Hello，大家好，我哋係由韓國人每日提供最新韓國旅行資訊嘅Creatrip。
早前熱播嘅《無法抗拒的他》大家有冇追呢？當中宋江都講過唔少性暗示嘅說話，除咗大家有聽過「嚟唔嚟我屋企睇蝴蝶？」（나비 보러 살래?）之外，其實韓國仲有好多句「性暗示」句子，當中大家又知幾多句？
18+韓國性暗示說話（18禁）
小編喺講解之前先戴定個頭盔🪖以下句子可能喺日常生活都會講到，未必係包含有性暗示嘅意思。最緊要係取決於當時情況，同對方係咩關係。
譬如韓國性暗示句子當中，「去唔去我屋企食碗拉麵再走？」（라면 먹고 갈래?），如果係朝早同朋友傾偈可能只係單純問一唔一齊食，但如果係夜晚…咁就有啲難講
1. 去唔去我屋企食碗拉麵再走？
（라면 먹고 갈래? ）
SBS
就算唔係韓國人，應該都會聽過라면 먹고 갈래? （去唔去我屋企食碗拉麵再走？）呢句對白可以話係性暗示句子中嘅經典，好多時講完之後男女主角就會有後續
2. 飲杯咖啡再走？
（커피 한 잔 하고 갈래?）
MBC
커피 한 잔 하고 갈래? 即係飲杯咖啡再走？韓國人鍾意飲咖啡大家都知，如果只係去cafe都只會普通想傾多陣偈再走，但如果係夜晚，cafe閂哂門叫人去屋企飲，好多時即係有性暗示（不過真係唔排除對方屋企可能係有咖啡機，呢一點好難講 ）
3. 去唔去我屋企睇完Netflix再走？
（넷플릭스 보러 갈래?）
넷플릭스 보러 갈래？即係去唔去我屋企睇完Netflix再走？而家科技發達，每個人隨時隨地都可以用手機睇，但如果異性邀約去屋企，好多時都係有另一個意思.....
4. 啊媽啊爸去咗旅行，我好肚餓，Oppa嚟唔嚟食炸雞再走？
（엄마 아빠 여행 갔는데 나 지금 배고파 오빠 치킨 먹고 갈래? ）
呢句係出自之前Xiumin同Jimin合唱嘅《Call You Bae》，當中Jimin講到「啊媽啊爸去咗旅行，我好肚餓，Oppa嚟唔嚟食炸雞再走？」（엄마 아빠 여행 갔는데 나 지금 배고파 오빠 치킨 먹고 갈래?），其實都係性暗示句子。
5. 打舖機再走啦
（그냥 게임 한 판 하고 가라）
그냥 게임 한 판 하고 가라字面上意思係「打舖機再走啦！」， 但如果係邀請好少打機嘅人去屋企玩，可能會被誤會有性暗示嘅意思。
6. 우리 집 고양이 보러 갈래?
去唔去我屋企睇完貓再走？
可能係最可愛嘅性暗示句子 因為貓係主子，大家都會對佢好小心好愛錫。不過當然有可能對方屋企係有養貓，想大家去睇同一齊玩。
7. 之前借俾我嘅CD而家諗住還俾你，入嚟啦。
빌렸던 CD를 돌려줄테니 잠깐 들어와
如果對方真係有借到CD可能都冇特別意思，但如果係藉口，就可能會講呢句想人哋留底。
8. 去唔去睇蝴蝶？喺我屋企
나비 보러 갈래 ? 우리 집에
JTBC
呢句係宋江喺《無法抗拒的他》，對住韓韶禧講嘅，有睇呢套戲嘅話都發現宋江講咗好多賤男先會講嘅說話，而呢句去唔去我屋企睇蝴蝶？明顯就係有性暗示…因為講真喺日常生活好少會聽到，甚至有幾多人真係喺屋企養蝴蝶呢？
喺日常生活中呢啲句子可能都會用得到，但同時亦會有性暗示嘅意思，當中真係好需要睇係咩情況或者同對方係咩關係。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
