炸蝦客令店主腦出血致死
個個國家都有西客，但呢次真係闖出大禍！
Hello，大家好 ，我哋係由韓國人每日提供最新韓國旅行資訊嘅Creatrip。
COVID-19之後，叫外賣速遞上門嘅需求急劇增加，同時本住「有錢大晒」嘅客人亦越嚟越多。韓國最近發生一件令人傷心嘅事，一名叫炸蝦外賣速遞上門嘅客人間接令老闆腦出血身亡。
21號MBC《News Desk》節目上報導咗呢次事件。早喺3個星期之前，小食店老闆A透過外賣app 「Coupang Eats」收到訂單，包括紫菜包飯、炸蝦、餃子等，但客人收到食物之後嘅第二日，話三隻炸蝦其中一隻嘅顏色奇怪，要求老闆退錢。
同老闆爭論期間仲對老闆講「唔好咁做人」、「你父母咁教你㗎咩？」等侮辱性嘅說話，指責老闆先講半語，最後老闆道歉同退返炸蝦嘅錢。
之但係嗰個客人再喺Coupang Eats度留言「冇概念嘅老闆」，叫人唔好去，又評1分，仲要求退全部食物嘅錢。
Coupang Eats方面聯絡老闆A了解事情，但並冇幫老闆A同客人之間做協調，只係表示「顧客心情唔好，希望取消全部訂單」，要求老闆滿足顧客嘅要求事項。喺通話過程中，老闆A因腦出血暈倒。
根據老闆A嘅遺屬所言，當時老闆A暈咗之後接手聽電話，對方Coupang Eats亦冇作出任何關心，只係講「唔好再發生同樣嘅問題」、「以後要多加小心」。最後老闆A被送院急救，3星期後死亡，家屬亦表示老闆A本身冇任何其他疾病。
事件引發經營舖頭嘅老闆不滿同憤怒，陸續表示刪除Coupang Eats app，唔同佢哋合作，亦有組織喺Coupang總部抗議。
Coupang Eats以代表理事張基煥嘅名義發表文章：「對於部分用戶濫用、無理要求退款、惡意評論等受害嘅店主未能給予適當嘅支援，深表歉意」、「會建立保護店主嘅專門組織，安排專業嘅客服人員同加強教育及培訓，引入店主可以直接喺惡意評論中留言嘅功能，以及改善盲目處理舉報流程，防止類似事情再次發生」。
因為一隻蝦，失去咗一條寶貴嘅生命，嗰位客人過唔過意得去呢？Coupang（類似hktv mall等大型online shopping平台）繼接二連三有送貨員工過勞死，早前又發生火災，Coupang真係應該要好好檢討吓工作環境同員工嘅情況！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
