Hello，大家好，我哋係由韓國人每日提供最新韓國旅行資訊嘅Creatrip。
大家嚟韓國應該一定搭過地鐵！原來韓國嘅地鐵得到全世界認可之餘，仲係世界第八長嘅城市鐵路網，設施非常完善，具備各種尖端要素，更加被美國汽車專業媒體《Jalopnik》認定為世界最佳地鐵之一！
目前首爾地鐵有324個車站。當中地鐵站嘅名中包含咗好多有趣嘅故事同歷史、文化意義。 今日小編就同大家講解地鐵站名嘅小故事啦！
首爾地鐵站改名小故事
用大學名命名
首爾連埋首都圈有好多間大學，大家應該都見過好多用名牌大學嚟命名嘅地鐵站！ 事實上，1974年開通1號線嘅時候，就係以「相關地區地名」為原則嚟改名嘅。
但係隨住其他線陸續開通，首爾嘅地鐵站變得密集，一個地區可能出現咗兩個以上車站。為咗解決呢個問題，決定用地區嘅地標作為地鐵站嘅名。
theqoo
而家嘅梨大站（2號線）、首爾大入口站（2號線）、漢陽大站（2號線）、教大站（2號線、3號線）都係用大學名嚟命名，但係呢個做法遭到其他大學嘅反對。 因為如果喺地鐵站名度加入大學名稱，會有好大嘅宣傳效果。 實際上，大學附近一旦出現新嘅站，就會展開巨大嘅心理戰。 例如，2001年釜山地鐵2號線開通嘅時候，附近三間大學就展開激烈嘅鬥爭，最終變成「慶星大、釜慶大站（東明大學站）」呢個咁奇怪嘅名。
1. 東橋站（동교역） → 弘大入口站（홍대입구역）
連接2號線、京義中央線、機鐵線嘅弘大入口站，係首爾最出名嘅地鐵站之一，喺首都圈所有車站中，上落車次排名第5。 弘大入口站原名叫「東橋站」，因為位於首爾特別市麻浦區東橋洞。
但係2號線開通前4日，應弘益大學嘅要求，改名為「弘大入口站」，當時一齊開通嘅梨大站、首爾大入口站、漢陽大站、教大站，都要求將學校名加入去，開展咗用大學名改地鐵站名嘅熱潮。
2. 華陽站（화양역）→ 建大入口站（건대입구역）
建大入口站係 2 號線同 7 號線嘅轉乘站，最初2號線開通時，由於位於廣津區華陽洞，所以改名為「華陽站」。
위키피디아
但因為用大學命名嘅熱潮，建國大學要求改名。結果1985年就正式將華陽站更名為「建大入口站」，附近嘅建大街同弘大街一齊成為最熱門嘅大學商業圈之一。
3. 徽慶站（휘경역） → （外大前站）외대앞역
外大前站位於韓國外國語大學附近1號線嘅地鐵站。 開通當時，因為位於徽慶洞同里門洞嘅邊界，所以叫做「徽慶站」。
隨着附近「回基站」（회기역）嘅開通，發現徽慶站準確嘅位置係喺里門洞，回基站就近徽慶洞多啲，所以喺1996年就將徽慶站更名為「外大前站」以減少站名帶嚟嘅混亂。
4. 總神大入口站（총신대입구역）→ 梨水站（이수역） → 總神大入口站（총신대입구역）
總神大入口站同梨水站係韓國唯一一個同站唔同名嘅轉乘站。 一般轉乘站嘅名都係一樣，但呢度4號線叫總神大入口站，7號線就叫梨水站，搞成咁係一個好複雜嘅故事。
위키피디아
1984年開通4號線嘅時候，總神大學為咗宣傳學校，投資咗約2400萬won（計返通漲大概係而家8,000萬won），將地鐵站命名為「總神大入口站」。
위키피디아
到咗2000年7號線開通，連接起4號線嘅總神大入口站，出現咗「南城站」（남성역），而呢個南城站比當時嘅總神大入口站更近總神大學，所以就將當時總神大入口站改為 4 號線 7 號線「梨水站」， 7 號線南城站就更名為「南城站（總神大入口）」。
但係總神大學以各種理由提出強烈抗議，結果站名改咗兩個月之後，4號線叫返「總神大入口站」，而同站嘅7號線就維持叫「梨水站」，變成同站唔同名嘅現象。 而總神大學強硬嘅做法，至今仍受到好多批判。
