Hello，大家好 ，我哋係由韓國人每日提供最新韓國旅行資訊嘅Creatrip。
大家夏天有咩抗暑方法？匿係屋企開行冷氣？食雪糕飲汽水？最近韓國都好熱，去到邊都好似焗緊桑拿咁，今日小編就介紹一啲韓國人喺夏天會添置嘅法寶，有啲都幾得意㗎！
韓國人夏天必備法寶
1. 手腕風扇
oneroom.mart
風扇仔絕對係夏天出街唔可以冇嘅物品！不過成日要用手拎住，有時仲幾攰！韓國就有出一款手腕風扇，好似手錶咁戴係手就可以吹到陣陣涼風，騰返空隻手出嚟碌電話！
2. 掛頸風扇
香港都見有人用掛繩將風扇仔掛係頸，方便隨手拎起涼，或者減少放喺袋嘅空間。韓國都有掛頸風扇，但設計就潮啲！小編初時見仲以為係耳機 而且唔使用手拎起，就咁掛係頸度，㩒個掣就涼到，完全係懶人必備啊！
3. 電冰毯
쇼핑하우 - 카카오
大家都知韓國冬天可以凍到零下20度以下，唔開暖氣真係好難生存，但係地暖嘅煤氣費真係唔講得少，好多人想慳地暖嘅錢都會用電熱毯代替，又暖又划算。夏天想慳開冷氣嘅錢？冇問題！一樣有電冰毯！1日開足10個鐘，1個月30日都唔使1200won（約HKD8）！而且超靜音！小編都想即刻買返張！
4. 自動刨冰機
oneroom.mart
天氣熱辣辣，食返啖雪糕、雪條、刨冰⋯⋯即刻涼返幾度，不過下下出去舖頭食份量又大，價錢又唔平，加上疫情都唔係好敢出街，點算好？自己刨冰自己整，有呢部自動刨冰機就唔使怕鑿到手斷！想幾時食刨冰都冇問題！
驅蚊蟲
1. 果蠅捕捉器
oneroom.mart
夏天除咗熱之外，蚊蟲都係另一個煩惱！特別係廚房、水渠位，就最多細細粒嘅果蠅飛嚟飛去，殺極都仲有。放一個捕捉器就可以慳返少少力去殺滅佢哋，呢個捕捉器入面係放咗一啲經過天然發酵嘅水果皮，發出味道嚟吸引啲飛飛墮入陷阱，而且外型可愛，仲可以當裝飾添！
2. 超音波驅蟲器
oneroom.mart
驅蚊驅蟲好多時都係靠一啲氣味嚟等蚊蟲唔敢靠近，但好多時啲氣味都好難聞，或者會怕係化學物質，聞得多對身體唔好。超音波驅蟲器就唔會有任何味道，插咗電之後仲會釋放出蚊蟲會怕嘅波頻，等佢哋唔會靠近，從而達到驅蟲效果。
3. 2合1 驅蟲器
hotel.living
呢個除咗係可以放係度捕蚊蟲之外，仲可以拆出嚟當蚊拍咁滅蚊，一物二用！而且仲係無線，帶去邊都好方便！
4. 摺疊式蚊帳
all the life
放咗驅蚊、捕蟲器，再想萬無一失嘅話，可以用埋蚊帳。不過傳統嘅蚊帳開出嚟好花氣力同時間，呢款摺疊式蚊帳一秒就打開，收起又方便，有咗佢保證有覺好瞓！
以上就係最近韓國人夏天必買嘅物品！大家覺得咩樣一定唔少得？有邊樣最想買呢？
如果有更多想知嘅內容，都可以隨時留言或者dm話俾我哋知：）
Instagram：creatrip.hk
