韓國人8個解辣方法
你以為韓國人個個都食得辣？Nono！不過佢哋有解辣方法！
Hello，大家好，我哋係由韓國人每日提供最新韓國旅行資訊嘅Creatrip。
好多韓國菜都有辣椒粉，或者辣椒醬，味道偏辣。大家可能以為個個韓國人都好食得辣，其實唔係㗎！今日小編就介紹吓韓國人食辣嘢嘅時候，會用咩方法解辣啦！
韓國人8個解辣方法
雖然唔係個個韓國人都好食得辣，但真係有唔少韓國人鍾意食辣嘢嚟減壓，所以一啲拉麵品牌有出10倍、100倍辣嘅即食麵俾韓國人挑戰。
不過唔係個個都咁食得，頂唔順嘅時候，佢哋會用以下8個方法解辣。根據 PanelNow 嘅一項網上調查，全國有 34,459 名韓國人投票選出咗佢哋覺得最有效解辣嘅 8 種食物。
第8位：汽水（2.2%）
汽水甜甜哋，可以減輕辣味，但亦有好多人覺得飲咗仲辛苦。
第7位：醃黃蘿蔔（3.4%）
醃黃蘿蔔係韓國好常見嘅伴菜，通常食炒年糕，或者去食韓式嘅炸醬麵都一定有醃蘿蔔，味道帶少少甜，可以有助減輕辣味。
第6位：雪糕（6.1%）
有唔少韓國人食完辣嘢之後會食雪糕，夠凍又甜，可以減輕辣味同痛楚
第5位：飯團（6.2%）
飯團係同紫菜包飯差唔多，不過會搓成一粒粒波咁，通常入面包著午餐肉，或者吞拿魚，混合蛋黃醬而成
第4位：蒸蛋（7.1%）
韓式蒸蛋厚身啲，唔少韓國人食辣嘢都會叫一個，解辣同時仲有飽肚感。
第3位：水（7.1%）
namooactor
第3位就係一般大家食辣嘢嘅時候一定諗起嘅水啦！不過小編就覺得，越飲水，特別係凍水，個辣味就越濃，條脷越麻 唔知大家有冇同感呢？
第2位：Juicy Cool果汁（27.3%）
Juicy Cool係韓國嘅果汁品牌，價錢好平，但好好飲，亦都有好多口味。 好多食辣炒年糕嘅舖頭都係送呢款飲品俾客人
第1位：牛奶（29%）
韓國人選出第1位解辣嘅食品就係牛奶！ 因為牛奶有助溶解辣椒素，所以食辣嘢嘅時候，會減少食物喺口入面同胃嘅辛辣感。
咩都搞唔掂（8.3%）
除咗以上8樣食品之外，調查中有8.3%r嘅受訪者答「咩都搞唔掂」！對於唔食得辣嘅小編，真係200%認同啊！！！ 特別係唔小心食咗青陽辣椒，嗰種辣慢慢咁喺口入面散開，無論食咩、飲咩都於事無補，條脷一樣咁痛，個嘴一樣咁熱，好似要變孖潤腸咁
燒酒？？
雖然燒酒榜上冇名，但小編有識得嘅韓國朋友成日都話：如果食咗辣，飲啲燒酒，可以幫助減低辣味。唔知係咪真㗎呢 大家都不妨試吓啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
