Hello，大家好，我哋係由韓國人每日提供最新旅行資訊嘅Creatrip。
大家知唔知，喺韓國學校入面或者附近都有好多特別嘅小食店呢？大學生未必個個零用錢都多，每一日放學之後都會同同學食飯，都真係要用唔少錢... 雖然學校有飯堂，價錢都會平啲，不過款式好少，味道多數都麻麻，食得多都會厭，所以好多大學生都會喺學校附近搵一啲又抵又好食嘅舖頭食飯！一齊睇落去啦！
韓國大學生嘅靈魂食物
1. Isaac Toast (이삭토스트)
招牌menu
- 火腿芝士多士（햄치즈 토스트）：₩2,600（約HKD18）
- 煙肉薯仔薄餅多士（베이컨 포테이토 피자 토스트）：₩4,500（約HKD31）
大家應該好熟悉Isaac Toast！佢係韓國好出名嘅多士連鎖店，唔止大學附近，喺周圍街頭都好易搵到！佢哋最大嘅賣點係加咗秘製醬汁嚟整多士，令到平平無奇嘅多士變得特別好味！
款式仲好多添！上圖嘅Isaac Toast包裝紙，上面印曬所有多士種類！價錢都幾平，招牌火腿芝士多士都係₩2,600（約HKD18），最貴嘅煙肉薯仔薄餅多士都係₩4,500（約HKD31），平得嚟又飽肚，所以好受大家歡迎！
大家嚟到韓國，或者身處喺外國想送外賣俾喺韓國嘅朋友仔，仲可以透過我哋Creatrip外送服務叫到Isaac Toast㗎！
2. GGgo杯飯（지지고 컵밥）
招牌menu
- Nice Rice（나이스라이스） : ₩4,000（約HKD28）
- Noodle Doodle（누들두들） : ₩4,000（約HKD28）
GGgo喺賣杯飯嘅連鎖店之中最出名，學校附近有好多分店！招牌菜menu嘅Nice Rice同Noodle Doodle分別用飯同烏冬去整，連埋新鮮嘅海鮮、蔬菜加上辣椒油一齊炒，甜甜辣辣嘅味道，一試難忘！小編啱啱讀大學嘅時候，差唔多每日都去食，搞到老闆都認得小編🤣
唔食得辣嘅話，可以好似相入面咁，加啲芝士同雞蛋嚟食！ 或者揀蛋黃醬、吞拿魚蛋黃醬等唔辣嘅menu！話埋俾大家知，位於淑明女子大學正前方嘅GGgo杯飯最好食！小編朋友為咗食淑明女子大學嘅GGgo，成日都會嗰頭㗎！
3. BonGousse飯堡（봉구스밥버거）
招牌menu
- BonGousse飯堡（봉구스밥버거）：₩2,300（約HKD16）
- 火腿飯堡（햄밥버거）：₩2,800（約HKD19）
instagram @bongousse_korea
用紙包住嘅飯？咩嚟㗎？原來係用飯代替麵包整成嘅BonGousse飯堡！好似食飯團咁用手揸住嚟食，或者放係枱上面用匙羹食。飯同飯之間夾住吞拿魚蛋黃醬、芝士、火腿、炸雞、炒牛肉等等多種材料，總共大約有80款menu可以揀，總有一款啱口味！😉
BonGousse飯堡平均一個₩3,000~4000左右，好抵食，又飽！好似上面張相咁，連埋杯麵一齊食就更加滋味！對窮學生嚟話係最正嘅晚餐啊！😍
4. DOSMAS （도스마스）
招牌menu
- 牛肉＋雞肉墨西哥捲（소고기+닭고기 부리토）： ₩4,000（約HKD28）
instagram @tongtonglio
instagram @tongtonglio
DOSMAS係食墨西哥捲嘅連鎖店，價錢大約₩4,000，感覺好似將炒好咗嘅飯用墨西哥粟米餅捲住嚟食咁！ DOSMAS由首爾漢陽大學店開始，所有分店都係喺大學附近，深受韓國大學生歡迎😍
5. Hansot（한솥）
招牌menu
- 大炸雞沙律醬飯（빅치킨마요）：₩3,500（約HKD24）
- 肉全部都係肉飯盒（고기고기도시락）：₩4,000（約HKD28）
Hansot係韓國最大型飯盒連鎖店！好平嘅價錢就食到都算豐富嘅一餐，總有一間喺大學左近！款式多到數唔晒！飯盒除咗主菜，仲有幾款伴菜，簡簡單單就可以食到蓋飯、撈飯、甚至係湯飯！完全係啱晒韓國人口味嘅飯盒品牌😊
簡單又方便咁解決到一餐，小編記得以前仲係學生嘅時候，一冇錢就會去Hansot食飯！
6. MEAL PLAN B（밀플랜비）
招牌menu
- 炸雞&薯仔墨西哥捲（치킨&감자 부리토）：₩4,000（約HKD28）
instagram @silver_kyoo
instagram @panda._.sw
一講起大學生嘅靈魂食物，都會諗起MEAL PLAN B！同之前介紹過DOSMAS一樣，主要賣墨西哥捲！小編早前喺大學度食過，真係好好食！又大件！食一個就好夠飽！
instagram @mukgo_die
呢度嘅墨西哥捲一個大約₩4,000左右，所以好受大學生嘅歡迎！因為咁大部分嘅分店都係喺大學附近，配菜款式又多，有時會食豪啲，同朋友一齊share嚟食，真係好開心㗎！
7. SALADY（샐러디）
招牌menu
- 凱撒炸雞沙律（시저치킨 샐러디）：₩5,900（約HKD41）
- 智利煙肉warm bowl（칠리베이컨 웜볼）：₩6,900（約HKD48）
SALADY以「健康快餐」為主打嘅沙律連鎖店，唔單只有沙律，仲可以加雜榖飯嘅warm bowl、墨西哥粟米餅捲等等健康嘅menu，價錢都算平！
其實好多喺大學附近嘅餐廳價錢係平，但都唔係咁健康，味道濃，卡路里又高😅 所以咁多間餐廳之中，SALADY啱晒想食得健康嘅大學生，雖然比起以上介紹嘅餐廳貴啲，但講到要食得健康嘅話，SALADY算係好抵食！
小編同朋友想食得健康啲，或者要減肥嘅時候就會嚟SALADY😋 大家喺韓國想食得又平又健康嘅話，小編強力推薦去SALADY！
今日同小編睇咗咁多韓國人大學生嘅靈魂食物，覺得點呢？上面嘅相好多都係大學生影自己食嘅食物照嚟㗎，係咪好真實呢？今日介紹嘅全部都係韓國大學生唔可能唔知嘅地方，大家快啲mark低，嚟韓國嘅時候都去試吓啦！
如果有更多想知嘅內容，都可以隨時留言或者dm話俾我哋知：）
Instagram：creatrip.hk