Hello，大家好 ，我哋係由韓國人每日提供最新韓國旅行資訊嘅Creatrip。
上次出過一篇歌手出身嘅演員，今次就出一篇演員出身嘅歌手啦！睇吓大家又知幾多個？
演員出身嘅歌手
1. 朴志訓 박지훈
大家認識朴志訓嘅時候可能係佢參加第二季嘅《Produce 101》之後成為Wanna One成員，原來佢係童星出身，曾經參演過韓劇《王和我》（2007）、《朱蒙》（2006）等，喺《王和我》中被閹割一幕，由掙扎到撕聲慘叫，悲痛嘅演技令人印象深刻。除咗電視劇之外，亦熱衷參演舞台劇。2017年參與韓國選秀節目《Produce 101 第二季》，最終以第二名嘅成績，以男團Wanna One成員出道。2019年更發表第一張個人專輯《O'CLOCK》。雖然喺歌壇上發光發熱，但仍然有演出電視劇，例如最近開播嘅《遠看是蔚藍的春天》。
2. SF9 - 澯熙 찬희
SF9成員澯熙成為歌手之前，原來都演過唔少戲，例如2009年嘅古裝劇《善德女王》一劇中飾演其中一位花郎，2011年家庭劇《聽聽我的心》中飾演男主角車東株（金載沅 飾）嘅童年時期，期後參演嘅劇集大部分都係主角嘅童年，而喺《Signal》飾演朴善宇一角，演技備受肯定。2016年以男團SF9成員，主領舞、副Rapper身份正式出道，發行首張單曲專輯《Feeling Sensation》，之後《Good Guy》、《Summer Breeze》都攞過M!Countdown嘅第一名。
3. FTIsland - 李洪基 이홍기
FTIsland隊長李洪基都係童星演員出身，2002年出演過當時人氣幾高嘅兒童電視劇《萬能小子馬水利》(매직키드 마수리)，其後都出演過多部劇集《깡순이》、《冰點》(빙점)等。2007年以搖滾樂隊「FTIsland」身份出道，擔任主唱，發行首張專輯《Cheerful Sensibility》，其中一首《愛情病》仲橫掃M!Countdown、 Music Bank、人氣歌謠三台嘅冠軍。2015推出首張個人迷你專輯《FM302》，亦參與多首OST嘅演唱！演藝事業亦同樣進行，不時參演韓劇，仲演過舞台劇！
4. CNBLUE - 鄭容和 정용화
最初因為自拍照上傳到SNS被星探發掘，派到日本接受音樂訓練。2009年，率先同之前提及嘅李洪基一同參演韓劇《原來是美男》出道，2010年以團體「CNBLUE」出道，製作過多首熱門歌曲：《Love Light》、《I'm Sorry》、《Can't Stop》、《Cinderella》等，2015年出首張正規專輯《美好的一天》，今年（2021年）仲發行首張中文EP。發展歌唱事業同時不忘演藝活動，就好似啱啱播完嘅《大發不動產》，見到佢新嘅一面。
5. BIGBANG - G-Dragon
真係唔講唔知，G-Dragon都做過童星！1994年參演過林權澤（임권택）導演嘅電影《太白山脈》(태백산맥)，亦出演過好受歡迎嘅兒童節目《BOBOBO》(뽀뽀뽀)。對唱歌跳舞好有興趣嘅佢，之後喺滑雪場嘅舞蹈比賽中打低晒大哥哥大姐姐，攞到冠軍，被當時主持人李秀滿（SM娛樂創辦人）發掘，後來鍾情於HipHop而轉投YG娛樂，組成BIGBANG。
6. BIGBANG - 太陽 태양
同為BIGBANG成員嘅太陽，由小學5年級開始以兒童演員身份開始演藝活動。2001年參演過電影《絕境情真》(베사메무쵸)。12歲時被當時YG社長梁玄錫選中加入公司，訓練咗6年，最後喺2006年以BIGBANG成員身份出道。
7. KARA出身 奎利 규리 
