韓國都市怪談
韓國都市怪談，香港鬼婆婆係點嚟？點解搭?照鏡嘅時候，唔會望去打後嘅倒影？
Hello，大家好，我哋係由韓國人每日提供最新韓國旅行資訊嘅Creatrip。
又就嚟到7月啦！又係鬼門大開嘅月份，今日就等小編同大家分享吓韓國嘅鬼故事啦！嘿嘿 👻 有一啲驚嚇度比較高嘅圖，小編就放link度，膽大嘅朋友就撳入去睇啦！夜晚睇嘅話就......（發惡夢小編唔負責！ ）
韓國城市怪談
自由路鬼
自由路（자유로）係連接首爾到京畿道坡州市嘅高速公路。 有傳夜晚揸車經過嘅話，有個女仔企喺道路中心。 好多目擊者都話個女仔戴住太陽眼鏡，但仔細睇嘅話，其實唔係太陽眼鏡，而係對眼有兩個黑洞。 甚至朴信惠、朴熙珍、卓在勳等韓國藝人曾經喺節目上講過自己親眼目睹過，引起回響。 聽講嗰隻自由路鬼企喺高速公路上係想搭車。 韓國電視台tvN邀請驅魔師去問自由路鬼，佢解釋話自由路鬼係喺附近被勒死嘅20零歲女性。
因為自由路係沿住漢江同一山湖公園嘅高速公路，所以好大霧，好幽暗。有人認為夜晚黑媽媽，又大霧，所以產生錯覺以為有鬼。之但係有咁多人講過自己親眼目睹，真係好難100%講話係錯覺......
紅口罩傳說
紅口罩係10~20年前喺韓國好hit嘅傳說。 15年前左右，幾乎所有韓國小學生都聽過紅口罩嘅傳說！ 呢個故事起源於日本，然後傳到嚟韓國，而家成個東亞都聽過呢個怪談。據說係一個戴住紅色口罩嘅女人走過嚟問「我靚唔靚啊？」如果答靚嘅話，個女人就會除低口罩。 口罩底下嘅佢，個嘴撕裂到去耳仔下面，好得人驚。紅口罩女鬼就會同答佢嘅人講：「你都會同我一樣」，之後將對方個嘴撕開，撕到耳仔下面。
만화 작가 이동규 블로그
呢個紅口罩傳說喺韓國發展成唔同版本。 第一個係，唔同血型，嘴撕裂嘅長度都唔同。 A型就撕少少，B型就再撕大一啲，AB型就撕到同個嘴一樣咁大，O型撕到最盡。小編當時聽到呢個講法之後，有一刻好慶幸自己係A型😅
第二個係，唔只有紅口罩鬼，仲有戴住唔同顏色口罩嘅鬼：有個嘴打直咁裂，戴住藍口罩嘅男鬼，本身係整形外科醫生，撕開紅口罩鬼個嘴嘅白口罩鬼，有因口臭導致窒息嘅黃口罩鬼，為咗殺死紅口罩鬼而追住佢嘅黑口罩鬼等等。
youtube 잉여맨유튜브 채널
每隻鬼嘅風格都唔一樣，所以當時嘅小學生都會背好晒如果見到邊隻口罩鬼要點做先可以保命嘅方法！ 當時最出名嘅講法係，如果見到戴紅色口罩嘅人，就要跑去2層以上嘅建築物，或者跑去有狗嘅地方，就會冇事。 當然而家疫情時期，見到戴紅色口罩嘅人一啲都唔出奇啦🤭
網籃爺爺
網籃爺爺顧名思義就係孭住網籃嘅爺爺。 網籃係韓國傳統嘅籃，用稻草織成，用嚟裝住啲嘢方便出門，就好似像聖誕老人揹住個紅色大袋一樣。不過，同送禮物嘅聖誕老人唔同，網籃爺爺對小朋友嚟講係非常可怕。
ssg
據說網籃爺爺會將唔聽爸爸媽媽話嘅小朋友放入個網籃度帶走。 之後會點處置呢？ 又有各種各樣嘅講法，譬如話會被網兜爺爺食咗、再返唔到屋企，或者會被網兜爺爺狠狠咁教訓一餐，再送返屋企。 因為呢個怪談，如果小朋友唔聽話，韓國父母就會話「唔聽話嘅話，爺爺就會嚟捉你」之類嘅說話嚟嚇佢哋！
香港鬼婆婆
香港鬼婆婆係1980年代尾，1990年代初廣為流傳嘅韓國城市怪談，但點解係香港呢？個故事係咁嘅～
聽講婆婆坐大韓航空飛機去香港時發生空難，之後同帶喺身邊嘅貓結合，變成半人半貓嘅鬼， 喺半夜嘅時候會綁架同殺死啲小朋友。 香港婆婆同一般嘅老人家唔同，跑得特別快，跳得特別高，所以遇到香港婆婆嘅小朋友根本逃唔出佢嘅手指罅。
呢個怪談喺首爾傳開，引起咗超大嘅風波，聽講好多小學生因為太驚而唔肯返學。甚至1989年MBC新聞都報導呢個城市怪談，相當有影響力。
