韓國直播文化
媲美韓星人氣嘅網上直播BJ，究竟係做啲咩㗎呢？做BJ真係咁好賺？
Hello，大家好 ，我哋係由韓國人每日提供最新韓國旅行資訊嘅Creatrip。
大家知唔知咩係BJ呢？ BJ係Broadcasting Jockey，即係指喺網上做直播嘅人。 喺韓國，BJ嘅影響力可以好大，高人氣嘅BJ分分鐘勁過一般藝人！呢一種網上直播自由度大，可以見到各種形式嘅內容，不過同時亦都帶嚟壞處。今日就同小編一齊了解一吓韓國嘅網上直播文化啦。
韓國直播文化
呢種實時網上直播，唔只韓國，其他國家都非常流行。韓國係由2000年初開始有進行直播嘅平台， 起初好多人都以個人興趣做節目，但隨住網上節目市場逐漸壯大，越嚟越多人將直播當成副業，甚至正職。
根據2018年嘅資料顯示，韓國人最常用嘅網上節目平台「afreeca TV」，一個月平均大約125萬8千名用戶，一個月平均總收看時間達5億6千萬分鐘。 第二個經常使用嘅平台「Twitch」，一個月大約有90萬8千人，觀看5億8600萬分鐘。之後韓國大企業NAVER同KAKAO都加入一人網上廣播市場，韓國嘅網上廣播廣播市場持續擴大。
網上廣播平台
1. afreeca TV
afreeca TV係「Anybody can Freely Broadcast TV」嘅意思，係韓國第一個可以做網上廣播平台嘅網站。以前都過類似形態嘅網上平台，但實際等同係色情網站。
而且，當時網上廣播文化未好流行，所以2006年afreeca TV首次登場嘅時候，造成轟動。 無論係邊個、何時何地，只要唔違背基本營運原則，咩主題都可以自由播出，係非常令人驚訝嘅事。
文章最初提過喺韓國做網上廣播嘅人叫BJ，呢個稱呼都係出自afreeca TV嘅廣播系統。當時其他平都有另外嘅叫法，不過因為afreeca TV實在太出名，所以後嚟都叫網上廣播嘅人總稱做BJ。
2007年開始出現「星氣球」(별풍선)系統。 「星氣球」係afreeca TV製作嘅全球第一個為1人廣播者贊助嘅系統。 一個星氣球值110韓元。 BJ儲夠某個數量嘅星球氣之後，就可以兌換成現金。 就咁樣有咗明確嘅收益來源，一人網上廣播就開始成熟。
afreeca TV嘅廣播整體上有啲偏為刺激。 以取代本身限制較多嘅電視嘅形象登場，由初期開始就容許刺激性發言或辱罵，呢種氛圍一直延續到而家。 afreeca TV除咗傾偈、送星氣球之外，就冇其他可以雙方溝通嘅方法， 所以好多afreeca TV嘅BJ為咗引觀眾笑而出盡全力。
2. Twitch
Twitch係美國亞馬遜網站嘅網上廣播平台，係全球最大規模。 初期以遊戲廣播為主，而家喺其他領域都有做節目。 2015年，Twitch增加咗韓國服務器，同韓國人氣遊戲BJ簽合約，正式開始進軍韓國網上廣播市場。
之後，2016年afreeca TV被爆佢哋向BJ提出唔正當嘅要求，以各種理由要求支付費用，或者禁止其他平台播放等，對BJ拖加制約。 導致好多afreeca TV嘅人氣BJ紛紛轉移到Twitch。
Twitch可利用Twip、Toonation等其他贊助平台，向個人廣播者提供贊助。 喺Twitch會稱呢啲贊助「donation」。 Twitch donation最大特點係，喺贊助嘅同時可以附上message、語音、影片。
如果一邊做donation，一邊適當咁加埋message、語音、影片，觀衆都可以喺融入節目入面，一齊為大家帶來笑聲，所以同afreeca TV好唔同，Twitch嘅觀衆都可以引BJ或者其他觀衆笑！ 而家韓國好多流行語都係嚟自Twitch嘅。
3. YouTube Live
YouTube提供嘅實時streaming服務嘅YouTube Live都好多人用。 YouTube喺幾乎所有人都用嘅App，所以喺YouTube Live嘅話可以接觸到好多人。
用YouTub Live做廣播嘅話，會喺YouTube上自動保存重播，所以對經營YouTube頻道嘅YouTuber嚟講係一個好大嘅優點。不過YouTube Live一般都係已經有一定數量觀衆觀看嘅YouTuber或BJ進行。 訂閱者達到1000名以上，先可以喺手機上做Live，呢個都係其中一個限制。
