Hello，大家好，我哋係由韓國人每日提供最新韓國旅行資訊嘅Creatrip。
早排小編提過外國人嚟到韓國覺得最貴嘅嘢係麵包，經調查發現原來韓國麵包係全世界第一貴！今日小編就嚟個後續，講吓點解韓國嘅麵包咁貴？唔通係用金造嘅？
韓國麵包售價全球之冠嘅原因
根據2019年英國經濟分析機關「經濟學人智庫」（EIU）嘅調查結果顯示，首爾1kg麵包平均價格為15.59美金，係全世界物價頭10名嘅城市中最貴。排第2名嘅紐約都只係8.33美金，幾乎係兩倍，而同樣亞洲地區，出名物價高嘅日本，大阪每1kg嘅麵包平均價格都只係5.2美金。由此可見，韓國嘅麵包真係非一般咁貴。到底有咩原因令到韓國嘅麵包咁貴呢？
1. 原材料價格高
麵包最主要嘅材料係麵粉同糖，當中麵粉佔嘅比重高達66.7%，而韓國大部分麵粉都係依賴海外入口。以2018年為準，韓國小麥自給率只有1.1%。 另外，韓國產麵粉使用比重得0.4%，韓國產白糖嘅情況更為嚴重，使用比重係0%！所以同有自己生產原材料嘅國家相比，韓國嘅價格負擔就大好多。
不過，單單因為進口原材料佔嘅比重大，都唔可能令到麵包嘅價格咁高。 同樣小麥自給率唔高嘅日本(12%)，佢哋嘅麵包價格比韓國平好多。
2. 分銷結構
韓國麵包銷售嘅情況，有一點同其他國家好唔同。 比起便利店，或者折扣店等零售渠道，韓國麵包店銷售嘅規模更大。以2016年為準，烘焙業嘅銷售額為5兆9,388億韓元，但零售渠道嘅銷售額只有4251億韓元。 換句話講，韓國人主要喺麵包舖買麵包食。相反，海外嘅包裝麵包嘅銷售規模比烘焙麵包大好多。
呢種分銷結構令到麵包價格變貴。 因為一般烘焙店製造出嘅麵包單價，比大型超市銷售嘅大量生產貴好多。烘焙店好多都係屬於個別經營，人工、租金嘅負擔必然比大型企業大。
另外唔可以忽視嘅係，走高級戰略，主要集中喺著名商業區嘅個人麵包店數量不斷增加。
3. 部分支配韓國麵包市場嘅商人從中獲利
就以喺Paris Baguette(烘焙專門店)同Samlip(大量生產麵包)兩者中，佔咗最大市場嘅「SPC Samlip」為例，公正交易委員會發現，相關公司將冇任何作用嘅公司納入中間交易過程，徵收「通行稅」，最終令消費者價格保持高位。
SPC集團嘅麵包子公司「Paris Baguette」使用「密茶苑」(밀다원)生產嘅麵粉，但兩家公司冇直接進行交易，而係通過「Samlip」公司進行麵粉交易。就算Samlip係中間冇任何動作，但以高價出售原材料並賺取利潤，亦屬於唔公平嘅內幕交易，所以公平交易委員會對 SPC 集團處以 647 億韓元嘅罰款。
呢個消息一出，網民紛紛留言話：「麵包喺其他國家係最平，但唯獨喺韓國就最貴」、「唔只麵包貴，炸雞都好貴」、「我哋國家只要做好分銷工作，單價就應該會降低，但係分銷後價格竟然升好幾倍，真是可惜」。
總括嚟講，韓國麵包咁貴嘅原因，除咗因為大部分原材料係進口之外，最大原因都係分銷問題！商人又為咗自己嘅利益做手腳（？），最後令到市民捱貴麵包！
資料來源：지식의 정식
如果有更多想知嘅內容，都可以隨時留言或者dm話俾我哋知：）
Instagram：creatrip.hk
