Hello，大家好 ，我哋係由韓國人每日提供最新韓國旅行資訊嘅Creatrip。

如果大家有睇開韓國綜藝節目，好多時都會見到韓國人唔用水喉水，而用樽裝水嚟煮飯或飲用。其實政府一直宣導話水喉水係達到安全飲用標準，可以直接飲用，但點解韓國人都唔敢咁做呢？  

韓國人鍾意飲樽裝水嘅原因

唔相信自來水嘅品質

幾乎每個韓國家庭都有喺屋企裝濾水器，如果冇裝，就會買樽裝水嚟代替。韓國人唔用自來水嘅最大原因係佢哋唔信任自來水嘅品質。2013年韓國環境部對12,000人進行一項調查，只有10%嘅人表示佢哋會直接飲水龍頭開出嚟嘅水，而 55%嘅人表示佢哋只會飲煲過100度嘅自來水。超過30%嘅人因為擔心又舊又唔安全嘅水管同水箱，所以對自來水嘅品質冇信心，有大約28%嘅人表示擔心水庫嘅衛生。如果自來水衛生問題得到解決，只有55%受訪者願意直接飲用自來水。

1991年，斗山集團一間位於大邱嘅電子廠發生管道洩漏苯酚事件，原料流入附近嘅洛東江，淨水廠唔知情之下加入大量「氯」嚟消毒，造成化學作用，令到啲水產生臭味。洛東江係大邱同附近城市嘅飲用水源，部分居民飲咗自來水之後出現嘔吐、頭痛等症狀，所以引起全國恐慌，公眾開始唔信任自來水。

1993年檢出自來水中有病原體，1994年有自來水檢出對人體有害嘅重金屬同農藥嘅案例，1997年亦有自來水變紅嘅報導。所以韓國人，尤其係有小朋友嘅家庭，再唔敢直接飲水龍頭開出嚟嘅水。

自來水有強烈化學氣味

韓國人唔敢直接飲自來水嘅第二個原因係認為自來水有異味，特別係化學氣味太濃，所以唔敢飲。佢哋所講嘅化學氣味係「氯」，可以殺死同防止細菌傳播，係確保水嘅清潔同安全嘅一種重要物質。不過韓國人對氣味真係好敏感，飲咗有氯氣味嘅水會覺得唔舒服。

所以好多韓國人會喺屋企安裝濾水器嚟去除水嘅異味，因為佢哋認為冇味嘅水更安全，但係如果冇定期維護管理，裝咗濾水器都係冇用。有專家表示濾水器管理係一個問題，但有個比管理更嚴重嘅問題係過濾晒水入面嘅礦物質，令身體缺少咗重要嘅礦物質，影響健康。

韓國自來水嘅實際情況

Seoul Metropolitan Government

咁韓國嘅自來水真係好似韓國人諗嘅咁唔安全？ 答案係：NO！

事實上，韓國嘅自來水其實係可以安全飲用。根據世界衛生組織（WHO）嘅數據顯示，韓國99%嘅城市同農村地區都可以使用改良嘅自來水。

根據評級環境保護績效指數（EPI），韓國所有關於嘅水安全指標都非常高，例如韓國嘅水衛生指數排名第一，韓國嘅飲用水同衛生設施喺178個國家中排名第 26 位。根據聯合國 2003 年嘅一份報告，韓國嘅水質憑高科技水處理同管理系統，喺世界上排名第 8，比美國嘅水更高質。

首爾嘅主要水源嚟自漢江，通過水處理廠過濾。科學家通過世界衛生組織 (WHO) 推薦嘅 170個變量進行測試嚟繼續監測水質，除咗強制嘅審計標準，各區政府都制定咗更高嘅供水標準，以確保居民嘅安全。

研究發現，自來水中嘅礦物質含量同樽裝礦泉水一樣。至於經過濾器過濾過嘅水，幾乎冇礦物質留低。不過就算有咁多科學證明嘅證據，好多韓國人仍然唔敢飲自來水。

Seoul Metropolitan Government

為提高大眾對自來水嘅信心，首爾市政府於2007年提供咗250萬韓元補貼，將1994年之前起嘅屋直接連接到水庫。 到咗2017 年，超過349,273 戶（61%），有直接通向屋企嘅水管。

另外，政府發佈預防措施以減輕對自來水污染嘅擔憂，先開水龍頭30秒再使用自來水，同埋建議只用凍水。因為如果用熱水，為咗提高水嘅溫度，有可能會經過係生銹嘅水管。

目前，韓國政府正嘗試更換水管，可以防止生鏽嘅新水管，首爾95%嘅舊水管都已經更換，預計2020年會全部換完，但暫時未有最新情報，有嘅話之後再更新。

以上就係韓國人對自來水嘅迷思！大家又敢唔敢就咁飲水喉水呢？  

如果有更多想知嘅內容，都可以隨時留言或者dm話俾我哋知：）

 Instagram：creatrip.hk

 Facebook：Creatrip 帶你認識韓國每一面