韓國大學生網上搶科文化
韓國大學生網上搶科同搶演唱會飛一樣咁難？想嚟韓國讀大學嘅朋友要留意！有啲Tips可能幫到你！
Hello，大家好，我哋係由韓國人每日提供最新韓國旅行資訊嘅Creatrip。
眨吓眼又咁快到九月，韓國大學生第二學期即將要開始，不過大家有冇聽過喺韓國搶科就好似搶演唱會飛一樣咁難呢？如果大家有計劃之後嚟韓國大學讀書，好奇係點搶科，咁就一定要睇落去，話唔定可以有少少Tips幫到大家。
韓國大學生網上搶科文化
韓國大學生時間表
韓國同事Year 3、Year 4時間表
韓國大學每一科都有分1-3個學分，每一個學期平均可以讀15至24學分（每間學校唔一樣），除咗係開始要準備搵工嘅學生之外，基本上韓國學生每個學期都會讀5-7科。不過有啲科就算自己想讀都未必一定會申請到，因為有時入到網站1秒內已經俾人搶曬，一啲都唔容易，以小編為例，試過咁多次都只係得一次成功。
大學生搶科方式
1. 先到先得（선착순）
呢一個方法係最常見亦都係最古老嘅方法之一。喺1970-1980年代，當時科技仲未咁先進，未有網上搶科，以前只要寫上自己想讀嘅科，之後俾教授確認就可以，所以以前好多學生為咗快啲俾教授批，喺搶科當日嘅前一日凌晨，已經喺教授Office門口度排緊隊。
雖然而家唔需要由凌晨開始喺教授Office門口等，不過有啲特別熱門嘅科目，只要一入到去網站就可能1秒已經俾人搶曬。所謂熱門嘅科目除咗有內容比較有趣、易拎高分之外，有啲仲係必修科，如果搶唔到學生都會好苦惱，呢一部份會喺下面詳細講解。
只要由搶科當日開始，唔少學生都會見過以上呢個畫面，佢主要係話俾你知前面有幾多位學生喺度等緊，同埋要等幾多秒。人數越多即係你想讀嘅科可能會俾人搶先，位置就越嚟越少。
小編以上圖為例，左邊係成功申請哂6個科目，右邊只係申請到三個。（上面排嘅係自己想讀嘅科，如果空白即係已經搶哂，之後科目會顯示喺下面欄，但如果搶唔到嘅話上面一直都會有原本嘅科目。）當時小編可以all kill係因為等待編號係62，不過下一次只係申請到三科係因為前面已經有超過1000個等待編號…所以搶科只係滑鼠撳遲1秒，影響已經可以好大。
另外每間學校搶科制度都唔一樣，有啲可能係分學年，有啲可能係學系，到時就要喺指定日子去搶。因為如果全校學生一次過入網站，好容易會down機。以中央大學為例，學校係以學生證分咗單數同雙數學生去搶科。
2. 優先順序（우선순위 기준）
除咗有先到先得制度之外，亦有一種叫做優先順序。以淑明女大為例，喺第一次選科嘅時候可以先將自己想讀嘅科排版，之後喺網頁嘅右上角會有一個叫做本人順位（본인순위）, 呢個Number係代表自己學年，係唔係主科生而決定，另外仲會睇上一個學期嘅GPA。（不過如果專攻/教養選修課排名都有唔同標準，大家可能要跟返學校官網去睇。）
呢個排名會不斷咁樣變化，所以都要好睇眼色，假設有一科只係收40位學生，但如果自己係排41，咁有可能未必讀到，喺呢啲時候可以做嘅，一係轉上其他堂，一係就等頭40名嘅學生有人自動放棄。喺第一次選科時間完咗，之後有一日就可以再睇吓自己申請成唔成功，如果唔成功就要再以先到先得形式去搶科。
3. 投注里程（마일리지 배팅）
연세춘추由2015年第二個學期開始，延世大學出咗一個叫做延世toto（연세토토）嘅搶科制度，呢一個制度有啲似係賭博形式進行咁。
