韓國畢業文化
韓國畢業文化，畢業嘅時候會掟麵粉？撕校服？仲有行走嘅花環？
Hello，大家好 ，我哋係由韓國人每日提供最新韓國旅行資訊嘅Creatrip。
大家嘅畢業禮係點㗎呢？或者有冇去過參加過朋友、屋企人嘅畢業禮？感覺又係點呢？最近因為疫情，唔只韓國，其他好多國家都冇得好似以前咁一樣舉行畢業禮，不過小編收到好多網友問喺韓國讀書嘅問題，今日就大家介紹吓韓國嘅畢業文化啦！
韓國畢業文化
過去嘅畢業禮文化
首先講下以前中學嘅畢業文化啦😊 不過都係以前會做嘅事，而家已經唔會咁做㗎啦~
1. 灑麵粉 & 撕校服
경상일보
80~90年代，喺韓國參加畢業禮時，學生一定會準備麵粉。 學校舉行嘅畢業典禮結束之後，就會互相曬麵粉，甚至為咗令啲麪粉唔好咁易跌落嚟，仲會加埋蛋黃醬或雞蛋等痴立立嘅液體。 韓國高中畢業禮通常都係2月，正值天氣超凍嘅冬天，就算唔落雪，都因為麵粉，睇落好似落雪嘅畢業典禮一樣。
중부매일
唔只咁，學生仲會互相撕爛對方嘅校服，所以畢業禮當日，喺學校周圍都會見到著住爛衫，或者冇著衫嘅學生走嚟走去。
충청투데이
曬麵粉、撕校服呢啲行為，可以視為學生一直壓抑感情得到解放嘅表現。 畢業啦！唔再係需要受到管制嘅學生，為咗表現自己成為自由嘅成年人，所以做出呢啲行為。
한국뉴스투데이
但係呢種行為越嚟越過分，特別係不良學生之間以更奇怪嘅方式進行，例如已經畢業嘅師兄師姐以祝賀師弟妹畢業為由，向佢哋掟麵粉、踢佢哋，甚至用棍打，所以由2000年代尾開始，教育局同警察開始管制呢啲行為，到而家已經消失咗。
2. 食炸醬麵
畢業禮結束之後會同朋友一齊盡情影相留念，再同屋企人去食餐好嘅！以前韓國人畢業禮完咗之後，經常會去食炸醬麵，到而家炸醬麵都係韓國最具象徵性嘅畢業食物。 BTS柾國高中畢業嘅時候都同其他成員一齊去韓式中華料理嘅餐廳食炸醬麵！
而家喺出面食炸醬麵算係好平，但其實去到1980年代，炸醬麵仍然係一樣好珍貴，價格好貴嘅嘢食。 因為當時經濟環境唔好，對於普通人嚟講，最好嘅menu就係炸醬麵，所以好似畢業一樣咁特別嘅日子，同屋企人一齊食炸醬麵，成為咗一種畢業嘅文化。
最近嘅畢業禮文化
近年嘅畢業文化同之前好唔同，更加有新意，更加好玩！🤗
1. 影Cosplay畢業相
韓國中學畢業相一般都係會喺天氣好嘅6、7月影。 本來係著住端莊嘅校服，擺個好生硬嘅pose嚟影。 不過幾年前開始，首爾議政府高中嘅畢業相成為話題，慢慢產生咗變化。
議政府高中嘅學生用藝人、角色扮演，甚至政治人物進行cosplay，每年都會影一啲超乎想像嘅畢業相。一到畢業季，網友都會等議政府高中嘅畢業相紀錄，成為熱門話題。
youtube channel 유정 YUJEONG
議政府高中呢個獨有嘅文化傳遍全國，好多中學生都著住各種服裝咁影畢業相。 喺IG search「畢業相concept」嘅話，足足有3.3萬個post！ 見到啲學生咁開心，學校都准許佢哋著校服影一次，再著自己想著嘅衫嚟影一次！
우리학교 클라스
呢種方式嘅畢業相令學生擺脫整齊劃一嘅校服同姿勢，可以盡情展現自己， 仲可以用靚靚嘅相留低學生時代嘅回憶，真係會好開心！
2. 畢業禮橫額
news1
畢業禮橫額主要係韓國嘅大學畢業典禮上經常出現嘅畢業慶祝方式！ 大學畢業典禮比中學嘅畢業典禮有啲唔同，感覺更加意義。 小學、中學12年嘅學生生活，加埋最少2年、最多6年嘅大學生活結束之後，真正踏入社會，一方面覺得開心，另一方面亦感到負擔。
베리타스 알파
所以畢業典禮嘅季節，校園入面掛起充滿住一齊度過大學生活嘅師弟妹、師兄師姐，同埋同學仔嘅心意嘅橫額，唔只有簡單「祝賀畢業」咁常見嘅橫額，有啲仲會幽默風趣嘅句子、得意搞笑嘅相嚟裝飾！ 例如，模仿人氣電視劇經典台詞，「畢業，咁難嘅事 OO（人名）做到啦」（太陽的後裔）、「你承擔得起畢業咩，OO（人名）？」（天空城堡）等字句嚟製作橫額。
3. 畢業禮人形花環
ytn
韓國由好耐之前開始，會送呢種企身放係度嘅花環嚟慶祝，最具代表性嘅就係朋友結婚，或者新開舖時送嘅花環。 呢種花環價格好昂貴，運送又難，以後亦都好難處理，所以好少會用喺畢業典禮呢啲活動上面。
但係最近有人將寫住祝賀語句嘅絲帶掛喺頸上面，成為自己行走嘅花環，呢種「人形花環」就流行起嚟，喺畢業典禮上都出現唔少呢啲人形花環！ 可以自己設定畢業祝賀語句，向賣人形花環絲帶嘅公司度訂購，就可以用好平嘅價錢整到人形花環。
小編最近去參加同學嘅畢業典禮時，都特登訂造咗人形花環絲帶，俾同學一個驚喜！ 橫額或者人形花環等呢類新方式嘅祝賀，對於祝賀嘅人同被祝賀嘅人嚟講，都會留下深刻嘅回憶。😍
今日小編同大家一齊了解韓國以前（而家已經消失）嘅畢業典禮文化，同埋最近新興嘅祝賀方式！希望疫情快啲完，大家可以再次盡情享受畢業典禮嘅快樂！🙂
如果有更多想知嘅內容，都可以隨時留言或者dm話俾我哋知：）
Instagram：creatrip.hk
