Hello，大家好，我哋係由韓國人每日提供最新韓國旅行資訊嘅Creatrip。
大家嚟韓國應該都好鍾意食Isaac toast，用牛油烘嘅麵包，加埋秘制嘅醬汁，食落又香又脆。今次為burger迷帶嚟好消息，最近官方公佈推出全新isaac burger！大家之後嚟都可以去試吓！
Isaac Burger介紹
(7/22更新)
地址：서울 강남구 강남대로 594
營業時間：星期一至六 08:00-22:00、星期日休息
小Tips：由新沙站3號出口行大約1分鐘就會見到。
之前同大家講過，如果有機會小編都想快啲去試食同大家分享！喺尋日（21號）小編就親自去咗為大家試味啦！小編大概係夜晚7:45左右去到，當時已經有唔少人喺入面食緊同排緊隊。
因為開張冇幾耐，嚟到嘅時候，職員會問大家係想堂食定係拎走，同職員講好佢就會安排你要排邊條線。
呢度落單好簡單，只係需要喺部機度揀食咩，因為語言有得揀英文，大家唔需要擔心有溝通上嘅問題。
小編原本好想試呢一個新款Cheese Melt，好可惜當日去到已經賣哂。
如果大家唔係好熟悉用自助機，亦都可以揀喺櫃檯落單。
大家可以見到當時真係超多人，完全冇一張空檯。
小編大約等咗15分鐘，叫嘅Order都出哂嚟啦！ 真係好期待會係咩味！
ISAAC招牌漢堡 （套餐：₩7,800、單點：₩6,000）
去度當然要試吓佢哋招牌漢堡啦！塊漢堡排超Juicy，同新鮮蔬菜一齊食真係覺得好好味！超推大家一定要試！
蝦堡 （套餐：₩6,500、單點：₩4,500）
呢個蝦堡相對冇咁有驚喜，同平時其他快餐店食嘅差唔多。
磨菇牛肉漢堡 （套餐：₩7,500、單點：₩5,600）
呢個磨菇牛肉漢堡超有驚喜！佢哋特製嘅汁同磨菇牛肉好夾，肉超嫩！
芝士波 ₩3,500
芝士波出面炸得好脆，同芝士一齊食有種入口即溶嘅感覺，本身鍾意食芝士波嘅朋友可以試吓。
雞排 ₩3,000
味道都OK，但唔算好特別，如果大家食完Burger覺得唔夠飽，可以叫一個嚟試吓。
小編大約等到佢哋差唔多閂門先可以影到內部環境，牆上有掛住佢哋嘅代表企鵝拎住Burger食得好開心。
小編估計一次大約只可以坐到20人左右，如果大家之後有興趣，建議可以早啲去食。
每次都只係食Isaac Toast，唔知大家下次會唔會想試埋佢哋嘅Burger呢？
Isaac Toast進軍Burger界
facebook: 이삭버거 ISAAC Burger
啱啱過去嘅2號，韓國國民多士品牌「Isaac」喺官網展示多款「Isaac burger」。Isaac本住「用好嘅食物填滿心靈」為宗旨，創造自家品牌嘅Burger，同其他快餐店嘅唔一樣，Isaac Burger用新鮮、健康嘅材料，以搗碎嘅洋蔥，混入肉扒，即時喺烤架烤製而成。
呢個招牌肉扒使用100%純牛肉，混入新鮮嘅洋蔥碎，仔細調節溫度同時間，再壓成肉扒。運用美國俄克拉荷馬（Oklahoma）傳統漢堡烹飪方式製作，充分保留肉汁，加上洋蔥嘅鮮甜，簡直係完美嘅配搭。再喺肉扒上面加塊芝士，微微融化後，芝士嘅原來香味更加突出，食落口感更加豐富。
facebook: 이삭버거 ISAAC Burger
Isaac Burger Kitchen將會喺嚟緊7月中，率先喺江南區新沙洞，同埋京畿道龍仁東栢開幕，一眾韓國網友紛紛表示非常期待！
開張之後，等小編親身試食完，再同大家分享食後感啦！！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！
