Hello，大家好，我哋係由韓國人每日提供最新韓國旅行資訊嘅Creatrip。
唔知大家睇韓劇嘅時候有冇被主角住嘅屋企吸引過呢？先唔好講大細，就咁睇擺設佈置，都好精緻，好有特色。每次見到都想學，執靚自己間房。 今日就同小編一齊欣賞吓2021年人氣韓劇，各位主角嘅房啦！
韓劇主角嘅屋企裝修設計
《愛在大都會》
人氣Netflix 原創劇《愛在大都會》中，男主角朴宰元（池昌旭飾）同女主角李恩梧（金智媛飾）嘅屋企風格相當唔同，由裝修擺設可以睇到兩個人嘅性格，一齊睇落去啦！
朴宰元：傳統與現代合一嘅坐式修
朴宰元喺劇中係一間建築公司嘅組長，所以佢嘅屋企相當有特色，以配合返佢嘅身份。佢屋企係由韓國傳統嘅韓屋進行現代化嘅改造。 為咗展現韓屋嘅感覺，儘量保留木製嘅框架，用有傳統韓紙感覺嘅白色牆紙。 傢私同裝飾方面比較現代風，整齊企理，兩者配合，營造出傳統與現代合一嘅感覺。
另外，成間屋都係坐式設計，係韓國嘅傳統生活方式。客廳嘅矮枱、房入面嘅坐式牀，都係典型坐式傢具。
想睇更多韓國超人氣坐式裝修趨勢嘅話，可以撳入以下link了解更多！
李恩梧：濃厚復古感
李恩梧經營成立咗唔夠1年嘅1人行銷公司O3，呢度又係佢嘅屋企，又係O3嘅辦公室。恩梧嘅屋企係長型結構，亦都好老舊，佈置嘅傢俬顏色比較單調，有啲甩甩哋色嘅感覺，整體上反而呈現出復古嘅氣氛。
望落簡陋，但其實有佢特色嘅地方。 有窗嘅牆上掛上彩燈同相，令成間屋嘅氣氛生動起嚟。 雖然係一間老舊嘅屋，但係擺放嘅傢具同飾物，營造出復古感，同經歷過各種苦難、逆境，努力克服嘅恩梧好相似！
《我的室友是九尾狐》
劇中999歲嘅九尾狐申又如（張基龍飾），99年出生嘅女大學生李潭（惠利飾）談起浪漫嘅戀愛，佢哋嘅屋企分別有咩特色呢？
申又如：高級豪宅嘅裝修
申又如嘅屋企就好似中世紀嘅城堡一樣，散發住高級古樸嘅氣息。超高嘅樓底，加上中間嘅吊燈，令人聯想起中世紀嘅高級庭院。 不愧係生活咗999年嘅申又如，鍾意嘅風格非常古典！
屋企每一處都放咗有古董感覺嘅擺設，好似係牆上嘅掛畫，周圍嘅瓷器，統統都反映出申又如嘅喜好。
而且屋企整理得超級完美，好似冇人住喺度嘅感覺（示範單位？），更加突顯出申又如仲未成為人類、欠缺人性面貌嘅性格。
李潭：充滿人情味嘅家庭裝修
同高級、非人性化超完美嘅申宇如屋企唔一樣，李潭同細佬一齊住嘅屋企就充滿住人性化嘅感覺。 雖然比申又如嘅屋企細好多，但每個空間都擺放咗傢俬同生活用品，係韓國一般家庭嘅屋企。
李潭嘅屋企同申又如嘅屋企形成鮮明嘅對比，有好強嘅溫暖可愛嘅感覺，突顯「人性」嘅生活，同時展現咗李潭開朗活潑嘅性格。
《某一天滅亡來到我家門前》
《某一天滅亡來到我家門前》講述被宣告剩底唔多時間嘅東景（朴寶英飾），同負責將萬物消失嘅滅亡（徐仁國飾）之間嘅愛情。兩個人物有截然相反嘅特徵，一齊嚟睇吓佢哋嘅人物性格點樣反映喺屋企嘅裝修啦！
東景：溫暖可愛嘅裝修
東景嘅屋企整體上係用咗淡黃色嘅牆紙，望起嚟好溫暖，好溫馨。全屋嘅傢俬同飾物都係溫暖嘅顏色：粉色系嘅梳化、彩色嘅cushion、黃色嘅燈等等，更有「家」嘅感覺。
另外，周圍放滿咗嘅擺設、生活用品，更加突出得意精巧嘅感覺。飾演東景嘅朴寶英本身就係可愛嘅化身，同屋企嘅裝修好夾。 想打造成溫暖小巧屋企嘅朋友可以參考一吓。
滅亡：冷酷暗黑系裝修
