韓國人好鍾意行路？
韓國人到底有幾鍾意行路？韓國人由明洞行去東大門只要XX分鐘？
Hello，大家好 ，我哋係由韓國人每日提供最新韓國旅行資訊嘅Creatrip。
唔知大家之前嚟韓國旅行，有冇發現韓國好多地方都要行好多路呢？另外韓國人行路非常之急，又係唔係真嘅呢？今日小編一一為大家解答！
韓國人好鍾意行路？
你知唔知邊個國家/地區嘅人行路最多？
喺2017年，根據史丹佛大學對全球46個國家或地區進行調查，香港人口平均每日行6,880步，韓國排第八，平均每日行5,755步。而全球人口每日平均行4,961步。
韓國人行路真係好快？
相信好多人嚟韓國旅行嘅時候，都會留意到韓國人行路特別快（香港人都一樣快，但急嘅程度有啲唔一樣。），特別係喺地鐵站或高峰時段，一來逼二來又要衝，根據韓國交通研究所2002年一項調查，韓國人步行速度係 4.8 公里/小時，即 1.33 米/秒，如果由明洞行到東大門距離係 2.7 公里，韓國人只係需要用大約 35 分鐘就會去到。
韓國人鍾意行路嘅原因
1. 環境好
韓國人鍾意行路嘅最大原因，應該係好多屋苑附近都有公園，令韓國人隨時隨地都可以出嚟散步。加上韓國天氣相當涼爽，唔單只韓國人，小編都鍾意喺韓國周圍行。
2. 鍛煉身體
行路算係一樣比較輕鬆嘅運動，適合唔鍾意體力消耗嘅人。尤其喺韓國返工，好多時成日都要做到OT，平時幾乎冇咩時間可以鍛煉，所以佢哋寧願喺日常生活中行多啲。
首爾大多數人口平均每日行40分鐘，或約2.7公里，所以呢個可能係韓國人就算唔多運動，身材都可以keep得好好嘅原因。
另外韓國仲有一啲apps，只要行路就可以賺錢，之後再換其他嘢食或嘢飲！
3. 減輕壓力
每個人都會有壓力，有啲韓國人會揀散步去減壓。呢個係最簡單、最方便嘅方法。另外，韓國四季分明，就算行同一條路，周圍嘅氣氛同景象都唔一樣，行嘅時候每一次都有唔同感覺。
身為香港人嘅小編平時無論喺香港定韓國都一樣好鍾意行路，唔知大家又有冇計過自己一日平均行幾多路呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
