韓國AI模特兒
韓國AI模特兒激似真人！真假難分！唔少公司都慢慢寧願用AI唔再用真人？
Hello，大家好，我哋係由韓國人每日提供最新韓國旅行資訊嘅Creatrip。
大家有冇聽過AI模特兒（버추얼 모델）呢個字呢？ AI模特兒（버추얼 모델）、AI KOL（버추얼 인플루언서）、數碼人類（디지털 휴먼 ）等，其實都係指虛構人物或角色。隨住科技嘅進步，呢啲AI人物唔單只活躍於社交媒體或YouTube，甚至會出現喺電影廣告或者雜誌。今日就等我哋一齊睇吓韓國都有咩AI模特兒啦！
AI模特兒係指？
AI模特兒實際上即係「虛擬人物」。 佢哋並唔係真人，而係模仿人類嘅虛構人物。 隨住3D模型同AI deepfake技術發展，最近AI模特兒同真人越嚟越似。
AI模特兒係一個非常創新概念， 韓國最初AI模特兒喺1998年就可以搵到，佢係韓國第一位網絡歌手叫아담（Adam）。 佢係韓國IT企業最初爲咗整「ADAM軟件」（아담소프트）而製作嘅初期模特兒。
當時Adam活動咗大約一年半，發行咗兩張完整專輯。 賣出大約200,000張專輯，可以話係相當成功。 但可惜20年前嘅科技技術好難令Adam繼續活動，除咗專輯同MV之外，其他活動嘅資金同技術都受到限制，加上Adam外表同真人仲係有啲差距，所以對人嚟講冇太大吸引力。
不過喺20年後嘅今日，科技技術一直有好大嘅進步，唔單只喺韓國，甚至世界各地都出現好多AI模特兒，好多公司都積極用佢哋。就好似美國初創公司Brud創建嘅AI模特兒Lil Miquela（릴 미켈라），聽講佢喺2019年擔任各種品牌Model，賺咗大約130億韓幣（約HKD 8640萬）！
最近好多AI模特兒外表幾乎同真人冇分別，甚至令人好難分，透過先進科技技術，佢哋所做嘅動作亦都非常自然，AI模特兒好多時都可以喺TikTok 或者 YouTube 上見到佢哋翻唱。
為咗可以令人覺得有真實感，呢啲AI模特兒都有特定個性。AI模特兒經常會同社交媒體上嘅人互動同溝通，唔單只外表做得似，就連人嘅一舉一動都似足，而喺交流嘅時候可以培養親密感同增添樂趣。
韓國AI模特兒介紹
ROZY （로지）
로지 공식 인스타그램
ROZY係2020年8月 Sidus Studios 創建嘅AI模特兒。佢被設定為一位對旅行、瑜伽、時尚同環保生活感興趣嘅22歲女性。 ROZY就好似平常人咁，佢玩咗IG大約 4-5 個月，喺2020年12月30號透露自己係一位AI模特兒。最令人驚訝嘅係喺公開之前，竟然冇人唔知佢唔係人類。
目前ROZY IG大約有49,000位Followers，佢同時積極活動，例如為韓國企業集團新韓生活（Shinhan Life）擔任電視廣告模特兒。 因為後生、活潑、成熟嘅形象，深受好多韓國人喜愛。
來兒（래아）
來兒（래아）係韓國企業集團 LG 電子喺 2021年1月推出嘅AI模特兒。 來兒嘅名來源於漢字 來（래）同 兒（아），意思係「嚟自未來嘅孩子」。 來兒係一位居住首爾23 歲女性，佢將來想成為一名創作歌手同 DJ。 甚至而家營運緊SoundCloud。
目前，來兒會成日喺自己IG post一啲日常生活照，同接受時尚雜誌嘅採訪。
Sua（수아）
Sua係作為即時3D開發平台Unity嘅獨家廣告模特兒，佢被評價為目前咁多AI模特兒之中最似真人同最自然嘅一位，所以佢喺IG同TikTok都相當活躍。
Rui（루이）
Rui係一位AI模特兒YouTuber，佢仲有自己一個頻道叫「Rui Covery」 。 佢主要上傳翻唱歌曲或編舞Cover、Vlog等等。 當Rui一直以YouTuber身份活動嘅時候，突然講佢係自己其實係AI模特兒，唔少網民都留言話估唔到！
RUI係用咗AI深度學習技術所創建，藉由無數人嘅面部數據，再用人工智能創造出新嘅虛擬面孔，同真實演員一齊拍片。如果大家有睇過佢嘅片，會覺得佢動作同表情都好自然，就好似同真人一樣咁。
Eternity （이터니티）
Eternity係韓國首創AI虛擬女團。 喺創建類似人類嘅外觀之後，佢會直接同拍攝MV合成。 最搞笑嘅係佢會好似選秀節目《 Produce 101》咁，Eternity亦都通過一個名為「 AI Heart Attack Challenge 101」 嘅投票而被選出嚟。 佢哋首張單曲仲叫《I'm Real》，目前喺 YouTube 已經有 770,000 次觀看紀錄。真係令人好奇之後佢哋會有咩發展。
點解會用AI模特兒？
目前好多公司都用緊呢啲AI模特兒進行營銷活動，但點解公司寧願用AI都唔用真人呢？
1. 針對熟悉社交媒體同虛擬現實嘅MZ 一代
MZ 一代非常熟悉社交媒體同 YouTube等。 加上疫情爆發之後，喺現實生活中受到好多限制，虛擬現實（가상현실）同元宇宙（메타버스）慢慢流行起嚟。 所以只喺虛擬現實中工作嘅AI模特兒足以引起MZ一代興趣。呢個就係點解Start up公司到大企業，都想引入AI模特兒市場發展。
2. 時間同空間限制較少
AI模特兒最大優勢之一係佢哋唔受時間同空間嘅限制。 公司製作起嚟非常方便，因為所有場景都可以用CG增強現實感。 同真人唔同嘅點係，佢可以同時喺多個地方使用，亦唔會因為隨住時間嘅過去而老化或死亡，所以佢比真人具有更大商業潛力。
3. 同公司形象吻合嘅AI模特兒
真人同AI模特兒分別最大係，公司冇可能控制到真人，如果用真人，可能會因為佢哋嘅私生活嘅事而有爭議，喺公司角度嚟睇，就會等同拎住一個唔知幾時會爆嘅計時炸彈，但用AI模特兒就唔會有呢個問題。
另外，AI模特兒可以根據公司想要嘅追求方向去設計，例如AI模特兒隱私、個性、品味等都係由公司決定，可以根據趨勢靈活改變。 換句話說，喺公司角度嚟睇，用AI模特兒嘅營銷可以話係一個非常具有挑戰性嘅領域。
隨住科技嘅進步，韓國各企業都用上AI模特兒，唔知將來嘅發展又會係點呢？真係好令人值得期待！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
