆度同埋凌亂美。如果你覺得自己頭髮太幼、太貼面，呢款電髮可以幫你令頭髮變得更豐盈，而且只要用髮尾油set頭就可以睇落更有立體感同新潮！
打理難度 | 中等 (需要用髮泥/護髮油set頭) |
適合臉型 | 希望增加臉部立體感時 |
Down Perm | 建議做 |
想知今年韓國女仔興整咩髮型？👇🏻
[블로그] 2026人氣韓國女生髮型攻略
韓國常見男生剪髮髮型
1. Dandy Cut(댄디컷)
朴志訓/車銀優
Dandy Cut可以話係最經典嘅韓國男士髮型之一，特色係後面頭髮會剪短，但前面保持一排厚長嘅瀏海，長度大約遮到眼眉。呢款髮型可以令個人睇落更加後生，仲可以完美遮住高額頭。因為佢非常百搭，幾乎咩面型都啱，所以好多KPOP偶像同韓劇男演員都係剪呢款（小編以前喺大學都見過好多男同學咁剪！）
南柱赫
如果唔想瀏海太厚重，都可以考慮剪See-Through Dandy Cut，剪法大致一樣，但瀏海會剪得更薄，隱約可以見到額頭，俾人一種更隨性同Casual嘅感覺，唔會太過死板。
打理難度 | 低 |
適合臉型 | 幾乎所有臉型皆可 (特別係額頭比較高想遮嘅時候) |
Down Perm | 非必要 (如果兩側頭髮容易翹起就建議做) |
2. Regent Cut(리젠트컷)
宋仲基/丁海寅
Regent Cut係由韓國男神宋仲基帶起嘅熱潮。雖然宋仲基個樣好童顔，但呢款髮型因為會將前額露晒出嚟，所以俾人一種非常成熟同埋斯文嘅感覺。
呢款髮型最啱一啲輪廓線條明顯、或者想修飾圓面/短面型嘅朋友，因為佢可以拉長面部視覺比例，仲可以令頭頂髮量睇落更豐盈。
打理難度 | 中上 |
適合臉型 | 下顎輪廓明顯 |
Down Perm | 唔需要 |
3. 逗號瀏海(쉼표 머리)
朴敘俊
講起韓國OPPA髮型又點少得逗號瀏海呢！呢款髮型顧名思義，瀏海弧度睇落就好似一個逗號咁，俾人一種時尚幹練嘅感覺。
不過因為每日都要打理先可以keep住弧度，如果你本身唔習慣set頭，呢個髮型可能未必啱你... 但小編聽身邊男仔朋友講話而家有一種叫Comma Perm嘅逗號電髮，可以直接幫你定型，弧度會更加自然，而且朝早只需要簡單吹整就得，大家不妨可以去試試！
打理難度 | 高 |
適合臉型 | 需要修飾額頭同顴骨線條時 |
Down Perm | 建議做 |
4. Swat Cut栗子頭(스왓컷)
朴敘俊
有睇《梨泰院Class》嘅朋友們一定會知道呢個韓國男士髮型！之前因為呢套韓劇，韓國掀起「栗子頭」風潮，短髮配上短瀏海，係以前好少見嘅style。
不過坦白講呢款髮型真係唔係個個都carry到，佢比較適合臉型尖嘅男士們剪，而且如果髮質本身比較粗硬，可能仲需要再做埋Down Perm先可以好似朴敘俊咁貼齊頭型，營造一種有男子氣概又幹練嘅感覺。
打理難度 | 低 |
適合臉型 | 除臉型較圓人士皆可 |
Down Perm | 需要 |
韓國常見男生電髮髮型
1. Down Perm(다운펌)
邊佑錫/魏嘏雋
Down Perm比起係一個髮型，更加似係韓國男仔去整頭髮嘅必需步驟。呢款電髮係係用藥水將耳仔兩邊同後面嘅頭髮壓平貼齊，令個頭睇落更細同立體，電完之後整理頭髮都會比較方便，唔洗怕兩邊頭髮會飛起。
就咁喺小編公司，十個韓國男同事有八個都有做Down Perm，你會見到佢哋鬢角會比較平，睇落更整齊！
打理難度 | 低 |
適合臉型 | 幾乎所有臉型皆可 |
Down Perm | / |
2. Shadow Perm(쉐도우펌)
李棟旭
