Hello，大家好，我哋係由韓國人每日提供最新韓國旅行資訊嘅Creatrip。
韓國勞動法例規定，2025年最低時薪為₩10,030(約10030)，今日小編就為大家介紹吓韓國頭10名最高時薪嘅工作，當中幾份工而家好紅嘅偶像明星都做過！一齊嚟睇吓有邊啲啦！
你可能會有興趣👇🏻
[블로그] 韓國2025年最低時薪衝破₩10,000大關
韓國最高時薪工作TOP10
第10名 | 臨時演員/節目現場觀眾（₩15,637/15637）
大家睇韓綜韓劇都會見到唔少唔係明星嘅人出現，佢哋主要工作係喺電視劇、電影或者節目入面做群眾角色或者現場觀眾。可以親身體驗拍攝現場，見到明星之餘仲有機會賺少少外快！好多演員成名之前都做過臨記，好似係韓亞航空史上最年輕嘅model李垂珉（이수민）同而家一線演員朴敘俊（박서준）都有做過臨時演員嘅經驗。
第9名 | 保險銷售員（₩16,035/16035）
賣保險原來時薪都唔低！佢哋主要負責向客戶推介同解釋唔同類型嘅保險產品，幫人分析風險同埋提供保障方案。喺韓國保險銷售員通常係靠佣金賺錢，表現好嘅話收入可以好高！
第8名 | 助教（₩16,583/16583）
助教雖然唔係正職老師，但係要做嘅嘢都唔少，例如幫學生解答問題、準備教材、維持秩序等。喺韓國呢個咁“重視”教育嘅地方，助教人工都唔算低！小編自己以前都有喺補習社做過助教，但係點解個pay差咁遠XD
第7名 | 教育/導師（₩16,094/16094）
另外好似頭先所講，因為韓國人好注重學歷，所以幾乎9成學生都會另外返補習社，無論係中英數定其他選修科目都應有盡有，當然教越高年級，時薪就越高，特別係專門應付升大學嘅高考課程，名氣高嘅老師更可以係天價！
第6名 | 電腦/IT（₩18,508/18508）
韓國可以話係IT大國，Samsung、LG等等嘅韓國大企業都同IT有關！從事呢方面嘅兼職主要負責設計、管理同維護電腦網絡、伺服器同通訊系統。工作內容包括解決IT問題、保障資料安全、同時協助公司提升工作效率。不過想做呢份工，就當然需要有相關技術知識同高解難能力啦！
第5名 | 美容業（₩19,810/19810）
韓國K-Beauty盛行，令美容業發展得非常快，無論係美容、美髮、美甲都非常受歡迎，自自然唔少髮型屋同美容中心都會請兼職幫手。不過想入行其實都唔易，需要有返相關經驗同技能先可以做到，而且都算係服務業嘅一種，每日要對住唔同客人，某程度上都係一個考驗...！
第4名 | 上門補習（₩20,863/20863）
雖然話係補習，但唔一定係學術上，仲包埋興趣活動，所以對象唔止係學生，打工仔都有。因為係上門，而且多數係1對1，所以時薪都會高啲。搞笑藝人朴徽淳（박휘순）講佢自己以前夢想就係做上門輔導老師，不過最後入咗間婚姻介紹公司做經理，最後出道做搞笑藝人。
第3名 | 展場主持模特兒（₩22,258/22258）
이데일리
好多展覽會同鋪頭為咗吸引客人嘅注目，都會請一啲著得比較特別清涼（?）、或者代表到自己公司服裝嘅model到場幫手宣傳，因為佢哋對model嘅要求都比較高，所以時薪相對都會高啲。
第2名 | 急件速遞員（₩23,033/23033）
同普通速遞員唔同，因為急件通常都要喺幾個鐘頭內送到目的地，所以急件速遞員需要熟悉城市道路，反應都要夠快同準確。通常佢哋收入都係按件計算，送得多賺得多！
第1名 | 時裝Model（₩25,573/25573）
而家網購咁方便，相信大家都喺網上買過衫，見到相入面嘅model著得咁靚，真係好難忍手唔買！要著得好睇，除咗身型要好之外，仲要識擺pose影相，一啲都唔易！好多藝人明星出道之前都做過網拍嘅model ，雖然Suzy 16歲就出道，但係佢原來15歲就已經開始做網拍嘅model。參加Produce 101之後以Wanna One出道嘅邕聖祐（옹성우）更加有「兼職王」之稱，做過時裝同髮型model。
以上就係而家韓國頭10名時薪最高嘅工作，大家又做過邊啲part time呢？歡迎留言同小編分享！
如果你對文章內容有咩意見或者想查詢更多資訊，可以隨時喺留言區留言，或者透過電郵(help@creatrip.com)聯絡客戶服務中心。想知更多韓國最新資訊，記住follow埋我哋嘅Instagram同Threads啦！