5. 栗田站（율전역） → （成大前站）성대앞역 → （成均館大站）성균관대역
매일경제
成均館大學分咗兩個校園，一個係衆所周知，位於首爾惠化大學路附近，一個就喺水原市。 1979年1號線地鐵開通到成均館大學水原校區附近，當時嗰度叫「栗田村」，所以地鐵站名就叫做「栗田站」。
위키피디아
但係1984年掀起咗用大學命名地鐵站名，當時成均館大學係栗田嘅地標，亦有好多成均館大學水原校區嘅學生經過呢個站嚟返學，所以改名叫「成大前站」。即使當地居民主張應該用返栗田站呢個具有歷史意嘅名，但一直不了了之，最後再改名為「成均館大站」。
6. 西江站（서강역） → 西江大站（서강대역）
오마이뉴스
位於西江大學前面嘅京義線中央線嘅西江大學站，其實喺1929年以「西江站」開始營業，係一個歷史悠久嘅車站。 西江站因為靠近而家西江大橋所在嘅西江渡口（漢江渡船經過嘅地方）而命名。 當時西江站同時經營普通旅客列車，同供應煤炭嘅列車。 韓國解放之後，就變成貨物專用站。
西江大學
後嚟，京義中央線開通，西江站重新復活，而6號線廣興倉站離西江大橋（即西江渡口）更近，有人認為西江站呢個名唔合適， 因此以位於附近西江大學的名字命名，變成了「西江大站」。英文本身嘅「Seogang」都跟住西江大學嘅英文標記一齊改為「Sogang 」。
7. 硯村站（연촌역） → 城北站（성북역） → 光云大站（광운대역）
facebook page 시간여행자
連接地鐵1號線同京春線嘅光云大站，喺日佔時期被叫做「硯村站」，用嚟運輸貨物。1963年1號線開通後，變為普通列車，改名為「城北站」。
ohmynews
但係隨住行政區域重新計劃，城北站呢個名同地區名唔一致，同而家城北區或者城北洞冇任何關係。 加上用大學名命名車站嘅浪潮，光云大學都提出改名嘅要求。初時鐵路公社因為大學命名站名嘅爭論實在太多，拒絕咗光云大學嘅要求。不過最後有超過80%嘅居民投票贊成，終於喺2012年正式改名為「光云大站」。
為地區形象而改名
另外一個情況係因為地鐵站名會影響嗰區嘅形象，所以改名。
1. 競馬場站（경마장역） → 競馬公園站（경마공원역）
4 號線競馬公園站第一次開通車站嘅時候係叫「競馬場站」，本來係想同附近嘅競馬公園做連結，但係競馬（即賽馬）比起體育運動，賭博嘅色彩更強，好多韓國人見到競馬場呢個字，淨係聯想到賭博。
헤럴드 경제
為咗消除同賽馬場相關嘅負面形象，改名做「競馬公園站」。 賽馬場亦都從原本嘅「首爾賽馬場」改名做「Let's Run Park Seoul」。
2. 九老工團站（구로공단역） → 九老數碼園區站（구로디지털단지역）
조선일보
首爾九老區 2 號線嘅「九老數碼園區」，以前叫「九老工團站」， 當時製衣業最具代表性，喺附近有好多工廠，形成咗勞動密集型製造業，令到韓國經濟大幅增長。
위키피디아
但係「工團」（工業團地嘅簡稱）俾人嘅印象好落後，加上當時大部分工廠都轉移去海外或者其他地方。21世紀初開始，IT業界大規模進駐，「數碼園區」呢個名更加適合，所以就改名為「九老數碼園區」。
3. 加里峰站（가리봉역） → 加山數碼園區站（가산디지털단지역）
位於加山洞，連接 1 號線和 7 號線地鐵站嘅加山數碼園區，同啱啱介紹嘅九老數碼園區非常近，所以會合稱為「G Valley」（G밸리）。
전자신문
加里峰站見到九老工團站更名成功，想要樹立尖端園區嘅形象，所以又跟住改名叫「加山數碼園區」。不過九老數碼園區同加山數碼園區兩個站名都太長，一般都會簡稱為「九D」（구디）、「加D」（가디）！