將前額瀏海電攣嘅Shadow Perm係最受歡迎嘅韓國男士電髮之一，呢款髮型適合中長髮嘅男士們去整，會俾到人一種暖男感，睇落更溫柔！而且就算本身髮量唔多，電完Shadow Perm都可以令頭髮睇落更厚更豐盈。不過比起其他電髮，呢款髮型如果打理得唔好就會睇落好亂，好似啱啱瞓醒咁XD
小編以前陪過男性朋友去弘大整頭髮，當時佢就正正係攞李棟旭嘅相去做reference，髮型師就幫佢電咗呢款Shadow Perm。睇落好有凌亂美又隨意，但其實電嘅時候比想像中複雜，亦都好考髮型師功力，因為每撮頭髮電嘅方向都會左右到最終成果。
小編朋友由本身超厚嘅齊瀏海成功變成韓國暖男髮型，佢本人都好滿意最終成果，去到而家都會定期返去同一間髮型屋整呢個髮型！下面留低呢間髮型屋嘅預約方法俾大家，無論係自己整定想帶另一半去都可以透過我哋預約！
打理難度 | 中等 |
適合臉型 | 臉部較長、瓜子面 |
Down Perm | 建議做 |
[스팟] THE DAY'S HAIR | 外國人專屬男士髮型設計及染髮店
3. As Perm(애즈펌)
池昌旭/BTS柾國
As Perm係韓國男仔最經典嘅分界電髮，其中一個特徵係只會微微露出一部分額頭，俾人一種好自然、陽光嘅感覺。呢款電髮透過幫你將前額頭髮燙出一個自然嘅弧度，從而修飾面型。喺韓國無論係學生定打工仔都好鍾意呢款髮型，夠晒百搭。
打理難度 | 低~中等 |
適合臉型 | 大部分臉型都可以做 |
Down Perm | 非必要 (如果兩側頭髮容易翹起就建議做) |
4. Garma Perm(가르마펌)
孔劉
同上面As Perm一樣，呢款髮型同樣係分界電髮，不過差別在於會將頭髮分成6:4或者7:3比例，再電波浪捲，露出更多額頭，整體感覺會更加有貴氣同成熟。韓國好多三十幾四十歲嘅男演員都偏好呢款髮型，如果想變到好似孔劉咁，不妨可以考慮整！
打理難度 | 中等 |
適合臉型 | 臉部較圓+短 |
Down Perm | 建議做 |
5. Soft Spin Swallow Perm(소프트 스핀 스왈로 펌)
金永大
呢款髮型係由出演《Penthouse》嘅金永大帶紅，透過一撮撮髮絲咁電，可以將普通短髮變得更有層次，睇落更加濃密、輕盈，就好似羽毛咁柔軟。因為凌亂得嚟又自然，所以成為好多韓國男仔整頭髮嘅範例，爭相模仿。
打理難度 | 中等 (需要用美髮產品突出層次) |
適合臉型 | 大部分臉型都可以 |
Down Perm | 非必要 (如果兩側頭髮容易翹起就建議做) |
首爾男士髮型屋推薦
THE DAY'S HAIR(더데이즈헤어)
- 地址：서울 마포구 홍익로5안길 20 2F
- 營業時間：10:00-22:00
- 前往方法：弘大入口站（홍대입구역）9號出口
小編頭先都有介紹過呢間弘大髮型屋，THE DAY'S HAIR除咗個人色彩染髮之外，更加非常擅長為男士提供各種美髮服務。無論係剪髮、染髮定非常刁鑽嘅電髮都可以做到。
小編朋友話上次去覺得髮型師非常仔細，而且因為髮型師同職員都識講英文，所以由諮詢到修剪、電髮，成個過程溝通好方便，用嘅藥劑都係出名品牌，最後出嚟效果滿足度高！而家透過Creatrip預約仲可以享有最高8折優惠，記住唔好錯過！
[스팟] THE DAY'S HAIR | 外國人專屬男士髮型設計及染髮店
BUDDY Men's Hair(버디맨즈헤어)
- 地址：서울 마포구 양화로7길 28 3F
- 營業時間：星期一、三至日 10:00-22:00
- 前往方法：合井站（합정역）2號出口