同溫馨，色彩豐富嘅東景屋企啱啱相返，滅亡嘅屋企走沉色風格。 上圖係滅亡利用超能力將東京嘅屋企同自己嘅屋企連埋一齊嘅狀態，一眼就睇得出兩個空間好有對比！
滅亡嘅屋企就好似相嘅底片一樣，搵唔到任何顏色。 中間灰色粗糙質感嘅牆，凹凸不平嘅岩石構成嘅牆，好似一個洞窟，似乎刻畫出滅亡嘅冷酷同憤世嘅性格。鍾意深色系嘅裝修，想表現出粗獷感覺嘅話，可以參考一吓滅亡嘅屋企。
《無法抗拒的他》
《無法抗拒的他》講述危險但好有吸引力嘅男人朴宰彥（宋江飾），同被佢動搖嘅劉娜比（韓韶禧飾）之間令人沉醉嘅校園浪漫故事，女主角住嘅係一間點樣嘅屋呢？
劉娜比：充滿美大生感覺嘅空間
劉娜比嘅屋企係一間偏闊落嘅oneroom。 牀下位置做咗台階，同日常生活空間隔開。呢樣方法叫Step-up flooring，可以增強空間實用性，又有美感。
另一個值得留意嘅係，娜比用自己畫嘅畫同收集返嚟嘅畫，裝飾牆身。由簡單嘅素描草圖到上好色嘅畫作，將屋企裝飾得好靚！ 大家都可以好似娜比咁，收集自己鍾意嘅相、明信片，貼喺牆上，就可以創作出一個隨意又有品位嘅裝飾品。
《機智醫生生活》
劇中充滿魅力嘅5位主角，佢哋嘅屋企又係點嘅樣呢？因為主要講醫院入面發生嘅事，好少有各人屋企嘅場面，出現得最多嘅就係李翊晙同楊碩亨嘅屋企。
李翊晙：為有能力嘅單身爸爸而設嘅裝修
翊晙住嘅屋企，望見裝飾，令人第一時候諗起「韓國新起嘅住宅單位」。空間非常闊落，牆同傢俬一致都係白色，有乾淨、現代嘅感覺。
獨自撫養仔仔羽朱嘅單身爸爸，屋企自然充滿住玩具。空間大，又有現代感嘅一般住宅單位裝修，配上得意、五顏六色嘅兒童用物品，係翊晙屋企最大嘅特點。
楊碩亨：古銅色、溫暖感嘅磚牆裝修
碩亨嘅屋企同充滿新起住宅單位感覺嘅翊晙屋企截然不同，碩亨嘅屋企就好似舊式高級住宅一樣，牆身由紅色、啡色嘅磚構成，有一種經典溫暖嘅感覺。
同時枱、櫈、收納櫃、音響等大部分傢俬都係木製，更有復古嘅味道。再鋪上地毯，令成間屋加添咗氣氛。 鍾意復古、溫暖感覺嘅人可以參考碩亨嘅屋企裝修。
《黑道律師文森佐》
最後要介紹嘅係早排熱播嘅《黑道律師文森佐》文森佐（宋仲基飾）、洪車瑛（全汝彬飾）同張俊宇（玉澤演飾）屋企啦！
文森佐：超現實感
文森佐嘅屋企非常破舊。 意大利有型嘅黑手黨文森佐嚟到韓國，住喺舊商業街Geumga廣場一間破舊嘅房。一睇就係冇特別裝修嘅屋，不過咁樣嘅屋喺現實中好容易搵到，充滿現實感嘅屋！ 襯托咗文森佐身為冷酷無情黑手黨嘅身份。
洪車瑛：韓式復古裝修
洪車瑛嘅屋企係以前同爸爸洪有燦一齊住嘅地方。佢嘅屋企係韓國70~80年代常見嘅復古裝修，用暗色嘅木嚟造地板同牆壁，俾人一種沉實、厚重嘅感覺。洪車瑛喺屋企加咗張民族風嘅地毯，花紋嘅梳化，令以沉悶嘅屋企加添一啲溫馨嘅感覺。
張俊宇：幹練、冷酷感嘅高級裝修
劇中嘅張俊宇係反派人物，巴別集團嘅話事人，所以住嘅屋都非常高級。唔只空間大，擺滿咗高級傢俬，就連窗外嘅景都係無得輸，首爾嘅夜景一覽無遺，象徵住佢手中嘅財富同權力。
大理石地板、灰色嘅牆同柱、超高樓底等等都係張俊宇屋企嘅特點。 整體上俾人幹練、冷酷嘅感覺，更加突顯張俊宇呢個角色的惡黑暗魅力。
以上就係今年咁多套人氣韓劇中，主角嘅屋企裝修，每一間都充分體現出角色的嘅性格特徵。大家又最鍾意邊一種設計呢？歡迎留言同小編分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
