Gmarket應該好多人都用過，亦係韓國最大型嘅網上購物平台之一，大家係咪都以為佢係韓國品牌呢？其實都唔係錯晒嘅！最初真係韓國品牌嚟！2000年以Interpark子公司成立，喺韓國設立總部。2009年被eBay以12億美元收購，法律上係屬於eBay Korea，而eBay係美國嘅公司，換句話講，Gmarket而家變咗係美國公司。

2. Yogiyo / 배달의 민족

Yogiyo(요기요)、배달의 민족 係韓國最常用嘅兩個外賣配送app，就咁聽個名都係韓文名，之不過原來Yogiyo係屬於德國公司 Delivery Hero。

而배달의 민족係喺2010年由Kim Bongjin (김봉진)創立。喺2020年12月28號，Delivery Hero以40億美元收購其中88%股份，所以배달의 민족成為咗大半間德國公司。

3. GIORDANO

如果係香港人就應該唔會覺得GIORDANO係韓牌，之不過對其他國家嘅人嚟講，甚至部分韓國人都以為係韓國品牌。因為佢哋經常搵韓星代言，例如金宇彬、張基龍、申敏兒、Kystal、劉亞仁……等等，而且喺韓國有好多間分店。

GIORDANO係由黎智英喺 1981 年創立，係國際男裝、女裝和童裝及配飾零售，目前有 8,000 多名員工，喺全球 30 多個國家、地區有超過 2,400 間分店。

4. LION Korea

洗衣粉、洗潔精、洗手液…… 呢啲常用嘅清潔用品好多都嚟自LION KOREA，好多人都以為係韓國公司，但係其實佢係一間日本公司。

之前LION KOREA 叫做 CJ LION，由 CJ Corporation 同總部位於日本嘅 Lion Corporation 喺1990年簽約合作而成立，合約到2017年到期，而家就變返做LION KOREA。

5. KUMHO TIRE

KUMHO TIRE喺1960年就成立，同HANKOOK、NEXEN係韓國三大汽車輪胎製造商。不過喺2018年，中國青島雙星集團以39億人民幣（即6,463 億韓元/5.974 億美元）收購KUMHO TIRE 45% 嘅股份，自此成為最大嘅股東。

6. Nolboo

大家嚟到韓國旅行，唔知有冇留意到好多地方都有Nolboo 部隊鍋（놀부부대찌개）嘅連鎖餐廳呢？除咗部隊鍋，仲有賣菜包肉同炸雞等等韓式料理。 Nolboo係1987年喺韓國成立，但係 2011年12 月，摩根士丹利亞洲投資有限公司以1200億韓元收購咗Nolboo，自此之後，Nolboo 就成為一間美國公司。

7. ilahui Korea

 ilahui

就咁睇個名，見到後面有Korea，令人以為係韓國品牌，但其實係100%偽韓牌，唔係由韓國人創辦之後被收購，而係由始至終都係中國嘅品牌，目前喺亞洲有1200多間分店。

8. MUMUSO.KR

Mumuso

同上面ilahui Korea一樣，MUMUSO.KR將產品設計、包裝扮到好似韓國品牌一樣，喺2014喺韓國開空殻公司，仲聲稱自己係嚟自韓國。後嚟被揭發時改為「受韓國美學啟發」。截至2018年，喺中國同海外有大約600間分店。而家撳入佢哋官網，會見到佢哋寫住「仲以為我哋係嚟自韓國？唔係啊！我哋可以好自豪咁話你聽，我哋係嚟自中國」，相當口響。

9. minigood

 minigood

minigood又係一個偽韓牌，產品包裝、說明等等都係韓文，風格亦係走韓式，好似啲化妝品外型設計都同真嘅韓牌好相似，令人誤以為係韓國品牌，而事實上亦都係中國品牌。

以上就係9間令人誤以為係韓國品牌，但實際上係其他國家公司嘅牌子。唔知大家驚唔驚訝呢？