假設00學號學生，一個學期最多讀18學分，學校會將佢自動乘4倍，咁最多會有72里程分，大家要用呢72分搶6個學科。當然如果用得越多里程分可以搶到嘅機會越高。不過就算幾想讀嗰科都好，都唔可以一次all in哂所有里程，如果唔係用晒就冇得申請其他科目，另外有啲科目仲有限制最多只可以用12/18/36個里程。
雖然聽落比起一般先到先得好似更加有機會搶到想讀嘅科，但呢樣真係好考你投資投得好唔好，同埋要睇其他人眼色。
但咁樣同時都會發生一個問題，就係有啲比較熱門嘅科目學生真係會用晒最多36個里程去投資，呢啲時候如果超過收生人數，就會用優先順序去揀，例如係咪專攻/係唔係就畢業嘅學生/呢個學期申請咗幾多科等去排名。
4. 自動申請制度（자동 신청제）
另外有啲學校會自動幫大家去安排讀邊一科，尤其係大學Yaer1第一個學期，雖然唔需要搶科少咗一個壓力，但有一個缺點就係自己冇得去改時間。
每一間學校申請搶科制度都唔一樣，大家入學之前最好都要留意清楚。
成功搶科秘訣
雖然仲未開學，但唔少韓國大學生已經為咗搶科而好煩惱，到底點先可以成功搶到好科呢？
1. 去網吧（PC방）或者用規格比較好嘅電腦
好多大學生喺搶科當日都會去網吧，因為比起平時我哋屋企用嘅電腦或者手提電腦更加快同埋性能比較好。當然未必一定要去網吧，有啲高手可能只係用手機就已經可以All Kill，最重要嘅都係手要夠快！
2. 好好check伺服器時間
韓國有一個網站叫做Navyism（네이비줌），大家只要喺上面打學校名或者網址，就可以準確睇到學校搶科伺服器嘅時間。
除咗搶科之外，唔少人喺搶演唱會飛、音樂劇飛都會用去睇時間。
3. 行捷徑
因為搶科競爭好激烈，有啲人可能會選擇行捷徑，就係叫屋企人或者朋友喺唔同地方入去搶科，不過隨住學校不斷發展，已經好努力阻止呢件事發生，想行捷徑都越嚟越難。
如果搶科失敗會點？
俾咁貴學費，但又讀唔到自己想讀嘅科真係太可惜，咁呢啲時候可以有咩解決方法呢？
1. 讀其他剩底嘅科
如果喺第一次選科揀唔中，多數都仲會有第二次機會，呢個時候大家就可以重新排自己時間表，一係揀剩低有位嘅科，或者可能本身自己揀咗之後唔想讀都可以轉其他有位嘅科。不過比起係自己想讀嘅堂，好多時都係因為為咗砌夠學分而讀，好彩可能係一個令人滿意嘅科目，唔好嘅話就要頂硬上。
2. Send email俾教授
如果搶唔到好嘅學科，唔少學生都會用9秒9時間send email俾教授，好多時都要睇情況，有啲教授可能會開多幾個位俾其他學生入，有啲可能因為收得太多email，而拒絕學生要求。
甚至如果有啲係大四學生，因為差一科搶唔到，而畢唔到業嘅話，呢個時候有啲教授都會再額外開多幾個位。
3. 計劃Plan B
搶科之前大家可以事先準備Plan B/C，就算一開始搶唔到自己想讀嘅科，都可以揀第二啲科目去取代。
唔好嘅例子
以前有啲學生知道某啲科目係特別搶手，就算自己唔想讀都會搶咗先，搶完之後仲會以高價賣出去，當有人買嘅時候，佢哋多數通常都會喺凌晨少人嘅時候進行。不過自從學校發現到呢個行為之後，佢哋都諗到一個方法係，當有一個學生取消，唔會即刻更新學校網頁，之後會再喺特定日子再公開。
唔知今日講解完大學搶科文化之後，大家有冇了解更多呢？如果大家之後有計劃嚟韓國讀大學，希望大家都可以搶到好科！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
