logo

韓國同居文化

婚前試婚?土地問題?同居喺韓國竟然變成一種職業?

Trang Pham
a year ago

Hello,大家好,我哋係由韓國人每日提供最新韓國旅行資訊嘅Creatrip


雖然社會風氣開放咗,但同居仍然係一個具爭議性嘅話題,特別係相對保守嘅韓國。 今日小編同大家一齊了解吓韓國嘅同居(동거)文化啦!



韓國同居文化

韓國同居文化現狀

韓國 同居


韓國衛生與社會事務研究所喺2019年以20至44歲之間1,140 名未婚男性同 1,324 名未婚女性為對象,進行有關同居意願嘅調查,結果得出超過 51% 嘅單身女性同意同居,比2015年大幅上升。不過提到「冇結婚計劃下同居」嘅話,就有52.3%嘅女性反對。


單身男性方面,無論有冇結婚計劃,均對同居持積極態度。超過77%嘅參與調查嘅男性表示,佢哋會「喺結婚前同女友同住」;其中56.5%嘅人同意「同居唔一定要結婚」。


就報告結果分析,男女喺同居觀念上有明顯差距,當今社會對「不以結婚為前題嘅同居」仍有好多負面嘅看法,女性面臨嘅挑戰同偏見都比男性多。



越嚟越多韓國人決定同居嘅原因

1. 睇性格夾唔夾

韓國同居文化


兩人相愛嘅時候都會表現出最好嘅一面,盡量避免嗌交。 事實上,韓國有好多年輕夫婦因為性格唔夾嘅問題,導致結婚無耐就離婚。為咗克服呢啲問題,韓國年輕人認為婚前同居係必要嘅。 只有一齊生活一段時間,先可以充分了解對方嘅壞習慣,從而決定係咪可以遷就到,適應到。同居就好似雙方婚前嘅一次考驗。




2. 減輕經濟負擔

韓國 住屋


喺韓國,一般結婚前都認為必須有自己嘅屋,但係樓價一日一日咁升,對年輕夫婦係一個好大嘅負擔。根據2020年嘅調查,首爾四人家庭嘅年收入中位數大約係5,700萬韓元,但係首爾嘅一個單位平均都超過9億韓元。換句話講,唔食唔飲,齋係呼吸,都要16年先買到樓。事實上,新婚夫婦喺首爾置業係非常困難。


另外,搞婚禮嘅費用亦非常昂貴。最平嘅都要1,500-2,000萬韓元,仲未計禮服、化妝、蜜月、影婚紗照等等嘅費用。所以,喺為正式結婚做好充分準備之前,熱戀中嘅情侶會選擇一齊住,佢哋認為呢個係減輕彼此經濟重擔嘅方式,同時又能夠相愛,舒服咁一齊生活。



韓國同居文化嘅蛻變

同居文化


目前,韓國網上有好多人談論同居。當然,好多人認為呢個係尋找真正嘅生活伴侶嘅一種方式,但亦有一啲人認為係以同居嘅名義嚟解決性慾,導致好多社會問題。

喺韓國有一個新詞「寵物男」(애완남),指嘅係20-30多歲失業嘅男性,同有錢嘅女性同居。女方會每個月俾大約150萬-300萬韓元男方,而男方喺同居期間就幫女方煮飯、洗衫等家務。


呢種文化令同居變成一種職業,更差嘅係,甚至變成一種買性嘅方式,導致好多人對同居產生唔好嘅偏見。


以上係韓國嘅同居文化變遷,唔知大家又點睇「同居」呢?歡迎留言同小編分享。




如果有更多想知嘅內容,都可以隨時留言或者dm話俾我哋知:)

 Instagram:creatrip.hk

 Facebook:Creatrip 帶你認識韓國每一面

 韓國代購

熱門文章

LoadingIcon
熱門文章