之不過，事實上根本冇發生大韓航空飛機飛往香港途中墜毀嘅事件，咁點解會有個咁傳聞呢？ 一種比較有說服力嘅講法係，當時拐賣兒童嘅事情經常發生，首爾江南地區嘅家長為咗令小朋友快啲返屋企而作咗呢個怪談出嚟。
咚咚鬼
目前，好多學校都俾學生自主學習，但韓國長期以嚟一直都有夜間自學嘅文化，要求學生放學之後留喺學校溫書溫到夜晚10點、 11點。 咚咚鬼就係夜間學習嘅學生之間流傳嘅怪談。
故事係咁嘅～據說因為學生A成日都攞全校第一名，令到學生B每次都只係排第二。學生B受到家長同老師嘅壓力，加上自己嘅慾望，將學生A由屋頂推落樓，偽裝成學生A自殺。 學生A頭部著地，死得好唔甘心，所以變成一個叫「咚咚鬼」嘅鬼。
之所以叫做「咚咚鬼」，係因為倒轉嘅鬼將頭「咚咚」撞落地下。 相傳自己一個留喺學校留到好夜嘅話，就係見到呢隻咚咚鬼。夜晚返過學校嘅人都知，夜晚學校同朝早充滿活力嘅氣氛完全唔同，夜晚真係好陰森恐怖！ 所以呢個咚咚鬼嘅怪談喺學生之中廣為流傳。
學校銅像鬼 / 肖像畫鬼
대전사회혁신센터
繼咚咚鬼之後，呢個都係同學校有關嘅怪談。起咗幾十年嘅韓國學校操場度，通常都會有一個銅像，代表性嘅有李舜臣將軍銅像、世宗大王銅像、柳寬順銅像等等。 相傳呢啲銅像一到夜晚12點就會郁，每間學校都有唔同嘅版本，有啲話一到12點就會流血淚，或者喺學校行嚟行去，亦都有人話見到嗰啲銅像嘅人會死。
冇銅像嘅學校就會傳肖像畫！話一到晚上12點，肖像畫入面個人嘅瞳孔就會郁，如果同佢對視嘅話就會死。聽完之後，再望住呢啲畫，真係有啲怯！😖
筆仙
筆仙係喺日本傳出，喺韓國都廣為流傳嘅召喚鬼魂嘅巫術。 召喚鬼魂只需準備物兩樣嘢，白紙同筆！鉛筆、原子筆、顏色筆⋯⋯ 咩筆都得，但一般都鍾意用紅色。喺白紙上面畫O同X之後，兩個人面對面坐，揸着筆唸咒語，鬼就會搵上門。例如講「筆仙，筆仙，嚟咗未啊？」如果支筆向O 嗰邊郁嘅話，即係鬼已經嚟咗！之後就可以問問題，當問晒想結束嘅時候，就要問：「筆仙係咪完啦？」，支筆郁去O度嘅話就即係完咗。如果你唔問，自己隨隨便便咁結束嘅話，就會被鬼傷害！
大部分韓國人喺學生時代都喺學校玩過筆仙，可見筆仙係一個好受歡迎嘅恐怖遊戲。 2004年仲上映過以筆仙為主題嘅恐怖電影！
紅廁紙 藍廁紙
呢個故事喺韓國同日本都好出名。 幾十年前，韓國以前嘅廁所係傳統茅廁咁。相傳當喺茅廁度「辦工」時，會聽到由下面傳嚟鬼魂嘅聲音：「你要紅色嘅廁紙？定係藍色嘅廁紙？」。 至於揀邊隻廁所可以保住條命仔呢？ 有唔同版本嘅答案。
第一個版本係，揀紅色嘅會死，揀藍色嘅就會冇事。第二個版本係，如果揀紅色廁紙，條頸就會被斬斷，俾血浸死；如果揀藍色廁紙嘅話，就會被吸晒啲血而死。即係話，揀邊隻都死。第三個版本係韓國嘅傳聞，如果答「唔使要廁紙」，或者乾脆唔答就可以保住命仔！ 大家信邊個版本呢？🤔
升降機鏡鬼
最後就係關於升降機嘅怪談。 搭𨋢嘅時候通常兩邊都有鏡，喺鏡度睇嘅反射係睇唔到盡頭，升降機鏡鬼嘅怪談就係咁出現。
相傳升降機鏡反射出自己嘅倒影入面有鬼！ 好多人都話喺第4個或第13個倒影度。 升降機鏡鬼一眼就睇得出係鬼，因為同平時鏡入面嘅自己唔一樣，鏡鬼雖然都有自己嘅樣，但係可以隨便咁郁。 傳聞如果同鬼對視嘅話就會死。
雖然小編唔係好信事，但因為聽得太多，總係有啲驚驚哋，所以搭𨋢照鏡嘅時候，淨係會望住最前面嘅自己，唔會望去打後嘅倒影😂
今日聽咗咁多於韓國城市怪談嘅故事，大家有無覺得背脊涼浸浸呢？😖 大家又聽過啲咩鬼故呢？歡迎留言同小編分享！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