女團KARA隊長出身嘅奎利，原來都係童星！1995年，當時只有7歲嘅佢喺韓劇《今天是個好日子》（오늘은 좋은날）中扮演姜虎東弟弟嘅女朋友，2001年喺《女人天下》一劇中飾演稜金（金諪恩 飾）嘅幼年時期。2007年以KARA女團出道，推出首張專輯《BLOOMING》，及後有多首熱門歌曲〈Rock U〉、〈Pretty Girl〉、〈Wanna〉、〈Mister〉等。2016同公司合約結束，目前組合活動暫停，以演員身分展開活動。
8. KARA出身 昇延 승연 
同為KARA出身成員嘅昇延都係童星，1997年透過韓劇《星夢奇緣》出道，飾演孤兒院其中一個小朋友，之後都參演唔同電視劇嘅臨演角色。2007年以KARA女團出道，2009年且過佳人、U-IE、泫雅組成短暫組合「4 Tomorrow」。2016年同當時嘅公司DSP合約結束，而家時不時參演電視劇同唱OST。
9. GOT7 - 珍榮 진영
珍榮最先喺2009年參加JYP娛樂第五期嘅公開選秀，同JAY B組成團體表演，雙雙成為冠軍，然後成為練習生。正式成為歌手前，2012年出演韓劇《Dream High 2》，率先以演員身份出道。同年5月同JAY B組合成男子團體JJ Project成員出道，擔任rapper，發行單曲《Bounce》。2014年以Hiphop男子團體GOT7成員出道，擔任領唱、領舞及形象。今年1月結束同JYP嘅合約，但團隊並無解散，仲喺2月合體發單曲《ENCORE》。
10. EXID - 正花 정화
EXID成員正花自小想做演員，小學嗰陣上過表演學院。喺2004年韓劇《妻子的叛亂》中飾演卞貞洙同趙敏基女兒嘅童年角色，之後出演過幾部電視劇同MV，例如Wonder Girls《Tell me》MV。2012年同LE、哈妮等人組成EXID，以單曲《HOLLA》出道。2019結束同經紀公司合約，但團體唔解散。
11. T-ara - 𤨒晶 은정
𤨒晶成為歌手之前，7歲嘅時候參加並贏得韓國小小姐嘅選美比賽，以兒童演員身份參演韓劇《看新時代不知道大人》，之後一直有參演電視劇同電影。喺某部電影拍攝過程中認識咗Core Contents Media代表金光洙，然後加入Mnet Media做練習生。3年之後，於2009年以女團T-ara正式出道，出過多首熱門歌曲：《Bo Peep Bo Peep》、《Roly-Poly》、《Lovey Dovey》。後嚟因疑似欺凌事件而令團體形象一落千丈，2017年揭開咗事件真相，2018年雖然各成員都唔再同公司續約，但T-ara仍未解散，2020年仲合體出演《文明特急》中秋特輯添！
12. GFRIEND出身 銀河 은하
GFRIEND出身成員之一嘅銀河，2007年以童星身份參與韓劇《Love & War》(사랑과 전쟁）嘅演出，2015年以女團GFRIEND出道，發行首張迷你專輯《Glass Bead》，2016年首次有獨唱歌曲，為韓國《六龍飛天》主唱OST《離別不要來》（이별로오지마）。之後除咗參演團體嘅音樂作品，亦參與多部OST嘅演唱。今年GFRIEND同公司Source Music合約到期亦決定唔續約，團體解散，大家都好期待日後銀河嘅發展。
13. f(x)出身 雪莉 설리
最後就係f(x)出身成員雪莉，以歌手身份出道之前，細個嗰陣曾經拍過多部電視劇同電影，例如喺《薯童謠》飾演善花公主（李寶英 飾）嘅童年時期。喺片場客串嘅時候，被SM公司星探發掘，之後通過參加選拔賽，加入SM做練習生。2009年以f(x)身份正式出道，喺隊內擔任副rapper、副唱。2015年退出組合後再次專注演藝事業，可惜因長期面對惡評壓力而患上抑鬱症，喺2019年結束咗自己嘅生命。
以上就係曾經做童星，或者先以演員身份出道嘅歌手，睇返佢哋細個個樣，真係好可愛啊！希望佢哋繼續喺舞台同螢幕上發熱發亮！
如果有更多想知嘅內容，都可以隨時留言或者dm話俾我哋知：）
Instagram：creatrip.hk