Hello，大家好，我哋係由韓國人每日提供最新韓國旅行資訊嘅Creatrip。

韓國今年夏天，唔少連鎖Cafe都推出咗容量大同清爽飲品，今次小編試咗10款，而家就話俾大家知好唔好味啦！ 

韓國大容量飲品

1. Dessert 39 （디저트 39 ）

第一間想同大家介紹嘅係Dessert 39， 佢係以推出多款飲品而出名。

小編今次去特別叫咗Cheese Fromage Mango Latte（치즈프로마죠 망고라떼）同Camomile Deep Sleep（리치 캐모마일 릴렉서），容量超大，長24cm，最多可以裝到900ml！

Cheese Fromage Mango Latte (치즈프로마죠 망고라떼) 6,800 won

聽講呢款係10至20歲嘅人氣飲品，鹹鹹地嘅乳酪，加上新鮮芒果同牛奶，好好飲，而且夠清涼，好適合夏天飲。 小編去到嘅時候，都見到有唔少人會叫呢個。

Litchi Camomile Deep Sleep (리치 캐모마일 릴렉서) 5,800 won

呢個係今年夏天新推出飲品，飲嘅時候佢有一種青提子嘅味道，底部有少少荔枝蒟蒻，相當有口感，酸酸甜甜，好清新。

小編睇返介紹，原本呢本飲品入面應該要有檸檬片，但可惜當時職員冇俾到，如果有加，應該會更爽，呢度扣咗少少分。

小編去嘅係江南Dessert分店，裝修都好靚，喺嗰度可以坐喺度休息同打卡，因為佢哋做嘅飲品塑料杯都好硬身，可以飲完洗好再重用，相當環保。 

2. Paik’s Coffee（빽다방） 

Paik’s Coffee係白種元老師旗下連鎖店cafe之一，因為價錢平，用料又優質，所以唔少學生都鍾意買佢！而且喺街成日都會見到佢嘅蹤影。 

今次小編叫咗 Matcha Paik’s ccino Soft （녹차빽스치 Soft） 同埋 Pistachio Paik’s ccino Soft （피스타치오 빽스치노 Soft），唔知大家睇相又feel唔feel到佢有幾大杯呢？

Matcha Paik’s ccino Soft (녹차빽스치Soft) 4,000 won 

呢款飲品係有分兩種類型，一個係基本款，另一個係加雪糕（soft），只係睇已經覺得好涼爽。

不過對於小編嚟講，覺得上面嘅雪糕有啲太甜，如果將佢哋撈埋一齊飲，又會掩蓋咗綠茶嘅味道，所以最好分開嚟食同飲。不過以價錢4000won嚟講，真係相當之合理。

Pistachio Paik’s ccino Soft (피스타치오 빽스치노 Soft) 4,000 won 

呢款應該係新推出，而且poster度有寫上推薦兩個字，一開始小編只睇相以為係薄荷味，原來再留意先發現佢係開心果，喺韓國好少搵到開心果嘅飲品，所以見到嘅時候覺得好神奇！

不過飲嘅時候佢唔算太有開心果味，似係飲緊杏仁鮮奶，再加少少少少藥水味。  

3. GO MANGO（고망고）

如果喺香港講到芒果，大家第一時間會諗到許留山，但喺韓國就會令人諗到GO MANGO！佢主打芒果飲品，容量大之外，價錢仲要係超平！

1L Mango (1리터 망고) 3,900 won 

小編去嘅係弘大分店，嗰度只可以外賣冇得堂食，但1L嘅芒果汁只係需要3900won，相當之吸引，難怪好多韓國人都鍾意買嚟飲。 

總共分咗四層：芒果沙冰、Cream、芒果粒同埋芒果汁，好多地方都係用冷凍芒果，但呢度絕對係用新鮮芒果，呢一點好值得加分。

Mango Strawberry (망고 스트로베리) size XL 3,500 won

另一款小編試咗巨型芒果士多啤梨，兩樣都係小編鍾意食嘅水果，味道相當之好，比起就咁芒果汁，小編會更推呢一款。

小編仲拎咗手機同飲品對比， 真係超大杯！

4. MEGA COFFEE （메가커피）

MEGA COFFEE係一間典型連鎖店cafe，好多地方都會搵到佢嘅蹤影。

今個夏天佢哋推出咗好多款飲品，小編今次試咗佢哋嘅Sweet Summer Latte （스윗 서머라떼）同 Unicorn Frappe （유니콘 프라페）。

Sweet Summer Latte (스윗 서머라떼) 3,900 won 

大家睇唔睇到呢杯飲品有咩咁特別呢？上層係咖啡，下層係藍色咖啡，睇落就好似一個小沙灘咁。

味道同普通鮮奶咖啡差唔多，但呢款奶味重啲，同時偏甜咗少少，如果大家唔太鍾意飲太甜嘅咖啡，咁就唔太推薦，建議可以試吓佢哋其他新款。

Unicorn Frappe (유니콘 프라페) 4,800 won

小編一開始完全係俾佢嘅顏色吸引！買佢真係好適合用嚟打卡！

Unicorn Frappe味道幾獨特，好難形容到佢係咩味，但有啲似棉花糖加士多啤梨？相信好多少女應該會鍾意呢隻味。

5. THE VENTI（더벤티） 

最後一間想同大家介紹嘅係THE VENTI，佢係一間專門出容量大嘅飲品品牌，聽個名都知佢有幾犀利！飲品選擇多，最後小編揀咗Melon Soda（메론소다）同Unicorn Frape（유니콘프라페）。

Melon Soda (메론소다) 3,900 won 

小編本身就好鍾意食蜜瓜，所以對呢杯飲品都好有期待，可能因為加咗梳打，所以飲嘅時候會覺得好涼爽，不過有少少可惜嘅係糖漿有啲太甜。

Unicorn Frape (유니콘프라페) 4,200 won

雖然呢杯唔算好大杯，但因為小編因為俾佢嘅顏色吸引咗，就忍唔住買咗嚟試。

同樣都係，視覺睇落相當吸引，但味道偏甜，如果大家本身係鍾意偏甜嘅飲品，都可以試吓。

今日小編同大家介紹左最近韓國夏天十款巨型飲品，當中邊款大家會最想呢？歡迎留言話俾我哋知！