Hello，大家好，我哋係由韓國人每日提供最新韓國旅行資訊嘅Creatrip。

好多時同一件衫，著喺唔同人身上，感覺就好唔同！除咗身型會有影響之外，配搭都係好關鍵！識得襯唔只潮，仲有修身效果！今日小編同大家分享6個韓妹穿搭技巧，大家一齊扮靚靚啦！

6個韓妹穿搭秘訣

上窄下闊/上長下短

著衫最緊要係突出身體線條！上、下身都係闊身嘅話，好容易顯肥，所以上身著咗over-size，下身就避開唔好著闊身褲/裙！

相反，下身著鬆身嘅長褲，上身就可以著短身衫、束腰型嘅衫，或者攝衫，望落去就俐落好多。

如果著over-size嘅上衫，可以著短褲，再將部分上身衫攝去褲入面。

同樣規則亦適用於鞋襪穿搭。 如果著短褲、短裙，可以試吓著高筒嘅襪，或者短靴。如果著長裙、長褲，就可以著船襪搭低筒嘅鞋，又或者涼鞋、高跟鞋，會有長腿嘅效果！

超短露腰上衣

炎炎夏日，好多人都鍾意著啲清涼嘅衫，不過就咁短袖衫短褲睇落唔夠fashion。最近就流行著超短露腰嘅上衫，露出中間嘅小蠻腰，又可愛又性感。

下身襯長褲都得，一樣咁型！不過呢個造型比較適合腰細，甚至有腹肌嘅朋友，如果有肚腩仔嘅話，可能就要襯高腰褲。

上花下素/上素下花

好多時偶像著衫，上下身嘅花紋撞到應一應，但又carry得到！呢個真係好考技巧，唔係人人做到。最安全方便嘅就係上花下素，或者上素下花。

咩意思呢？即係上身著咗淨色，下身就可以襯花巧一啲嘅裙、褲。相反，如果上身著得比較花，咁下身就要淨色，簡單一啲，令人唔會覺得眼花繚亂，亦可以著眼花色嘅部分。

紮高髻

如果身型比較嬌小，除咗著高踭鞋之外，仲可以紮一個高髻嚟拉長成個人嘅比例，有顯高嘅效果！

鞋襪配搭

襪本身係一個小配件，好多時都會忽略咗，但其實襪都可以為整個造型加分。好似上面提過，短裙、短褲就搭高筒襪，長裙、長褲就搭低筒襪，可以望落去修長一啲。

又或者同鞋配色，比如白鞋配白襪，黑鞋配黑襪，都有長腿嘅視覺效果。   

色系與混色

韓國仲好鍾意tone-on-tone 同 tone-in-tone嘅配搭。 Tone-on-ton 係同色系，但可以揀唔同深淺度、溫暖度嚟match。

而tone-in-tone就係同一深淺、溫暖度，但唔同顏色混埋一齊，可以係中性、柔和、深沉、生動⋯⋯等唔同感覺。

以上就係最近韓國年輕人普遍嘅6個穿搭秘訣。唔知大家又有冇啲個人心得呢？歡迎留言同小編分享    

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面 

 韓國代購