韓劇大學生穿搭

Hello，大家好 ，我哋係由韓國人每日提供最新韓國旅行資訊嘅Creatrip。

唔知大家平時睇韓劇，會唔會留意吓佢哋嘅衣着呢？小編個人就好鍾意睇佢哋嘅返學Look，如果大家之後嚟韓國，想扮吓韓國大學生，不妨都可以跟住以吓！

韓劇大學生穿搭

1. 《我的ID是江南美人》- 林秀香Look

呢套劇主要係講女主角姜美來（林秀香飾），因為由細個開始覺得自己唔靚，成日都俾人欺凌，為咗之後有好嘅生活，佢去咗整容希望有一個新開始。佢喺戲入面嘗試過唔同大學生風格，每一套都好簡單，襯得好自然。

1. 格仔恤衫

相信大家都知格仔恤衫，無論邊個年代著都唔會過時，就算只係襯一條簡單牛仔褲或者裙，都已經可以顯得特別後生，俾人感覺好有活力。

喺戲入面，林秀香著過好多唔同款嘅格仔恤衫，另外亦推薦大家買直條恤衫，同樣都係萬年款，可以顯得人好young。

2. 白色T-shirt ＋ 牛仔褲或裙

白色T恤加牛仔褲或裙，已經成為唔少韓國學生嘅必備穿搭，簡簡單單就可以著出街，方便得嚟又好睇。

如果覺得太單調，可以孭一個比較顏色突出嘅手袋作為亮點。

唔單止T-shirt，襯白色恤衫亦都一樣好好睇。

3. 吊帶牛仔連身裙＋ T-shirt

如果想可愛啲，可以著呢種吊帶牛仔連身裙，入面襯T-shirt。想俾人更加有禮貌嘅感覺，可以襯恤衫。

呢一種風格喺韓國真係超流行！

4. 荷葉邊半身裙/連身裙

由幾年前開始，韓國就好興著呢一種荷葉邊嘅裙，基本上韓國女仔衣櫃入面都會有一件，喺《我的ID是江南美人》入面，亦都會見到林秀香成日著。

海葉邊嘅裙多數都睇落好優雅同女性化，想試吓成熟少少可以試吓換呢個Look！

2. 《奶酪陷阱》- 金高銀Look

當時《奶酪陷阱》播出，小編最記得因為金高銀喺劇入面嘅髮型曾經有段熱潮，唔少人睇完都會跟住去剪，不過佢喺劇入面嘅穿搭亦都好令人關注，基本上配搭好簡單，好多時睇落比較中性，同時再有少少復古feel。

1. 吊帶長牛仔褲

喺劇入面成日都會見到金高銀著吊帶長牛仔褲，再配一件長嘅T-Shirt，睇落有少少復古得嚟又好可愛。

2. 背心＋T-Shirt/恤衫

如果想睇落成熟少少，亦都可以試吓學金高銀呢一套背心＋T-Shirt/恤衫。

3. 西裝外套

返學想俾人一種成熟又穩重嘅感覺？咁可以試吓買一件西裝褸，只要買一件即刻俾人覺得有種前輩嘅感覺。

3. 《舉重妖精金福珠》- 李聖經Look

大家當年有冇追 《舉重妖精金福珠》呢？李聖經喺劇入面嘅Look好適合大一/大二學生跟住參考，想俾人一種活潑感覺就一定唔可以錯過。

1. 連帽衞衣

連帽衛衣絕對係韓國學生必備時尚單品之一，無論係中學生定係大學生，都會成日見到佢哋成日咁著，簡簡單單就是美。

李聖經喺劇入面著過唔同顏色同款式嘅素色連帽衛衣，大家只要襯條牛仔褲就可以直接返學，簡單又方便。

如果覺得素色衞衣太單調，韓國有好多衞衣都係中間印有品牌Logo，夠哂簡單。

2. 有花紋冷衫

由於當時呢套劇係喺冬天拍，所以冷衫係絕對唔可以少有，如果大家當時有發現，會見到李聖經成日都會著印有可愛花紋嘅冷衫。

如果唔鍾意印有花紋嘅冷衫，可以只係買啲簡單款式。

3. 背心外套

可能好多人認為背心有時睇落去會好老土，但其實識襯都可以成為一件時尚單品。

背心外套入面可以襯運動衫、連帽衛衣等亦都得。

4. 冷帽

李聖經喺劇入面成日都會帶呢一種可愛冷帽。

唔少大學生都鍾意戴，除咗可以保暖之外，仲會俾人覺得好可愛，有時冬天懶得洗頭，都可以用佢。

4. 《便利店新星》- 金裕貞Look

雖然呢套劇唔係以大學生作為背景，但金裕貞喺《便利店新星》嘅Look亦都相當吸引，係唔少韓國20代女性成日都會著嘅Look。

1. 薄冷衫

薄冷衫可以話係金裕貞喺《便利店新星》成日經常會見到嘅Look。

喺韓國，無論係夏天定係冬天，大學生都經常會著呢一種衫，配牛仔褲或短裙，營造出女人味。

2. 方領連身裙

由舊年開始，呢一種方領單品，無論係連身裙定係恤衫，都好受韓國年輕人歡迎，呢一種風格俾人感覺睇落身材更苗條。

如果唔鍾意連身裙，恤衫都係一個唔錯選擇。

3. 同色系配搭

呢款配搭成日喺韓國都會見到，大概係將同色系嘅衫同褲或裙搭配，簡單得嚟俾人唔會覺得睇落好hea。

唔知睇完呢篇大學Look又幫唔幫到大家呢？如果想再成熟啲都可以參考韓劇OL服飾介紹，希望幫到大家啦！

如果有更多想知嘅內容，都可以隨時留言或者dm話俾我哋知：）

Instagram：creatrip.hk

Facebook：Creatrip 帶你認識韓國每一面

韓國代購