Hello，大家好，我哋係由韓國人每日提供最新韓國旅行資訊嘅Creatrip。
大家平時睇韓劇，會唔會睇到啲地方好靚都會想去打卡嘅呢？今日小編整理咗江原道幾個打卡景點！大家睇到又記唔記得邊套劇打過卡呢？
江原道韓劇拍攝地「三陟」
1. Sol Beach三陟（쏠비치 삼척）
地址：강원도 삼척시 수로부인길 453
SBS 《當你沉睡時》
喺2017年播出嘅SBS韓劇《當你沉睡時》，由李鍾碩同秀智主演，當時佢哋約會緊嘅地方就係 Sol Beach三陟。
度假村前有一條500m嘅海濱長廊，大家可以一邊散步一邊喺海灘吹吹風（圖中建築為度假村C、D，韓劇份面背景為A、B東面海灘。）
海灘上插咗住「SURFKIKI」字樣，大家可以企喺中間打卡到此一遊。
另外呢個長櫈都係大家嚟到嘅必影打卡位。
江原道韓劇拍攝地「東海」
1. 田谷牆巷（논골담길）
地址：강원도 동해시 논골1길 2
「田谷牆巷」係墨湖燈塔村所在地，而沿住田谷一街（논골1길）行，就會見到呢度有韓劇嚟取過景嘅地方。
跟住一直行到最頂，大家會見到一間可以望到海景嘅Cafe。
JTBC《Run On》
2020年JTBC播出嘅由任時完同申世景主演嘅《Run On》就係喺度拍！
小編當日去嘅時候天氣超好，唔會太熱或太凍，打開哂窗望到呢個景真係好舒服。
JTBC《Run On》
喺Cafe出到嚟之後轉左一直直行，慢慢落坡之後會見到一個紅色燈塔，當時秀英同姜泰伍就企喺前面，如果大家之後去開都可以喺度影返張相！（如果唔太知點行，都可以問Cafe老闆，佢會好親切咁話俾大家知。）
2. 望祥海邊（망상해변）
地址：강원도 동해시 동해대로 6270-10
tvN《德魯納酒店》
呢個海灘喺2019年tvN播出嘅韓劇《德魯納酒店》中有出現過，佢位於東海，只要喺黃昏時候去，就好似去咁第二個國家咁，吸引咗唔少人嚟打卡。
雖然去到可惜冇咗劇中嘅太陽傘，不過如果真係喺黃昏時候去，應該都會影到差唔多feel。
唔單止打卡好，作為揸車路線，望住呢個景都幾唔錯！
江原道韓劇拍攝地「平昌」
1. 龍平滑雪渡假村（용평리조트）
地址：강원도 평창군 대관령면 올림픽로 715
JTBC 《我的ID是江南美人》
2018年JTBC播出嘅《我的ID是江南美人》，當時大學OT就係喺龍平滑雪渡假村舉行。
由龍平滑雪渡假村仲可以搭纜車上發王山。
tvN 《鬼怪－孤單又燦爛的神》
除咗《我的ID是江南美人》之外， 《鬼怪－孤單又燦爛的神》都有喺度取過影添！
JTBC 《我的ID是江南美人》
當時女主角姜美來（林秀香飾），為咗可以得到「發王山」嘅元氣都上咗山頂一轉。
可惜小編去嘅時候，同劇中場景唔一樣，當日超大霧，而且檯同櫈嘅位置都有變。
就連2002年KBS嘅《冬季戀歌》原來都有喺度拍攝過，雖然呢套戲已經做完好耐，但係佢嘅人氣一直都冇減少，大家可以喺兩位主角嘅人形紙板到影相留紀念。
江原道韓劇拍攝地「鐵原」
1. 孤石亭（고석정）
- 地址：강원 철원군 동송읍 태봉로 1825
- 費用：免費
鐵原八景必去之一嘅「孤石亭」，喺漢灘江峽谷內，因為有特殊地形景色，喺地質方面具有重要嘅研究價值。
喺呢個入口入去就會見到「孤石亭」，高大約15米「孤石」係大地被熔岩覆蓋之前嘅基岩，約1億1千萬年前喺地下形成花崗岩，後嚟經漢灘江侵蝕作用形成新河道過程中，重新再露面。
入口行落去之後，沿途可以見到好多韓劇都嚟過取景，例如係好似韓劇《鯊魚》、《那年冬天風在吹》、《醫道》、《朝鮮射手》等。
韓劇《那年冬天風在吹》第一集，金範同啱啱出獄嘅哥哥（趙寅成飾）嚟到落住大雪嘅地方就係「石孤亭」，冬天漢灘江結成冰好壯觀。
