Hello，大家好，我哋係由韓國人每日提供最新韓國旅行資訊嘅Creatrip。

今年夏天，係韓國歷史上最熱嘅一年，唔好話做啲咩戶外活動，就咁行街都融。 真係好佩服同好多謝咁嘅天氣下，辛苦工作嘅醫療人員！今日小編就為大家介紹吓韓國人夏天會食啲咩傳統飲食嚟補身啦！

韓國人夏天進補方法

蔘雞湯 (삼계탕)

韓國最具代表性嘅夏天補品就係蔘雞湯！夏天大家都出好多汗，個人冇晒力氣，好多韓國人都會喺夏天食蔘雞湯補充體力。

蔘雞湯係將雞嘅肚切開，放入糯米、人蔘、大棗、栗子等材料之後，再放係熱水度煮一段時間。 熟咗之後，將雞肉撕開後點鹽食，裏面嘅材料配飯，加埋湯一齊食嘅話，真係好好味。 嫰中帶有口感嘅雞肉，加埋健康有益嘅食材，係夏天補充體力最佳嘅食療！

海鮮湯 (해신탕)

海鮮湯同蔘雞湯有啲似，都有用雞、藥材等材料，而海鮮湯最大嘅特點當然就係海鮮啦！有鮑魚、大八爪魚、小章魚做主要材料。唔單只營養豐富，仲可以降低體內嘅熱。 好味又有營養又解暑，所以係好受歡迎嘅補品！

龍鳳湯 (용봉탕)

龍鳳湯係用雞、水魚同鯉魚一齊煮嘅韓國補品。 龍鳳湯呢個名取自東方傳說中嘅龍同鳳凰，水魚象徵龍，雞象徵鳳凰。呢道菜嘅材料好貴，一碗平均超過10萬won（約HKD700），所以唔係好常見！ 另外，好多人覺得食水魚好奇怪同噁心，所以通常都係老一輩嘅人會鍾意食多啲。

泥鰍湯 (추어탕)

泥鰍湯就係用泥鰍做嘅熱湯，放入白菜、綠豆芽、蔥等各種蔬菜，再用大醬、辣椒醬、胡椒調味，食起上嚟有啲辣。 泥鰍含豐富蛋白質、維他命A、D，啱晒夏天食嚟補充體力。

每個地方煮泥鰍湯嘅方法都唔同，有啲會將成條泥鰍放入去煮，亦有人將泥鰍拆肉磨碎之後先煮。 好多人對成條泥鰍咁食感到反感，所以最近大部分人都會揀磨碎嘅泥鰍湯。

鮑魚粥 (전복죽)

鮑魚粥顧名思義係加咗鮑魚入去一齊煮，有豐富蛋白質同各種氨基酸，係恢復元氣好好嘅食材。煮成粥之後香噴噴，食落又有粒粒鮑魚嘅口感，好特別！

醋雞湯/醋雞湯麵 (초계탕/초계국수)

드링킷

醋雞湯係用雞煮喺肉湯之後雪凍，用醋、芥末調味，係酸甜可口嘅一道菜。 熬完湯嘅雞可以撕成細細塊，當肉絲咁食！ 涼浸浸嘅醋雞湯有助降溫，雞肉又有蛋白質。 如果加埋麵落湯度，就可以製成醋雞湯麵啦！

燒鰻魚 (장어 구이)

燒鰻魚係韓國另一樣好有代表性嘅夏季補品。 用鹽調味之後燒，或者加上辣甜嘅醬汁一齊燒，兩款食法都好好味。 鰻魚係可以減低體內熱氣嘅食材，又含豐富不飽和脂肪酸、維他命、鎂、鈣等，係夏天補充營養嘅佳品。

豆漿冷麵 (콩국수)

豆漿冰麵係夏天冰涼嘅代表性補品。 因為冇任何動物性材料，所以係素食人士好鍾意嘅食物。 將剝皮嘅黃豆煮一段時間之後，搞碎再揸成豆漿。 豆漿當成湯底，放入幼麵，再根據喜好放鹽，或者糖嚟食。大豆充滿蛋白質，被稱為喺田生長嘅肉，非常健康。豆漿雪凍之後，食起嚟又香又爽口，夏天口淡淡時最好嘅開胃菜！

青瓜涼湯 (오이냉국)

青瓜涼湯又酸又爽口，超啱夏天嘅時候食。 凍水中加入少少鹽、糖、醋，做成酸甜嘅湯底，再加入青瓜、海帶。 如果想再爽啲，可以再加埋冰，咁就超級消暑啦！青瓜95%係水份，唔只可以補充返水分，仲可以降溫添。

今日小編介紹咗幾款韓國人夏天會食嘅食物，補充返因為天氣熱而流失嘅水份同氣力！大家之後嚟韓國，都可以去試吓以上嘅食物，學吓韓國人咁補吓身！😁

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面

 韓國代購