上面介紹嘅THE DAY'S HAIR男仔女仔都可以去，但呢間髮型屋係首爾難得一見嘅男士專用髮型屋，由實力有保證嘅髮型師幫你設計最新潮髮型 ！而且職員識講英文同日文，有需要都會用翻譯機溝通，所以唔識韓文都唔洗擔心。
好多客人都話BUDDY Men's Hair嘅CP值高，而且風格同香港/台灣唔同，係真·韓系髮型！如果想將自己/男朋友嘅頭髮交俾專業人士，非常推薦大家嚟合井BUDDY Men's Hair！
[스팟] BUDDY Men's Hair（合井店）
C.PLOT(씨플롯)
- 地址：서울 강남구 테헤란로 130 2F
- 營業時間：
- 星期一至五 10:00-22:00
- 星期六 09:00-14:00
- 前往方法：江南站（강남역）1號出口
另一間小編想推薦俾大家嘅首爾男士專門髮型屋係位於江南站附近嘅C.PLOT，呢間Barber Shop環境舒服，就好似去咗間高級復古Barber Shop咁。
髮型師會根據客人形象幫大家設計最可以表達自我嘅髮型，風格整體上比較成熟、紳士同男性化，喺我哋網站更加得到5分滿分嘅評價，如果想體驗高質韓式男士理髮服務，推薦大家可以考慮預約江南C.PLOT！
[스팟] C.PLOT 男士髮型屋（江南）
Park Seung Chol Hair Studio(박승철헤어스튜디오)
- 地址：서울 마포구 어울마당로 135 3F
- 營業時間：10:30-20:30
- 前往方法：弘大入口站（홍대입구역）8號出口
早前成功進軍美國同中國，成為世界潮流指標嘅Park Seung Chol Hair Studio同樣係一間好識整韓系男士髮型嘅salon，小編同事之前係去弘大店度染頭髮！
小編同事話佢自己平時唔會點轉髮型屋，因為好多髮型屋剪男仔頭都唔符合佢標準，不過上次去完Park Seung Chol Hair Studio之後比想像中滿意。除咗因為髮型師有根據佢嘅臉型同風格推薦髮型同髮色，仲會細心聆聽客人要求，幫佢染咗個佢以前一直都好想染嘅髮色。
如果大家想剪/電頭髮順便染埋，推薦大家可以透過我哋預約Park Seung Chol Hair Studio，享用9折優惠！
[스팟] Park Seung Chol Hair Studio（弘大店）
男士預約韓國髮型屋前必知
#1 韓國男士美髮平均價錢
療程 | 價錢 |
男士剪髮 | ₩25,000~40,000 (25000~40000) |
男士染髮(單色) | ₩80,000~130,000 (80000~130000) |
男士漂髮(1次) | ₩80,000~120,000 (80000~120000) |
男士Down Perm | ₩20,000~40,000 (20000~40000) |
男士電髮 | ₩80,000~200,000 (80000~200000) |
男士頭髮護理療程 | ₩50,000~150,000 (50000~150000) |
※2026年數據
※價錢根據地區、髮型師等級、髮質等因素而不同
#2 好多時都會額外收附加費用
韓國好多髮型屋價錢牌上金額都係基本短髮價錢，對男士們嚟講睇落好似冇咩關係，但其實根據頭髮長度、髮質等因素，或者如果需要做護髮療程、加Down Perm，都會收返你一定嘅附加費用，所以最終金額可能會比你一開始預設嘅價錢貴。建議大家諮詢嘅時候最好先問清楚，以免做咗之後先發現原來要加錢。
如果大家係透過Creatrip預約韓國髮型屋嘅話，可以見到預約頁面上面都有列明額外費用，價錢夠透明，大家可以放心去體驗，唔需要擔心因為係外國人而被收貴。
