擁有特別世界觀嘅idol
竟然有組合出道嗰陣就有世界觀相關嘅電影？超能力、魔法學生、惡夢設定，韓國組合嘅世界觀底線究竟喺邊？
Hello，大家好，我哋係由韓國人每日提供最新韓國旅行資訊嘅Creatrip。
而家嘅idol同以前嘅idol最大分別可以話係獨特嘅世界觀啦。好多世界觀仲設定到就算係粉絲都唔一定睇得明添！今日就得小編同大家介紹一啲擁有特別世界觀嘅idol啦！
9個擁有特別世界觀嘅idol
1. EXO
EXO係第一個以自己獨特嘅世界觀出道嘅組合，連個組合名都係代表太陽系以外行星「EXOPLANET」一字而嚟。嚟自呢個不知名外行星嘅EXO成員，每個人都有佢自己嘅超能力，包括係念力、時間、空間、火、水等等。雖然本身因為世界觀太獨特而令部分粉絲唔係即刻接受到，但後來隨著EXO獨特嘅世界觀故事發展慢慢就得到更多嘅粉絲嘅喜愛啦。
2. 宇宙少女
宇宙少女係根據12個星座concept出道嘅組合，而且成員都係魔法學校嘅學生。根據成員嘅角色，分為一年級，二年級同三年級。一年級嘅學生φορευς（포레우스）係傳遞夢嘅人，二年級αγυρτης（아귀르떼스）係收集夢嘅人，而三年級 ενυπνιον（에뉩니온）就係令夢變為現實嘅人啦，真係好特別！
3. BTS
BTS擁有非常有現實感又複雜嘅世界觀，咁嘅世界觀亦係令佢哋得到咁多喜愛嘅原因之一。通過「學校三部曲」，「青春三部曲」同「Love Yourself三部曲」，每次comeback不斷都有新嘅故事同設定更新，特別係搵歌詞同MV入面嘅線索再推論故事呢件事，更成為唔少粉絲覺得好有趣同有魅力嘅特色添。
4. 本月少女
本月少女只係出道都用咗兩年，而公布成員嘅過程就建立咗一個完整嘅世界觀啦。每個成員都有相應嘅生果、顏色、動物同秘密添！所以每次公開成員solo歌或者unit歌嘅時候，入面都有好多可以推論世界觀嘅線索，令唔少粉絲都覺得好有趣。
5. NCT
擁有無限擴張成員制度嘅NCT！佢哋有以夢同現實為主題嘅世界觀，成員通過夢互相理解同產生共鳴，再以音樂變成一體。而SM藝人最特別係組合之間世界觀係相連㗎，人稱「SMCU」！真係好神奇，睇嚟SM想變成下個Marvel🤣。
6. ATEEZ
ATEEZ Twitter
最近喺《Kingdom：Legendary War》得到第三名嘅ATEEZ，佢哋嘅世界觀出名連粉絲都覺得好深奧！（其實小編都唔係好睇得明..😂）不過簡單嚟講，八個成員係一群海盜，而每次comeback都會講述喺搵寶藏嘅過程當中遇到嘅故事同難題等等！
7. aespa
aespa由啱啱出道就因為歴代級特別嘅世界觀以引起好多討論。因為佢哋嘅世界觀竟然係分為現實同A.I嘅假想世界進行! 真係一個好切合現代社會嘅世界觀。🤣
8. P1Harmony
由FNC推出嘅P1Harmony都有一個非常獨特嘅世界觀！講述佢哋世界觀嘅電影《P1H:新世界的開始》甚至喺佢哋出道嗰陣喺戲院上映添！佢哋嘅世界觀嘅背景設定於一個充滿會引起暴力同憤怒嘅病毒嘅世界，講述一班分散喺唔同次元嘅少年聚集起嚟拯救呢個世界嘅故事。真係同一般科幻電影一樣咁精彩！
9. Dreamcatcher
Dreamcatcher嘅成員象徵嘅係7個惡夢，而喺佢哋嘅世界觀，更有一位追擊成員嘅惡夢獵人添。多少有啲黑暗嘅世界觀，再加上Dreamcatcher嘅搖滾歌曲，令佢哋比其他組合更有差別性！而且特別嘅世界觀亦都令唔少粉絲更加期待佢哋嘅come back，想知道之後嘅故事添！
以上就係一啲擁有獨特世界觀嘅idol啦，除咗以上嘅idol，其實都仲有好多idol有好特別嘅世界觀，如果有邊個小編冇提到嘅話，歡迎留言俾我哋知！
如果有更多想知嘅內容，都可以隨時留言或者dm話俾我哋知：）
Instagram：creatrip.hk
