韓國節目幕後功臣介紹

無論係睇韓國綜藝定係電視劇或者電影，相信大家都有聽過PD、FD同埋VJ等，但大家又知唔知佢哋到底係邊個呢？喺節目入面佢哋又負責做啲咩呢？今日就等小編為大家一ㅡ講解啦！

韓國節目幕後功臣介紹

CP：Chief Producer ＝ 首席製作人

CP即係首席製作人，同時係製作總監，主要係負責策劃同管理節目嘅製作，佢哋會同生產負責人協商，以及管理人士同埋人員分配。

CP有權決定節目嘅編劇、演員、MC同埋導演等，通常喺韓國做滿10年PD之後就可以升做CP。如果以普通公司嚟計，即係董事等級，一個CP可以管理2至4個節目。

唔知大家有冇睇過韓國綜藝《兩天一夜》呢？呢個節目嘅CP就係大名鼎鼎嘅金泰浩！

PD：Producer, Program Director ＝ 製作人、節目總監

PD係一間電視台嘅製作人同埋節目策劃人，一開始韓國綜藝《Runningman》PD係由趙孝鎮、金柱亨、林亨澤三位主打PD開始，而家係由崔寶弼帶領。

PD主要負責人力資源管理、控制預算等，幾乎就等同於係導演。

而喺拍攝節目嘅過程中，PD主要係擔任指揮，所以需要好有領導能力、責任感同埋動力！同時PD仲要不斷諗唔同新嘅題材，去搞搞新意思，呢幾年喺韓國，想做PD嘅人越嚟越多。

大家應該都有睇韓國綜藝《新西遊記》，羅䁐錫PD喺2020年，年薪高達2.89億韓幣，另外仲得到超過9.4億韓幣嘅獎金，如果咁計，佢連收入就超過12億韓幣，係唔少人夢想得到嘅薪金。

AD：Assistant Director ＝ 助理指導

AD主要就係幫助PD，喺PD嘅指導下協助演出同埋製作節目，喺成為PD之前，一定要經過AD嘅過程。AD要做嘅事好多，譬如要安排演員、地點、拍攝、剪輯，同時要準備工作人員嘅食物等。

FD： Floor Director ＝ 管理舞台主任

唔知大家仲記唔記得《Runningman》初期，成日都會扮演唔同角色嘅FD東萬呢？

FD主要係管理舞台同戶外拍攝，同時要協助PD工作。

雖然FD主要係管理舞台，但一啲瑣碎事都會留俾佢哋做，所以佢哋要非常之敏捷，同埋識搞氣氛。如果喺拍攝現場，有人經過或者電話響，佢哋都要管理得好好。

VJ：Video Journalist ＝ 拍攝人員

想拍好節目，除咗要計劃得好之外，當然拍攝嘅工作人員都好重要，佢哋要記錄節目嘅每一分每一秒。如果大家有睇《Runningman》就會見到，每一位成員都會有一位VJ負責影住佢哋。

VJ除咗要識拍攝之外，仲要識剪接同埋調校燈光，喺《Runningman》入面，成日會出現嘅就係劉在錫嘅VJ柳權烈啦！

MC：Master of Ceremonies ＝ 主持

講到「國民MC」一定非劉在錫莫屬，喺節目入面佢哋扮演一個好重要嘅角色，佢哋要擔任主持，除咗要有領導能力之外，仲要識搞氣氛。

想喺韓國做MC，頭腦一定要好聰明，反應要較快，照顧到每一位嘉賓，同時要分配好每一位嘉賓談話時間。

SD：Sound director ＝ 音響導演

SD被稱為音響導演，佢哋要負責監督製作嘅時候每一個聲音，無論係對話、音效定係音樂，佢哋都要負責管理。

如果大家平時有睇綜藝節目，都會見到佢哋孭住一個好重嘅背囊去錄音，佢哋必須要確保每一位成員都有錄到，背景唔會有任何雜音。

唔知除咗以上嘅職位之外，大家仲有冇諗到其他幕後功臣呢？如果大家對其他職位有任何疑問，都歡迎留言話俾我哋知。