#3 建議準備定參考圖片
比起髮型名，可以話到俾造型師知道你想整咩髮型嘅最直接方法一定係直接show幾張參考圖片俾對方睇！如果可以嘅話盡量準備多幾張唔同角度嘅相，冇特定想整嘅髮型嘅話就可以搵幾張類似嘅風格相，等髮型師可以準確知道你追求嘅效果。
男士韓國髮型屋常用句子
韓文 (羅馬拼音) | 中文 |
컷트 하고 싶어요 (keotteu hago sipeoyo) | 我想剪頭髮 |
염색하고 싶어요 (yeomsaek hago sipeoyo) | 我想染頭髮 |
파마하고 싶어요 (pama hago sipeoyo) | 我想電頭髮 |
다운펌 하고 싶어요 (down perm hago sipeoyo) | 我想整Down Perm |
| 너무 짧게는 싫어요 (neomu jjalgeneun sileoyo) | 我唔想剪得太短 |
이렇게 해주세요 (ireoke haejuseyo) | (一邊show參考圖片一邊講) 我想剪呢個髮型 |
손질 쉬운 스타일로 해주세요 (sonjil swiun style-lo haejuseyo) | 請幫我整一款容易打理嘅髮型 |
샴푸 해주세요 (shampoo haejuseyo) | 唔該幫我洗頭 |
更多參考單詞&句子👇🏻
[블로그] 韓國髮型屋術語
韓國髮型屋常見問題FAQ
Q1. 可唔可以當日walk-in？
A：部分salon可能可以walk-in，但熱門時段基本上都要預約，尤其係打算做染髮、漂髮、電髮、頭皮SPA等需時較長項目嘅話，都需要提早預約，唔可以直接去。
Q2. 預約嘅時候需唔需要俾訂金？
A：如果係自己上網/IG搵髮型屋，部份髮型屋可能需要，建議預約當時問清楚相關政策。如果係透過Creatrip預約韓國髮型屋，都要先支付一筆訂金，但當日做完療程之後俾錢就會係俾扣除訂金錢後金額，所以完全唔會蝕，亦都唔需要怕好似蝕咗錢俾第三方平台。
Q3. 男仔去韓國髮型屋剪髮、染髮、漂髮、電髮分別需要幾耐？
A：根據現場情況同有冇加其他項目，可能需要更長時間，不過平均嚟講，剪髮需時30–60分鐘、漂+染髮就最少3小時以上、剪+電髮就要2-3小時，大家安排行程嘅時候可以參考。
Q4. 韓國髮型屋有冇識講中文/英文嘅髮型師，或者有冇翻譯？
A：髮型屋通常都唔會提供翻譯服務，不過好似弘大、延南等人氣地區同觀光區嘅salon可能會有識講英文嘅職員或者髮型師。如果大家想make sure有冇提供指定語言服務，可以透過Creatrip預約，頁面上會標明！
Q5. 邊幾種男士髮型可以唔洗日日set都得？
A：Dandy Cut、Swat Cut、AS Perm 相對上比較容易打理，洗完頭吹乾就可以維持髮型；逗號頭、Regent Cut等等就需要每日自己吹/夾返個型出嚟，再用髮蠟/髮油整理同定型。建議去整頭髮嘅時候問埋髮型師要點打理同用咩product，方便返到去都可以維持完美髮型！
透過Creatrip預約髮型屋可以...
✅用繁體中文、港幣預約夠方便
✅可享Creatrip客戶獨家優惠價更超值
✅直接幫你聯絡髮型屋，唔識韓文都冇問題
✅預約即可享用Creatrip Buddy 14日免費個人旅行小幫手服務
以上係居韓小編幫大家整理嘅韓國最新流行男士髮型同首爾男士髮型屋推薦，下次飛韓國前記住預約定上面介紹嘅salon，帶另一半或者自己去整返個韓系OPPA頭啦！
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