4. 其他
除咗前面介紹嘅三個平台之外，仲有一啲相對細型嘅平台。 最具代表性嘅就係韓國大企業Kakao同NAVER的Kakao TV、NAVER TV。 最近亦都流行電台形式嘅「Spoon Radio」。另外仲有「popkontv」等成人廣播嘅專用平台。
網上廣播嘅種類
網上廣告有好多種類，下面介紹一啲其中韓國最具代表性、最有人氣嘅節目種類。
1. Talk播
「Talk播」顧名思義就係同觀衆傾偈嘅廣播。 Talk播嘅BJ大多數都好識同觀眾互動，會以真實、有趣嘅方式，講述自己經歷嘅故事。
2. 吃播
「吃播」就係BJ展現自己食嘢嘅樣，呢種廣播喺韓國大行其道之後，海外對將韓文「먹방」（讀音：Mukbang）直譯成「吃播」， 有啲會一邊食嘢，一邊同觀衆傾偈，亦有啲會專注食物，特別播放食嘢時發出嘅聲音（ASMR）等等。
3. 煮播
煮播就係烹飪類嘅廣播。 擅長煮嘢食嘅人會透過廣播教大家食譜，一邊煮一邊同觀衆交流。
4. Game播
풍월량 방송
Game播就係關於打機嘅廣播。 BJ會喺節目度影自己玩online game、手機遊戲、遊戲機等各種畫面。 主要大畫面播住玩遊戲嘅畫面，用小畫面展示BJ嘅樣，或者播住玩遊戲嘅畫面，搭配BJ嘅聲音，同觀衆交流。
5. 學播
유튜브 노잼봇
學播就係同讀書、學習有關嘅廣播。 好似公務員考試呢啲需要長時間準備嘅人會播自己溫習嘅樣。 呢種節目通常都係見BJ好安靜咁坐喺度溫書，一坐就幾個鐘。 觀衆會一邊播住學播BJ溫書嘅廣播，一邊自己都讀書，就有種以非面對面形式，一齊學書嘅感覺。
6. 女cam / 男cam
此圖與本內容無直接關係
女cam或者男cam同上面介紹嘅種類有啲唔同。 女cam係指女BJ開鏡頭同觀眾對話嘅廣播，男cam就係指男BJ開鏡頭進行對話。
此圖與本內容無直接關係
不過單純女BJ或者男BJ開着個cam做廣播就叫咗男cam/女cam，通常呢類BJ都係冇主題，只係以展示自己出衆嘅外貌或身材為主。亦都因為咁，好多時睇呢類廣播嘅觀眾都會要求比較刺激性嘅內容，會講一啲好煽情嘅主題，BJ都會著一啲好暴露嘅衫吸引觀眾。
BJ嘅收入
한국경제
BJ嘅收入真係千差萬別。 認知度較低嘅BJ一個月可能都賺唔到5萬韓元，但係一啲人氣高嘅BJ，如果一次廣播收到100萬個星氣球，就會賺到1億韓幣。 另外，人氣YouTuber嘅廣告收益亦相當高，所以好難講得準。
2018年JTBC綜藝節目「lanlife」請咗做咗好耐BJ，亦喺韓國人氣超高嘅「대도서관」同「윰댕」出演。 윰댕表示一年平均收益大為有4-5億左右，대도서관就話除1、2月之外，平均收入有17億左右。 可見人氣BJ嘅收益有幾超乎想象呢！
網上廣播嘅限制
網上廣播雖然開啓咗內容嘅多樣性，同1人創意嘅時代，但係仍然有明顯嘅局限性。
首先，做網上廣播嘅收益非常唔穩定。 如果成功嘅話，真係可以賺到好多錢，但係為咗成功所需要嘅初期費用（廣播設備等）同努力都係相當之高。 所以唔好睇表面BJ嘅光鮮一面，就貿然投入呢個範疇。
인사이트
第二，BJ係公開自己嘅外貌同觀衆見面，唔多唔少都披露咗唔少個人嘅私隱，但係觀衆就係螢幕背後，唔會知真實身份。所以好多時BJ都要承受酸民、鍵盤俠嘅攻擊，有唔少BJ因而患上憂鬱症、恐慌症而停播。
뉴스타운
最後，最受到批評嘅就係網上廣播為咗吸引眼球，賺錢，就失晒人性、道德。 除咗前面講嘅女cam/男cam之外，仲有好多會特登用刺激性、暴力性、厭惡性嘅內容嚟做節目。
睇呢類節目嘅小朋友、青少年就最易受到影響。 如果佢哋經常接觸對他人進行身體、語言暴力，或者性商品化嘅內容，覺得呢啲好平常，就好容易養成錯誤嘅價值觀，甚至走上歪路。
以上就係最近韓國嘅直播文化。 大家對呢種嘅廣播有咩睇法呢？最鍾意睇邊種廣播呢？歡迎留言話俾我哋知。
如果有更多想知嘅內容，都可以隨時留言或者dm話俾我哋知：）
Instagram：creatrip.hk