4. 城內站（성내역 ）→ 蠶室渡口站（잠실나루역）
위키피디아
2 號線蠶室渡口站，原名係「城內站」，因為車站嘅東北部有一條城內川。 問題係喺江東區仲有一個叫城內洞嘅地方，距離地鐵城內站有4個巴士站咁遠。為咗防止呢個混亂，2010年改名為「蠶室渡口站」。
而之所以要加埋「蠶室」呢個名，除咗因為位於蠶室附近之外，仲因為蠶室位於江南，樓價高，可以進一步強化富人區嘅形象，進一步提高樓價。
5. 新川站（신천역） → 蠶室新川站（잠실새내역）
헤럴드 경제
蠶室新川站係位於蠶室渡口站、蠶室站之後嘅地鐵站。 加「蠶室」落個站名，一樣係為咗強化富人區嘅形象。
而最開始改名嘅原因係新川站嘅發音同一樣係喺2號線嘅新村站好相似。 唔單只外國人，就連韓國人都經常會混淆，所以將「新川」改以單純用韓文「새내」代替，取名為「蠶室새내」（中文譯做「蠶室新川）」。因為改名，令到2號線連續出現咗3個蠶室站，反而變得更混亂🤔
因地標變化而改名
文章最初講過地鐵站名會以地區或地標為原則黎命名，但命名當時嘅地標同而家可能會唔同，甚至消失。呢個情況下，地鐵站名亦都會被更改。
1. 中央廳站（중앙청역） → 景福宮站（경복궁역）
3號線景福宮站最初開通時，叫「中央廳站」。日佔時期，日本為咗壓倒韓國人嘅文化、歷史、民族心理，拆除咗景福宮內一部分嘅建築，喺景福宮入面（光化門背後）起咗朝鮮總督府。韓國解放之後，朝鮮總督府改為中央廳繼續用，但充斥住日佔時期嘅色彩。
위키피디아
隨住1970年政府首爾辦公大樓建成，1982年政府果川辦公大樓建成，韓國主要機關都搬到去嗰邊。 中央廳喺1986年被用為國立中央博物館。 就係咁，由朝鮮總督府，改為中央廳，再改為國立中央博物館。 因爲中央廳呢個機構已經唔存在，所以地鐵站名亦都喺1987 年改名為「景福宮站」。
연합뉴스
1995年金泳三總統喺光復50週年三一節紀念文化慶典時，宣佈拆除有日佔時代痕跡嘅朝鮮總督府（中央廳），令金泳三總統嘅支持率暴增至70%。多得金泳三總統呢個舉動，而家先睇到咁靚嘅景福宮。
2. 首爾運動場站（서울운동장역 ）→ 東大門運動場站（동대문운동장역） → 東大門歷史文化公園站（동대문역사문화공원역）
mbc archive
連接 2 號線、4 號線、5 號線，位於東大門的地標DDP嘅東大門歷史文化公園站，最初1983年開通嘅時候叫「首爾運動場」站。
서울디자인재단
1984年蠶室綜合運動場出現之後，為咗明確咁區分，運動場改名為東大門運動場，站名都改成「東大門運動場站」。 隨着2008年東大門運動場被拆除，東大門歷史文化公園嘅誕生，2009年車站名稱亦隨之更改為「東大門歷史文化公園」。
3. 貨物轉運站（화물터미널역）→ 南部轉運站（남부터미널역）
위키피디아
1985年首都圈地鐵3號線首次開通時，呢度有個小型貨物站，被稱為「貨物轉運站」。 1990年貨運站變成叫「首爾南部轉運站」巴士站，地鐵站亦改為「南部轉運站」，係一個首爾往來其他地區嘅主要大型轉換站。
以上就係首爾地鐵名嘅改變歷史！ 當中包括咗各種機關、團體嘅利害關係，亦都包含住首爾嘅社會文化歷史，大家覺得有無趣呢？ 小編都係第一次知道有咁樣嘅故事😆
大家以後嚟韓國旅遊嘅話，坐住地鐵，望住地鐵站嘅名，回想一吓今天一齊了解嘅故事，應該特別有感覺！😉
如果有更多想知嘅內容，都可以隨時留言或者dm話俾我哋知：）
Instagram：creatrip.hk