大概行15分鐘，就會慢慢見到孤石同漢灘江。喺鐵原孤石亭園區內仲可以搭船環遊江水，近望大自然塑造出嚟嘅奇岩怪石，有機會嘅話，大家不妨可以去鐵原體驗一場奧妙嘅大自然之旅！
江原道韓劇拍攝地「原州」
1. 原州小金山懸索吊橋（소금산출렁다리）
- 地點：강원 원주시 지정면 소금산길 14
- 時間：09:00 - 17:00
- 價格：₩3,000
「原州小金山懸索吊橋」全長200米，係全韓國最長嘅吊橋，喺橋上可以觀覽蟾江、原州市同京畿道嘅美景，係好多遊客嚟到都鍾意嘅地方。
同時之前韓劇《雖然是精神病但沒關係》都有嚟取景，當時金秀賢同徐睿知嚟度呢到約會，兩個人仲坐咗喺長櫈到自拍。
仲有韓綜《無限挑戰》其實都有嚟過，當時畏高嘅劉在錫被派嚟喺橋上打掃，嚇到佢都唔敢開眼，一直喺度震。
小金山懸索吊橋位於艮峴觀光地（간현관광지），計劃於未來成為一個有纜車、展望台等設施大型嘅觀光園區。
平日上晝就已經有好多人嚟，人氣絕對唔係講笑，大家之後去原州一定挑戰吓啊！
2. Museum San（뮤지엄SAN）
- 地址：강원도 원주시 지정면 오크밸리 2길 260
- 時間：博物館本館10:00 - 18:00、James Turrell館10:30 - 17:30、冥想館10:25 - 17:05
原州嘅「Museum San」將大自然作為藝術教室，隱藏喺山中，外部以混凝土建造而成，係一個以「極簡風」作為主題嘅建築。呢度主要分成咗野外花園、紙博物館、美術館、James Turrell館、冥想館等園區。
水上花園係一個寧靜空間，博物館主體建築經由水倒映，彷彿漂浮喺水面上。
tvN《我的上流世界》
之前韓劇《我的上流世界》就有喺度取過景。
Maxim 廣告
就連孔劉之前拍嘅咖啡廣告都喺度影！各位孔太有冇好心動呢？
TWITTER：BTS_TWT
就連熱愛藝術，鍾意去美術館嘅BTS的隊長RM都有去打卡！各位A.R.M.Y會唔會想跟住去呢？
江原道韓劇拍攝地「江陵」
1. 注文津港（주문진항）
- 地址：강원도 강릉시 주문진읍 해안로 1597
江陵景點「注文津港」係出名拍韓劇《鬼怪－孤單又燦爛的神》拍攝地之一，好多人嚟度都會好似女主角恩倬（金高銀飾）咁戴住紅色頸巾影相。
喺江陵注文津港碼頭附近，有租借花束嘅「阿珠媽」，大家可以好似韓劇咁影返幅靚相。
江原道韓劇拍攝地「橫城」
1. 美術館白樺林（미술관자작나무숲）
- 地址：강원 횡성군 우천면 한우로두곡5길 186
- 時間：10:00 - 17:00、逢星期三休息、星期四只有係公眾假期會開
- 入場費：20,000韓幣（包括飲品同零食）
顧名思義呢座博物館位於白樺林嘅中央。你會發現呢到有2個展覽室、一個係Studio Gallery，另一個係民宿。 周圍被花草包圍，嚟到呢到你會覺得好舒服同放鬆。
Studio Gallery入面仲掛住咗藝人嚟過嘅相，就好似之前韓劇《森林》朴海鎮、曹寶兒都有嚟過打卡，韓綜《兩天一夜》都有嚟取景。
BTS Winter Package 2021 都係喺呢度嘅民宿影！
江原道韓劇拍攝地「束草」
1. 束草外甕峙散步道（외옹치바다향기로）
- 地址：강원 속초시 대포동 656-14
- 時間：夏季 06:00 - 20:00、冬季 07:00 - 18:00
外甕峙散步道係束草以南嘅一個小海灘，呢度有一條可以欣賞到風景優美嘅海濱步道。之前宋慧喬同朴寶劍嘅《男朋友》就喺度拍。
由束草外甕峙散步道南端開始，由入口行7分鐘左右就會見到一個小型軍事基地。
呢度嘅海景真係好靚，大家一定要嚟睇吓！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
