Hello，大家好 ，我哋係由韓國人每日提供最新韓國旅行資訊嘅Creatrip。
韓國射箭女選手安山今年只係20歲，係最年輕嘅選手。第一次參加奧運就奪得3面金牌！之不過比賽時佢剪咗短髮，同埋佢讀女校，再俾人搵返佢好耐以前喺SNS度用過「5兆5億」（오조오억）、「Oong Ang Oong」（웅앵웅） 被認為係嫌男嘅字，遭到部分韓國男性猛烈批評，話佢係「女權主義」嘅支持者，仲要求佢歸還金牌。 韓國嘅「女權主義」問題再次引發關注。
究竟點解韓國男性對「女權主義」咁敏感呢？
韓國男性對「女權主義」敏感嘅原因
韓國社會存在性別不平等嘅現實
雖然被世界公認為經濟、技術同文化強國，韓國社會仍然存在男女不平等嘅現象。最明顯可以睇到嘅係工作方面。韓國嘅性別薪酬差距係發達經濟體中最大。根據韓國性別平等部2021年5月嘅一項調查，第一季度有2,246間公司喺股票市場上市，32,005名董事中只有1,668名（5.2%）係女性。金慶善副部長表示，呢個比率遠低於經濟合作暨發展組織（OECD）成員國25.6%嘅平均水平，仲被《經濟學人》評為係OECD國家中，女性工作環境最差嘅國家。
女權主義幾時開始成為社會嘅敏感話題？
韓國係一個深受儒家思想影響嘅國家，自古以來男生一直受到重視，地位高於女生。隨著時代嘅變遷，社會嘅進步，韓國女性逐漸喺經濟上更加獨立，對自我價值、男女平等權利嘅睇法亦有變化，慢慢佢哋就企出嚟為性別平等而鬥爭。
喺2016年5月，一名23歲嘅女仔喺首爾江南站附近一間戲院嘅洗手間俾一名34歲嘅男子以「因為我討厭女性」一個非常不合理嘅理由殺害。 呢一件事將韓國嘅性別歧視嘅問題推上最高峰，喺社交網絡上引發諸多爭論。
一個喺2015年8月成立嘅網上女權主義組織「Megalian」 (메갈리아) 對呢次案件感到非常憤怒，之後喺Megalian網站發表大量負面嘅信息，對抗男性嘅不當行為。 喺嗰個網頁，女性可以隨意發表對男性嘅惡意評論。慢慢，由為女性爭取公平，維護女性權利，演變另一方面嘅性格歧視，言論越嚟越極端，最後喺2016年閂咗個網站。
後嚟到2019年上映嘅電影《82年生的金智英》，改編自2016年嘅同名小說，內容講述一個女性為咗養育子女同家庭而不得不放棄職場生活嘅人生。呢部電影再次引發女權主義嘅爭議，被韓國男性強烈排斥，指內容嘅描繪只由單方面出發，而且太過誇張，現實並非如此。20、30多歲嘅年輕人認為，40、50多歲嘅女性喺舊社會確實遭受到好多唔公平，但而家20、30多歲嘅女性已經冇呢啲唔公平嘅待遇，唔可以將所有責任都怪落男人身上，話男人令佢哋嘅生活變得困難。
亦都因為咁，韓國年輕男性越嚟越討厭「女權主義」，認為自己係女權主義下嘅受害者，佢哋都開始組織反對女權主義、維護男性權利嘅團體。自此之後，無論係邊個，只要發表擁護女權言論，一啲男性就會用侮辱性嘅語言攻擊女權。好似係秀智、 Red Velvet Irene、AOA雪炫，喺SNS度講過一啲維護女性嘅說話，就被鬧得好慘。
點解韓國男性對女權主義咁敏感？
1. 男性擔心失業，認為國家政策唔平等
喺過去10年，韓國青年失業率由6.9%增加到9.9%。 喺就業日益困難嘅情況下，政府俾女性進入勞動力市場嘅計劃，令到競爭更加激烈，引起韓國男性站企出嚟抗議。
2017 年 11 月，韓國性別平等部製定了一項五年計劃，為女性喺公共、私營機構創造工作機會。機構仲鼓勵大公司僱用更多女性，令到以往一直以男性員工為中心嘅社會開始變革，韓國男性就擔心自己求職上嘅劣勢。特別係韓國男性要當兵2年，同一個年齡段嘅同一職位，佢哋就會比女性缺乏經驗，所以認為呢啲政策對佢哋唔公平。
2. 女權運動被濫用
雖然女權運動係合法嘅，不過喺韓國被濫用為政治工具。文在寅總統參選時承諾要成為消除性別歧視嘅總統。2017年當選之後，為女性創造工作機會、推出維護女性權益嘅政策，但就冇針對男性嘅政策。
女權運動亦受到政府、藝人嘅支持。由高層官員到演藝圈明星，甚至一般嘅韓國男性，發生過多次性醜聞。
韓國社會上都舉行過唔知有關性別嘅運動，例如：#Metoo – 告發被隱藏嘅性侵運動，#Escapete Corset – 反對嚴格審美標準嘅運動。
呢啲運動令社會陷入緊張嘅狀態。 韓國男性，特別係年輕男性越嚟越慎重，喺公共場所同女性保持距離。根據Ipsos今年嘅調查，韓國喺28個國家之中，性別間嘅衝突程度排名第一。
另外，保守嘅反對黨利用呢個分裂情緒喺2022年3月總統大選獲得支持，事情就變得更加複雜。今年6月，帶起對GS25連鎖便利店嘅攻擊浪潮嘅男權活動家李俊錫，當選成為右翼人民力量黨領袖。鑑於年輕人正成為「反向歧視」嘅目標，李俊錫有望喺黨內發揮相當大嘅影響力，作為總統候選人贏得巨大支持。
李俊錫嘅影響力同競選策略令韓國年輕男性越嚟越覺得自己受到唔公平嘅對待，女權主義唔再係爭取性別平等嘅鬥爭，而被塑造成女性打倒男性嘅有力工具。
父權社會、性別歧視係老一輩嘅問題，而家仲被政治濫用，結果大眾對女權運動嘅仇恨越嚟越大。
以上就係小編針對現時韓國社會，同韓國女權運動成為社會敏感問題嘅分析，唔知大家對韓國嘅「女權主義」、韓國男性嘅想法多咗了解呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
