Hello，大家好，我哋係由韓國人每日提供最新旅行資訊嘅Creatrip。
好多人氣劇集或者電影成日都見到佢哋嘅蹤影，演技又出色，甚至有啲連韓國人都唔知道原來係歌手出身！大家又知幾多個呢？
歌手出身嘅演員
1. 柳真 유진 - 以S.E.S.女團出道
大熱劇《Penthouse 3》 啱啱開播啦，相信大家對劇中飾演吳贇熙嘅柳真好有印象，除咗《Penthouse》，柳真都主演過《麵包王金卓求》、《我們可以相愛嗎》等韓劇。1997年一次喺合唱團表演中負責彈琴，吸引咗所有人嘅注目，後嚟SM老闆李秀滿親自試鏡成功，以練習生身份加入公司，再以S.E.S女團出道。S.E.S當年非常紅，可以話係元祖嘅女團。5年之後S.E.S解散，柳真參演KBS 電視劇《Loving you》（러빙유），以演員身分繼續演藝活動。
2. 徐玄振 서현진 - 以M.I.L.K(밀크)女團出道
以「浪漫喜劇女王」走紅嘅徐玄振演過多部人氣韓劇，例如《又，吳海英》、《浪漫醫生金師傅》、《愛情的溫度》、《愛上變身情人》等，原來佢自細就開始習舞，高中時期被星探發掘加入SM做練習生，一年練習生生活之後，2001年以M.I.L.K女團出道，出過一張專輯。準備出第二張專輯時，其中一個團員退出，令團體解散。2005年參演音樂劇《Sound of Music》(사운드 오브 뮤직)之後，開始演員嘅生涯。
3. 張娜拉 장나라
提起張娜拉，一定會諗起佢多年不變嘅童顏。2002年《明朗少女成功記》嘅車楊順同而家熱播緊嘅《大發不動產》洪智雅，真係好似食咗防腐劑咁無咩點變過！幾乎每年都有新作品嘅張娜拉，原來喺2001年已經發行首張專輯《First Story》出道，後嚟參演韓劇，同時以歌手同演員兩個身份展開演藝生活，無論係音樂，定係戲劇方面都獲獎無數。近幾年，張娜拉除咗間唔中唱吓OST，或者喺劇中獻聲之外，就無再出專輯，專注喺戲劇嘅演出。
4. 金知碩 김지석 - 以組合L.E.O（리오）出道
大家可能就咁睇個名未必醒起係邊個，但一睇相一定對佢有印象！雖然唔係每次都出演主角，但就算擔當配角，甚至係客串嘅佢亦都好搶戲，令觀眾好有印象。最近出演《我獨自生活》先講起，原來佢喺2001年以L.E.O（리오）團員出道，擔任Rapper，令在場所有MC相當驚訝！
5. 周元 주원 - 原Frees(프리즈)男女混合團體成員
首次演出《麵包王金卓求》就嶄露頭角嘅周元，隨後演出嘅《新娘面具》、《Good Doctor》、《龍八夷》等韓劇都相當受歡迎。原來佢都唔係演員出身，而係喺2006年以兒童為對象嘅5人組員Frees（프리즈）出道，其後通過音樂劇《Alta Boys》正式以演員身份發展演藝事業。
6. 吳漣序 오연서 - 以Luv女團成員出道
吳漣序拍過好多劇，當中《西遊記》、《回來吧大叔》最為人熟悉。唔知大家又知唔知，原來佢都係歌手出身㗎呢？最初2002年佢同全慧彬（同樣而家以演員身份活動中）、趙銀星組成嘅三人女團Luv發行首張專輯《Story-Orange Girl》出道，但因為唔受矚目而轉為演員發展。
7. 尹恩惠 윤은혜 - 以Baby V.O.X(베이비복스)女團出道
尹恩惠成日都「無酬出演」《Running Man》（因為成日都提起佢同金鐘國），戲劇方面2006年主演嘅《宮》得到好大嘅迴響，之後演出《咖啡王子1號店》、《千億寵愛在一身》、《想你》等劇都獲得好評，不過因抄襲事件導致其後鮮有作品。大家都知道佢演員嘅身份，但原來佢早喺15歲嘅時候加入Baby V.O.X(베이비복스)出道，出咗幾次專輯之後轉為發展表演事業。
8. 鄭麗媛 정려원 - 以Chakra(샤크라)女團出道
演員身份深入民心嘅鄭麗媛，《我叫金三順》、《你來自哪顆星》、《魔女的法庭》等韓劇都獲得唔錯嘅成績，原來佢都係歌手出身！喺2000年以女團Chakra出道，當時以東方風格，相當獨特嘅形象示人，掀起過話題。
9. 黄正音 황정음 - 以Sugar(슈가)女團出道
大家都應該睇過好多黃正音主演嘅劇，好似係《Kill Me Heal Me》、《秘密》、《Kill Me Heal Me》、《她很漂亮》等等都係人氣超高嘅劇集。佢轉型做演員之前，原來係曾經紅極一時Sugar女團嘅成員之一，其中一位成員仲係裴勇俊妻子--朴秀真，唔知大家又有無印象呢？
10. 尹啟相 윤계상 - 以 g.o.d 組合出道
要講到由偶像歌手，成功轉型為演員，唔可以唔提出身於天團g.o.d嘅尹啟相。以前對於偶像歌手轉型為演員充滿偏見，要求都特別高，但尹啟相排除所有困難，致力表演，以真誠嘅演技打動觀眾。廣為人知嘅作品包括韓劇：《嫂嫂19歳》、《最佳愛情》、《High Kick！短腿的反擊》等。除咗電視劇之外，亦參演多部電影：《野獸男孩》、《豐山犬》、《犯罪都市》等，可算係專業嘅演員！
11. 金昌完 김창완 - 樂隊「山之音」(산울림)
金昌完係資歷好深嘅演員，經常演出劇中重要嘅配角，或者係主角嘅爸爸等等，當中2014年《來自星星的你》入面中為幫敏俊掩飾身份而充當係佢爸爸嘅搞笑情節，令人印象深刻。成熟穩重嘅外表同演技，估唔到原來同過哥哥、細佬夾過band，樂隊叫「山之音」(산울림)，仲係作曲家，將搖滾樂帶入韓國！
12. 閔孝琳 민효린
講起閔孝琳，可能大家首先會諗起太陽，而佢嘅作品唔多，好多時都係演出MV，令人以為佢係模特兒，兼演員。不過原來佢係2007年5月率先以歌手身份出道，當時係唱改編至中島美嘉嘅《Stars》。2009年出演《冰舞飛揚》（트리플）而開始成為演員。
以上就係而家活躍係電視或者大銀幕，但出身自歌手嘅演員，又唱得又演得，真係勁啊！大家如果仲知邊個係出身於歌手，又成功轉型為演員嘅話，不妨留言話俾小編知啊！
如果有更多想知嘅內容，都可以隨時留言或者dm話俾我哋知：）
Instagram：creatrip.hk